Meng harei hu khan brei thau bruk peih prong jalan D6 Labik daok Nam Long, phường Tân Thuận Đông, quận 7, TPHCM,  meng 2m tagok 24m mbiah tal tuk peih ngak, dom baoh sang pak ini thei jeng bui sambai, caong maong yaok harei. Harei halei jeng tabiak jalan D6 piah mong iek jalan ngak tal halei paje. Ong Nguyễn Văn Thịnh brei thau: “Dahlau diah, jalan tok ginup ka 2 sruh radaih mac plaih gauk. Bilan hajan, aia tame sang dauk yaok mét, nan ye dahlau di tuk tame bilan hajan khaol dahlak brei dak pandap panda dalam sang tagok biak glaong. Urak ini jalan hu peih prong, khaol dahlak jeng pasiam veik sang danaok, bilan hajan mai oh daok huac aia dauk, thei jeng bui sambai”. 

Tui ong Võ Khắc Thái, Bí thư Quận ủy quận 7, dalam quận hu 1.980 jalan sit, dalam nan 414 jalan sit manuac nao mai rilo saong 1.566 jalan sit katut, panak. Dalam nan hu 198 jalan sit hu menuac nao mai rilo praong oh ka tal 3m, caong khin hu peih prong tagok takik di abih 4m. 

Meng akaok vaktu 2020-2025, Quận ủy quận 7 thau lac pasiam veik, paglaong rai diuk di bhap bani nan lac jalan ngak prong dang akaok di quận. Jalan mbak nao mai dalam dom labik daok di bhap bini lac bruk biak praong, pambuak pagam haong bhap bani yaok harei. Meyah hu jalan prong, bhap bani mboh sahanang hatai kayua laghaih ka bruk nao mai, bo daok siam ka bruk pacang caga apui khuah, patrun bruk glaong biar gah jalan mbak nao mai di labik daok klak saong labik daok bahrau, daong cak rok patagok dom bruk ngak mbang pablei salih, brei pah mblang taneh piah hu jien mek tame ka bhap bani. Kayua yau nan ye, Quận ủy hu tabiak Sarak akaok mereip di nhiệm kỳ - Sarak 01-NQ/QU ka bruk jak ba bhap bani alin hadiah taneh piah peih prong jalan sit, vaktu 2020-2025.

Quận 3 jeng ngak salah blaoh bruk pathau khan, jak ba bhap bani alin hadiah taneh piah peih prong jalan sit. Gah UB bhap bani quận daok kuria caga  dom jala ngak ka harei nyaom peih prong samu gauk 6 jalan sit. Ini jeng lac sa dalam dom danak dak peih ngak Sarak Nyaom roya Đảng bộ quận 3. 

Jalan sit 694/33 Nguyễn Kiệm-quận Phú Nhuận nan lac sa dalam 6 bruk ngak peih prong jalan sit hu quận Phú Nhuận ba tame pandar akaok thun 2021. Tui jalan ngak lac bhap bani alin brei taneh, Karja buh jien ngak jalan, 27 baoh sang halar hatian alin hadiah 110m2 taneh. Meng hu yau nan, jalan sit  694/33 Nguyễn Kiệm hu peih prong tagok 4,5m, urak ini praong siam jang dahlau.

Tui ong Nguyễn Đông Tùng, Akaok UB bhap bani quận Phú Nhuận, dalam quận hu labaih 1.900 jalan sit saong jalan katu panak sit sot, oh ka pabak hu bruk nao mai, bruk pacang khuah padam khuah saong mbaok meta gheih ghang bal raya. Nyaom roya Đảng bộ quận Phú Nhuận vaktu 2020-2025 tacei lac, pasiam veik đô thị lac bruk ngak prong, dalam nan patui veik jak ba bhap bani alin hadiah taneh peih prong jalan sit hu siam mekre jang.

Yau nan min, anak meta mboh lac, rilo labik jeng biak glaih glar dalam bruk jak ba bhap bani alin brei taneh piah peih prong jalan sit. Hu labik, jalan sit oh atah min abih labaih 10 thun meng peih prong hu. Dalam tuk nan, di quận 7, hatai pachreih tui di bhap bani daok biak khang. Tui ong Võ Khắc Thái, hadei di harei jak ba bhap bani alin brei taneh peih prong jalan sit hu quận peih ngak dalam bilan 3 meng blaoh, bhap bani biak bui sambai. Rilo urang halar hatian brei taneh saong daok daong jien piah peih prong jalan sit tagok jeng 4m, hu labik peih prong tagok 5 - 6m. Bruk njauk biai nan lac, hu jalan sit, bhap bani rik daong taong abih jien ndo piah pasiam veik, piah peih prong jalan.

Tui bruk ba tabiak dalam thun 2021, quận 7 meda peih prong 10 jalan prong, jalan sit, min urak ini quận hu ginup pren piah peih ngak 17 jalan saong padang ngak bahrau 6 mbaik tatua salih ka dom tatua klak dalam labik dom labik daok di bhap bini. Meng bruk ngak hu yau nan, quận 7 daok tagok angan saong jalan ngak cambaih laih ka bruk peih prong saong pasiam 50 jalan prong, jalan sit dalam nhiệm kỳ ini./.

Urang lang: Jasi -28/5/2021