Danak dak padang ngak jalan cao tốc Trung Lương- Mỹ Thuận atah labaih 51 km, nao tapa tỉnh Tiền Giang mbiah tal ini jaik salah blaoh. Tui kuhria tal tết thun ini, meda brei peih radaih. Ong Lê Văn Ý, Phaok Akok UB bhap bini huyện Cái Bè, tỉnh Tiền Giang khan lac, jalan cao tốc Trung Lương- Mỹ Thuận saong tatua Mỹ Thuận 2 tapa huyện, meda ngak brei patagok gah jalan mbak nao mai, jhul patagok kinh te – xa hoi dalam tỉnh jeng yau dalam bhum cak rok patagok jang:

“Jalan cao tốc saong tatua Mỹ Thuận 2, lac  biak lagaih ka tỉnh cak rok patagok. Oh lac cakrok dalam tỉnh Tiền Giang saoh bo daok hu patagok ka dom tỉnh karei. Jalan cao tốc Trung Lương- Mỹ Thuận tal urak ini meda lac salah paje, daok jalan peih tagok tatua Mỹ Thuận 2 jeng hu ngak salah blaoh piah jao taneh urang daok ngak piah pambuak  dom bhum.”

Langiu dom jalan roya, jalan dalam tỉnh, jalan plaih, bhum Taneran kraong Cuu Long daok hu rilo jalan cao tốc hu ngak bloh saong daok padang ngak, dui katut panak hu jalan atah, abih takik tukvak nao mai. Dahlau diah, peih radaih ô tô meng Cần Thơ  nao Kiên Giang abih 1 mong meteh. Urak ini,tuk jalan cao tốc Lộ Tẻ - Rạch Sỏi ba tame pandar ye tukvak peih radaih meng Cần Thơ - Kiên Giang daok labaih 50 minit. Daok jalan roya 1 meng Tiền Giang nao Ban raya HCM  dahlau diah abih labaih 1 mong meteh, min urak ini jalan cao tốc Trung Lương- Ban HCM tok lahik abih 30 minit.

Daok jalan kapal haok, dalam bhum Taneran kraong Cuu Long hu ngak salah bruk buh jien tame ngak, pasiam pakhang dom labik mblang kapal haok dalam bhum nan lac Cần Thơ, Phú Quốc, Cà Mau, Rạch Giá, yaok thun taduan hu 7,4 trieu tuai damuai saong 12 ribau tấn pandap panda.

Dalam bhum urak ini hu labaih 6.100km jalan kraong. Dalam nan, jalan kraong Chợ Gạo pambuak meng kraong Tiền tal kraong Vàm Cỏ di tỉnh Tiền Giang lac jalan praong di bhum pambuak haong Ban raya HCM. Oh lac dom jalan praong bo dom jalan nao mai dalam palei pala jeng hu buh jien tame ngak, dak harei dak siam. Ong Võ Văn Thượng, urang daok di xã An Thái Trung, huyện Cái Bè, tỉnh Tiền Giang bui sambai lac:

“Di tỉnh Tiền Giang urak ini jalan mbak, tatua biak laneng lanoi. Meyah pala hu baoh kayau bo oh hu tatua, jalan praong ye bhap bini oh khin pala phun hagait. Urak ini, urang pala phun panat samar tabiak baoh, brei rilo baoh, drei pajeng nao pablei biak mbuan. Mong mboh dom jalan mbak dalam palei pala di tỉnh Tiền Giang radaih tải tame blei padai pajeng tabiak biak mbuan.”

Tui ong Lê Đỗ Mười, Akok Viện Chiến lược saong cak rok patagok jalan mbak pajeng ba – Mentri jalan mbak pajeng ba, bruk pambuak bhum Đông Nam bộ saong Tây Nam bộ urak ini lac labik gar jalan. Meyah jalan cao tốc meng Ban raya HCM tal Cà Mau hu ngak salah blaoh di thun 2030 meda pachreih urang buh jien tame ngak mbang di bhum:

  “Meyah peih jalan meng Ban HCM tal Cà Mau di thun 2030 ye lac bruk cak rok patagok  biak praong di bhum. Abih di nyu lac, yaok mbang lễ Tết khol drei maong mboh dom bruk gar radaih di dom tatua praong yau tatua Mỹ Thuận, Rạch Miễu. Tal thun 2025 meda salih karei abih, saong yau nan meda dui pachreih hu taong abih dom urang buh jien tame ngak mbang piah cak rok patagok.”

  Di Nyaom biai taong yaom Quy hoạch Bhum taneran karaong Cửu Long vaktu 2021-2030, pamaong tal thun 2050 rah tabiak birau ini, Phó Thủ tướng Lê Văn Thành lac, meng ini tal thun 2030, dom jalan mbak di Bhum taneran karaong Cửu Long meda salih birau rilo, patagok biak rilo piah ba bhum taneh bak prein khang ini cak rok patagok gam hoang taneh ia.

Meng bruk sangka di Đảng, Karja, Rajaei, dom mentri, dom gah di pakat negar, bruk kham merat di karaj saong bhap bini Bhum taneran karaong Cửu Long hu ngak pasiam jalan mbak sumu gauk, pambuak bhum, rilo bhum. Jia lac, jalan mbak cakrok lac prein khang jhul kinh te – xa hoi di bhum ini oh padeih tagok glaong, ba drei tame bruk cak rok patagok di taneh ia./.

 Urang lang: Ai Nghiem -4/1/2022