Palei Tân Hải, xã Long Hải lac labik kurang aia khang abih di pulao Phú Quý. Jaik abih bhap bani pak ini pandar aia hacih di sang mac máy aia Long Hải. Min 6 bilan tapa, sang mac tok ngak cầm chừng, bhap bani glaih glar medeih melam piah pataom mek yaok kanjaoh aia, khik piah pandar tapa harei. Medeih melam mong cang, min oh njauk lac tuk halei jeng hu aia. Sa-ai Trần Thị Biếc daok pak palei Tân Hải, xã Long Hải duh hatai lac:

Tijhuh dalipal melam atau pak lime melam meng hu,  daok cang peih aia tal sa atau dua tuk melam. Glah glar ralo. Hu melam medeih tal dah oh hu kanjaoh aia halei.)

Ralo labik karei angaok pulao Phú Quý jeng kurang aia pandar biak khang, yau palei Phú An (xã Ngũ Phụng), palei Triều Dương (xã Tam Thanh)… Ia saong mac nyu kurang, nan ye oh bơm njuk tal dom labik ini. Dom baoh bingun jeng thu abih. Piah hu aia pandar, bhap bani njauk nao blei meng dom sruh radaih tư nhân, yaok mét khối aia yaom meng 50 tal 60 ribau đồng. Ong Dương Văn Minh ngak nghề katung dui ghe gilai, urak ini ngak gam bruk pajeng aia piah pablei di xã Long Hải brei thau:

Radaih ini dahlak blei piah katung ghe. Min dalam tuk kurang aia, mikva caong hu ia nan ye dahlak pambuak tẹc tagok pajeng aia pablei ka mikva. Sa thùng 1.000 lít yaom 60.000 đồng. Pak ini kurang aia biak ralo.)

Angaok pulao Phú Quý hu dua sang mac aia pandar nan lac Ngũ Phụng saong Long Hải, hu công suất abih tih 2.200 khối sa harei melam. Tuk hu ia, 2 sang mac hu 1.500 mét khối sa harei melam, min kayua kurang aia njar, bruk pabak ia pandar trun khang. 5 dalam 11 baoh bingun khoan ba aia tamo ka cụm sang mac aia Phú Quý daok njaom mbak, oh pandar hu. Abih tih công suất ba aia angaok pulao urak ini tok daok 680 mét khối sa harei melam. Kayua yau nan ye, dom labik daok atah sang mac meda lac oh hu aia piah pandar. Ia hu mek meng dom baoh bingun labik dhaong jeng oh ginup parabha ka dom labik njuak tua riya pandiak bhang trak... 

Anak bruk yau nan, Cụm pabak aia pulao Phú Quý gam haong Pasak aia hacih saong Vệ sinh môi trường palei pala tỉnh Bình Thuận daok kuhria jalan ba aia tạm thời ka bhap bani. Ong Tạ Văn Huyền, Akaok Cụm pabak aia ka pulao Phú Quý brei thau:

Puac bilan 6 ini, Pasak aia hacih di tỉnh meda tabiak Phú Quý pasang iek veik piah kuhria kuac dom labik bahrau piah pabak aia ka bhap bani. Bruk ngak ini jeng brei hu jien, nan ye hadei di tuk pasang iek blaoh meda likau jien di Ủy ban Bhap bani tỉnh piah ngak.)    

    Anak bruk langik tasik dak harei dak salih karei oh thau dahlau, piah khik hu aia pandar ka labaih 27.000 menuac angaok pulao, karja huyện, puk palei hu ba tabiak ralo jalan ngak praong piah khik caga aia njar. Ong Tạ Minh Nhựt, Phaok Akaok Ủy ban Bhap bani huyện pulao Phú Quý lac:

       Huyện hu dom jalan ngak nan lac jak ba bhap bani ngak bingun, lubang padang aia hajan. Bahrau ini, Raja-ei jeng sangka brei jien piah ngak 2 kavei padang aia gah Barak piah pabak aia njar dalam dom thun anak tal. Taphia di nan khaol dahlak daok jak ba bhap bani pala rilo phun hijao piah khik caga ia njar

  Piah khik iek catang ia njar, ralo thun tapa, huyện pulao Phú Quý hu tabiak adat oh brei bhap bani khoan bingun mek aia. Bruk pandar siam halau aia hu makna biak prong nan ye bhap bani angaok pulao hu ngak siam bruk ini. Min anak bruk langik tasik kan si thau dahlau, biak caong hu dom jalan ngak samu gauk piah khik ginup aia pandar yaok harei ka bhap bani angaok pulao./.