Rilo urang Việt di negar langiu mai palei mbang Tết 

       Ong Nguyễn Trí Dũng, akaok Công ty TNHH Minh Trân brei thau: 45 thun tapa, ong hu mboh rilo mbang Nyaom roya, dalam nan, Nyaom roya 6 hu ba tabiak saong tacei ba jalan salih bahrau di taneh aia – lac nyaom roya brei mboh bruk cak rok patagok di Việt Nam. Kayua yau nan ye, ong Dũng caong khin Nyaom roya mbang ini meda ba tabiak Sarak njauk haong hatai di bhap bani, ngak jeng jalan cak rok patagok khang jang:

Yaom lac hu biak rilo kan kandah min dalam thun 2020, khaol drei hu yam tapa cuang kandah prong di manuac sia dunya lac jit ruak Covid-19. Dahlak caong lac Nyaom roya hu sa “panuac ndom” patagok ka Việt Nam, brei mboh sa vaktu cak rok bahrau.

         “Bruk gul pataom di bhap bani gam haong jalan saneng di urang pal akaok taneh aia lac sa kadha biak siam gheih”, nan lac hatai saneng di ong Lưu Thanh Dũng, sa urang Viet Nam daok di negar Prang urak ini daok diuk rai di bal raya HCM. Puac bilan 10/2019, ong Dũng mai palei negar mbang Tết blaoh daok veik Việt Nam tal harei ini kayua jit Covid-19 tamuh tabiak. Daok veik palei negar biak suai, ong meng thau cambaih jang bruk di taneh aia, ong mboh lac dalam kan kandah, negar drei jeng pacang cakak hu jit prong nan lac bruk kham merat biak njauk pok meyaom. Ong Lưu Thanh Dũng caong khin Đảng, Karja daok patagok dom siam mekre nan dalam pacang cakak jit, ba mai sron mbon ka bhap bani:

Dahlak mboh Nyaom roya Đảng mbang ini rah tabiak dalam tuk jit Covid-19 rah tabiak khang ngak caung kandah tal dom taneh aia angaok dunya. Caong lac dom urang ngak praong di taneh aia patui jalan patagok dom siam mekre dalam pacang caga jit ruak, ba taneh aia drei yam tagok, cak rok patagok khang kajap. Khaol dahlak tuk halei jeng khang hatai jia.

Jak jeng dalam pacang caga jit, khik hu  cak rok patagok grap tanat gah kinh tế-xã hội ngak ka bhap bani jia tame jang jalan ba di Đảng. Ong Haji Ysa U mơ, Hamik Jam-ah Muwa Hidin, mBan lambaok urang Islam bal raya HCM brei thau, bhap bani Cam biak pachreih tui dom jalan ngak, dom sarak di Đảng saong Karja. Abih di nyu lac sarak bangsa hu peih ngak biak siam, daong ka mikva gah jien bac, daong ka gru pato sap sap bangsa...

Bhap bani caong lac dom urang pal akaok tuk halei jeng sangka tal bhap bani, patui jalan peih ngak sarak bangsa, piah cak rok patagok haong gauk. Bhap bani Cam di bal raya tuk halei jeng jia tame Nyaom roya 13 hu jak jeng siam mekre, dom urang pal akaok bahrau meda ngak siam bruk  di drei.

Jia lac bruk pal akaok ba jalan hadah hadai di Đảng hu ba taneh aia yam tapa kan kandah, kinh tế cak rok patagok dalam tuk jit ruak tamuh khang, bhap bani dom bangsa, agama di bal raya HCM pamaong tal nyaom roya Đảng pakat negar mbang ka 13 dalam bui sambai, chreih chrai. Hòa thượng Danh Lung, dang akaok baha  Chantarangsey, quận 3, TPHCM brei thau:

Yaom lac jit ruak saong daok hu dom tavak tavaiy min bhap bani drei jeng hu mbang tui dom jak jeng gah pato megru, ilamo – xã hội. Kayua yau nan ye, patui jalan di nyaom roya mbang 12, khaol dahlak jia lac mbang 13, Đảng meda palih ruah hu dom urang naih gheih, hu ilamu glaong, sahneng mboh atah, abih hatai brei ka bruk cak rok patagok di taneh aia, di bangsa, ba Đảng Cộng sản Việt Nam nao tal jak jeng bahrau.

Yau dom labik karei dalam taneh ia, bhap bani bal raya HCM khang hatai jia lac Nyaom roya Đảng mbang ka 13 meda patagok jang bruk gul pataom, sa hatung hatai haong gauk, ba tabiak dom jalan ngak njauk, jalan ngak bahrau, patui jalan ba taneh aia khang takai yam tagok glaong jang./.

Urang lang: Jasi -29/1