Rilo Miuyim daok peih ngak danak dak pandar công nghệ số hóa labik inem krung

Tỉnh Thái Nguyên hu thau tal lac pambah mbang tame tabiak, nao mai, taom gaok bruk ngak mbang kinh tế xã hội di bhum trung du bhum ciek haong bhum taneran Bắc Bộ, saong hu tal 46 bangsa adei saai daok diukrai haong gauk. Bruk nan jeng hu makna lac, Thái Nguyên hu dom inem krung ilamo meng kan biak praong saong biak rilo janih.

Di Miuyim tỉnh Thái Nguyên, tukvak ini, dom bruk công nghệ karei di gauk yau ye đồ họa 3D, số hóa dữ liệu pandap panda daok dak harei dak salih ka bruk rami ramik meng kan, ngan haong labaih 32.000 pandap panda daok hu khik ramik di pak ini. Amuk Lương Thị Duyên, Phaok Yam ndok miuyim brei thau: “Ni lac bruk biak njauk ngak, daong ka miuyim hu lagaih piah yaih khan tal tuai rivang iek dom sưu tập bo urak ini miuyim daok khik. Saong jeng daong mbuan lagaih dalam bruk duah thau, yaih khan tal rilo manuac sia.”

Tui saai Nguyễn Thị Trang, akaok jabat Ilamo – Brei thau huyện Phú Bình, meng sa hệ thống hu biak rilo dom inem krung, huyện daok jhuk khang bruk pandar công nghệ số dalam khik ramik inem krung. Tapa nan, dom inem krung hu yaih  khan biak samar drah, oh njauk pacang meneing ka tukvak, labik saong sap ndom panuac puac: “Dalam jalan salih số pambuak tal gah ilamo, Ủy ban huyện thau lac pataom tame salih số dalam gah inem krung saong brei ngak dahlau abih dalam bruk salih số duh ka inem krung pakat negar piah ka tuai haong sahabat dalam taneh ia saong di dunya thei jeng thau tal.”

Urak ini dalam tỉnh Thái Nguyên hu labaih 800 inem krung, labik mekre dane angan, labaih 500 inem krung oh mboh di mata, dalam nan hu 17 inem krung di bhap bini bangsa takik hu pok brei angan lac inem krung oh mboh di meta pakat negar, gam haong yaok ribau pandap panda hu khik piah. Piah paglaong siam mekre bruk khik ramik saong yaih khan, gah ilamo, thể thao saong du lịch jeng ba tabiak jalan ngak cambaih laih piah samar ngak salah bruk pandar công nghệ số, rik tame bruk khik ramik, patagok yaom glaong inem krung ilamo di dalam tinh.

Ong Hà Việt Quân, Chánh văn phòng Điều phối danak dak bruk ngak negar cak rok patagok kinh tế xã hội bhum bangsa takik saong bhum ciek brei thau, danak dak ka 6 hu 19 asal kadha ngan haong yaom jien buh tame ngak abih tih  labaih 5.900 tỷ đồng. Ni lac mbang camriep hu sa danak dak praong yau nan brei ka gah ilamo bangsa. Dom bruk ngak cambaih laih dalam danak dak jeng pamaong tal bruk paglaong raidiuk, mbang ngui, daok dang, khik ramik saong patagok dom ilamu hadah krah, peih ngak dom rija roya saong abih di nyu nan lac số hóa inem krung: “Số hóa dom drap ar inem krung ilamo, akaok Mintri, akaok Ủy ban bangsa hu pato tacei ka bruk roh duah salih số. Taphia di nan, njauk roh duah, pambuak haong Mintri ilamo, dom Mintri, dom gah pambuak tal saong abih di nyu nan lac dom tinh, bal, bhap bini dom bangsa takik padang hu tui jalan bảo tàng số, piah patagok saong yaih khan dom yaom glaong ilamo meng kan bangsa takik. Miuyim cơ sở dữ liệu jeng duh ka bruk patagok kinh tế xã hội tapa dom bruk du lịch, rivang main.”

Bruk số hóa inem krung ilamo bangsa takik hu makna biak praong ngan haong bruk khik ramik, ngak pasiam, roh duah saong patagok yaom glaong dom inem krung ilamo maong mboh saong oh maong mboh di meta meng công nghệ số. Ini jeng lac talei pambuak dom rai veik dalam bruk khik ramik inem krung di ong kaok ong kei drei./.

Urang lang: Thu Thao - 20/12