Bal raya HCM hu labaih 228 ribau sang ngak mbang pablei salih kak je tui jalan khoán. Thun 2020, jien je mek tame di bal raya lac labaih 2 ribau 650 tỷ đồng. Dalam nan, sang kak je biar abih lac 540 ribau đồng sa thun, glaong abih labaih 2 tỷ 200 triệu đồng/thun. Tui Dự thảo di sarak ini, sang pablei salih dalam gah ngak nong, ngak glai, kaya ikan dalam aia, padang ngak, yaok thun hu jien mek tame meng 3 tỉ đồng tagok saong sang pablei salih hu jien mek tame meng 10 tỉ đồng sa thun tagok njauk khan brei thau ka jien je, oh njauk lac ngak tui jalan thuế khoán yau dahlau diah. Tui dom urang ilamu kinh tế, meyah ngak tui dự thảo ini, bal raya HCM tagok hu jien mek tame biak rilo meng dom baoh sang pablei salih dut haong dahlau diah. Kayua lac bal raya hu rilo baoh sang pablei salih hu jien mek tame yaok thun meng dom tỷ tal labaih pluh tỷ đồng, min jeng ngak tui jalan khoán jien je. Ong Phạm Trí Dũng, akaok duk pathau khan saong daong ba urang kak je Cục Thuế bal raya HCM brei thau:

  “Dom sang pablei salih ndom lac yaom kak je dom bruk ngak mbang daok glaong, meyah khaol drei tabiak yaom kak je ka nyu laghaih jang ye sang pablei salih khan brei thau mbuan laghaih jang, khan brei thau yaom jien mek tame ka nyu njauk ye jien je mek tame meda patom tame rilo jang”.

Bruk ngak tui jalan khan brei thau jien je ngan haong dom baoh sang pablei salih prong oh lac tok khik siam mekre dalam bruk pablei salih, plaih lahik jien mek tame kadung jien karja bo daok ngak brei patrun bruk dom baoh sang pablei salih nao blei hóa đơn daong ka bruk dauk kak je. Di bal raya HCM, baoh sang pablei salih prong njauk khan brei thau jien je pataom tame di dom baoh sang ngak mbang gah nhà hàng, khách sạn, kuan mbang menyum, karaoke, vũ trường… saong dom baoh sang pablei salih kaya nong, kaya ikan di dom baoh darak prong. Dahlau diah, dom jabat di bal raya jeng pamong tal dom baoh sang ini piah pandar khan brei thau jien je min oh ka ngak hu.

Thun 2017, tui bruk salih baoh sang pablei salih tagok jeng doanh nghiệp, bal raya hu padang kapul nao trun tapak taom gaok dom baoh sang pablei salih prong min biak takik baoh sang caong khin tagok doanh nghiệp. Yau ye di Quận 10, kapul tok jak ba hu 5 baoh sang pablei salih tagok doanh nghiệp min urak ini jeng jruh laik abih. Daok di darak Đầu mối Bình Điền, Quận 8 ye kapul oh jak ba hu baoh sang halei.

  Sa baoh sang pablei salih 7 kuan mbang di Quận 1, Quận 3, quận Bình Thạnh, yaok sa kuan hu dom pluh kapal mbang, melam mai bak tuai damuai mai mbang menyum, jien mek tame oh sit. Min tal harei ini, baoh sang pablei salih ini jeng ngak tui jalan khoán jien je. Sa-ai Ân, urang ngak harak gar ka baoh sang ini brei thau, kayua ngak tui jalan khoán jien je biak mbuan nan ye biak huac meyah salih tapa jalan khan brei thau jien je: 

“Meyah hadei ini hu salih tapa jalan khan brei thau jien je ye gah thuế njauk peih tal pato pathram piah ka khaol dahlak peih ngak ka nyu njauk, kayua lac urak ini oh thau khan yau habar ka nyu njauk saong huac taong phạt”.

Dom baoh sang pablei salih ndom lac, oh khin salih tapa ngak tui jan khan brei thau jien je kayua huac harak gar biak rilo,… Tui jabat kak je, bruk khan brei thau jien je oh cuang kandah yau bruk ngak harak gar di kế toán doanh nghiệp. Baoh sang pablei salih tok khan ka nyu njauk jien blei tame, jien pablei tabiak saong dom yaom jien karei dalam tukvak ngak tabiak, pablei salih. Bruk ini ye baoh sang pablei salih halei jeng hu tapuk vak yaom jien mek tame, yaom jien buh tabiak yaok harei. Kadha kan kandah di baoh sang pablei salih nan lac njauk hu hóa đơn blei tame, abih di nyu ngan haong dom nhà hàng, kuan mbang saong dom urang pablei salih di darak prong kayua lac kaya nong, pandap mbang bhian oh hu hóa đơn, oh hu ginup harak ba-ar.

   Biak di nyu, rilo sang pablei salih huac lac, meyah khan brei thau ginup abih yaom jien mek tame ye meda ngak brei patagok yaom jien je njauk kak. Kayua yau nan ye, rilo baoh sang pablei salih prong plaih njaik bruk khan brei thau jien je, khan oh njauk yaom jien mek tame piah oh njauk khan brei thau jien je. Kayua yau nan ye, gah jien je njauk hu sarak pachreih, ngak jeng pren khang piah ka baoh sang pablei salih prong khan brei thau yaom jien mek tame ginup abih.

Ong Nguyễn Hoàng Sơn, Yam ndok Cty dịch vụ Thuế saong kế toán Việt Tín, Phaok akaok klup kapul jien je bal raya HCM brei thau: Gah jien je njauk hu dom sarak pachreih urang blei pandar tuk blei pandap panda, pandar dịch vụ…njauk mek hóa đơn. Pagap yau, hóa đơn nan meda hu quay số njauk thưởng atau pataom điểm piah taduan mek sa paok pandap halei nan meng kadung jien karja. Taphia di nan, jabat je pandar dom baoh sang pablei salih njauk hu mac in harak kuhria jien ka urang blei, phần mềm ini njauk pambuak pagam haong jabat kak je:                             

  “Drei meda daong oh kak je, trun yaom kak je dalam tukvak akaok mereip piah ka dom sang pablei salih meng khoán je tapa  khan brei thau jien je piah ka dom baoh sang pablei salih ngak randap haong jalan ngak saong ngak randap haong bruk khan brei thau jien je. Baoh sang pablei salih mboh yaom jien je bahrau oh salih rilo dut haong dahlau diah ye lavik nao mboh randap saong salih tapa jalan khan brei thau jien je”.

Bruk kak je njauk, kak ginup oh lac plaih lahik jien mek tame kadung jien karja bo daok ngak brei samu gauk dalam bruk pablei salih, jhul bruk ngak mbang kinh tế cak rok patagok khang kajap. Piah peih ngak hu bruk ini, dom jabat karja njauk hu sarak pachreih siam, gam haong nan hu jalan taong phạt ka nyu khang dom bruk ngak suan./.

Urang lang: THUY SI  27/4/2021