Dom harei puac bilan 10, kapul tuai labaih 100 urang lac dom y bác sỹ, urang pacang jit meng dom tỉnh ban mai pacang caga jit di TP.HCM, lac dom menuac camereip abih hu mbaok tame tour du lịch Củ Chi – Tây Ninh kayua Saigontourist peih tabiak. Hu mbaok dalam kapul, daok hu ong Nguyễn Văn Nên, UV Mintri Chính trị, Bí thư Thành uỷ TP.HCM haong dom urang pan akaok dom sở, ngành TP.

Bác sỹ Nguyễn Quang Minh, kapul ngak bruk di Sở Y tế Lai Châu tame daong ka TP.HCM jaik 3 bilan tapa khan lac: hadei di tukvak atah pacang jit glaih glar, ngan haong dom y bác sỹ, dom menuac mbang camereip nao tal Củ Chi atau Tây Ninh, ini lac bruk kan var hu:

“Mbang camereip abih dahlak hu tame ini, mboh biak mekre, biak praong, langik tasik hacih sa-at, biak bingi. Jeng caong TP.HCM hu siam mekre veik piah ka dom labik yau địa đạo Củ Chi, ceik Bà Đen hu yau dahlau veik piah bhap bini hu nao ravang me-in”.

Bác sĩ Hoàng Ngọc Cường, Sang iek ruak Quân y 175 daok brei thau lac: “Hadei di mbang jit atah, hu nao du lịch yau ini mboh biak drut drui, bui sambai hadei di mbang mesruh pacang jit suai lavik hu tukvak padeih padei. Dahlak mboh jalan du lịch yau ini biak gheih, tuai hu nao tal bhum palei cách mạng, gam hu mboh labik biak praong, mekre. Bo Củ Chi haong Tây Ninh biak jaik gauk, nan ye dahlak mboh lac peih tour yau ini biak lagaih”.

Tui gah peih tour lac Saigontourist, hadei di tuk peih tour camereip Củ Chi– Tây Ninh, Cty daok peih tour brei ka tuai di dom harei 29/10, 12/11, 26/11, yaom abih tour lac 979.000 đồng.  Tui jalan ngak lac khik kajap salamat, pabak catang bruk pacang caga jit, taong abih dom tuai dalam tour, urang ba jalan, urang peih radaih, menuac duh tuai di taong abih labik nao tal jeng brei klauk ginup 2 mbang vaccine pacang COVID-19, hu dut iek mboh âm tính, saong brei ngak tui 5 paka di Mintri Y tế. Ong Trần Quốc Bảo, Phaok TGĐ Cty Lữ hành Saigontourist brei thau: Danak dak ravang me-in hu peih ngak tui jalan pacang sre, tuai rilo meng hu ravang me-in dom labik du lịch langiu langik, atau dom labik sinh thái di Củ Chi– Tây Ninh: “Meng ini tal Tết, kol dahlak tui sarak di dom tỉnh, ban piah ngak. Tal labik halei hu bhum hijao ye Cty peih ngak di bhum nan. Urak ini bruk ngak nan dak harei dak rilo saong tuai damuai hadei di tukvak atah oh nao ravang me-in ye daok caong hu nao biak rilo”.

Gah du lịch hu maong lac “gaok kan kandah camereip abih, pasiam veik hadei di abih” kayua jit COVID-19. Meng jak jeng tuk camereip di tour du lịch angaok nan brei mboh dom siam lagaih ka pasaim veik bruk du lịch, rik daong jhul patagok dom bruk kinh tế - xã hội karei gam cakrok patagok./.

Urang lang: M.P-30/10/2021