Dalam vaktu 2021 - 2025, tui kuhria hu 15 kaha praong caong ngak ka pahu, dalam nan patagok GDP meng 6,5 - 7% saong tal thun 2025, GDP kuhria rah tapa tui akaok menuac hu 4.700 - 5.000 USD. Tui dom chuyên gia, thun 2021 lac thun hu makna biak praong, peih tabiak jalan siam ka vaktu 2021-2025. Kayua yau nan ye, njauk caik dahlau prein yava, jien padai piah patagok, ngak hu rilo jang dom bruk ba tabiak di thun 2021. Dalam nan jhul khang bruk buh jien tame ngak di karja, jeng daok hu kakei lac bruk dang akaok dalam dom jalan ngak samar drah daong pasiam veik kinh tế tuk jit Covid-19 daok rah tabiak srau kadau. Urang ilamu gah kinh tế, TS Võ Trí Thành ndom lac, njauk caik hatai sangka praong tal dom kadha meng gah lingiu pambak tame, yau ye dom kan kandah gah jien padai, bala meng langik tasik, jit ruak…

“Urak ini brei ngak bruk tui jalan yau daok mesruh, pacang caga brei samar, brei ngak catang saong samu gauk. Kol drei jeng brei sahneng tal dom sarak bahrau, patui bruk daong ka DN, ka bhap bini, urang ngak yam tapa kan kandah, brei pambuak haong salih bahrau jalan ngak, haong jalan patagok di dunya. Pagap yau bruk chuyển đổi số, jalan diukrai, jalan pandar cai, lagaih haong biến đổi khí hậu…”

Tui TS Nguyễn Đình Cung – dahlau daih dang akaok Viện roh duah khik ramik kinh tế Trung ương, khin pasiam veik kinh tế dalam tuk bruk caong blei pandar di dalam negar jeng yau lingiu taneh ia daok trun kayua jit ruak Covid-19, brei hu chip dom jalan ngak brei pachreih kinh tế khang kadang jang, cambaih laih saong siam lagaih jang piah pasiam patagok veik:

“Pachreih kinh tế ye sarak jien padai brei karei, abih di nyu lac sarak kak je brei karei, pandar cai di karja brei praong jang, sraiy karja salih karei.. Kol drei hu blaoh rilo danak dak karja buh jien tame ngak praong, ye njauk pataom tame nan. Dahlak jia lac, nan jalan piah hu siam jang phun jien negar lingiu buh tame, saong nyu pambuak pagam khang kadang jang DN dalam taneh ia haong doanh nghiệp FDI.”

Gam haong bruk patagok jalan peih brei siam phun jien karja buh tame dom danak dak hu cambaih, urang ilamu gah kinh tế, TS Lương Văn Khôi mboh lac njauk pataom tame dom danak dak bruk ngak di negar, abih di nyu lac danak dak “điện, jalan, sang bac, bilai iek ruak” di dom labik dalam bhum atah bayah, bhum ceik piah jhul patagok cơ sở hạ tầng pambuak haong an sinh xã hội:

“Bruk patagok tame dom danak dak bruk ngak di negar ini meda hu rilo siam lagaih, ka sa lac padang hu jala mbak biak siam ka bhum atah bayah piah patagok bruk pajeng ba, pablei salih pandap panda nao mai. Ka dua lac rahra hu jien tame saong tapa nan meda pachreih bruk blei pandar pandap ngak dalam taneh ia, jhul patagok bruk ngak tabiak pandap dalam taneh ia saong tui nan meda jhul patagok kinh tế.”

Tui TS Nguyễn Minh Phong, urang ilamu gah kinh tế, anak meta saong suai lavik, brei patui bruk buh jien tame paglaong ilamu menuac ngak, pataom tame chuyển đổi số. Jit ruak Covid-19 ngak ka darak pasar praong meng kan takik blei, atau oh blei, min jeng brei mboh jalan patagok dom gah karei, saong bruk salih bahrau công nghiệp 4.0 hu dom doanh nghiệp ba tame pandar hu siam lagaih:

“Piah lagaih haong tukvak bahrau ye bruk ramik veik saong patagok kinh tế di Việt Nam jeng yau DN njauk iek praong 2 kadha, nan lac patagok pablei salih điện tử, tagok bruk chuyển đổi số dalam bruk ngak di DN saong pataom tame patagok khang dom bruk pablei salih bahrau.”

Dom urang ilamu jeng hu ndom tal bruk iek praong darak pasar dalam taneh ia, maong ini lac jalan piah khik bruk ngak, pabak pandap saong blei pandar. Kadha ini hu brei mboh tapa bruk rah tabiak di jit ruak Covid-19, jeng yau khik ka patagok khang kajap dalam tuk bruk meriak gauk dak harei dak catang./.

Urang lang: M.Phương - 31/12/2020