Dom urang taong ikan di bhum tasik Bình Thuận saong bhian vaih tame pabah lamnge Phan Rí Cửa brei thau, yaok thun ia sua ba tui phù sa, taneh cuah pataom pambuk ngak ka jalan nduac gilai meng pabah tasik tame pabah lamnge nyu kaoh tagok saong dak harei dak sit. Gilai sit tame tabiak pabah lamnge lac kan, gilai taong mek ikan atah meng 15 mét tagok dak kan jang.

Ong Trần Văn Đức, po 2 gilai taong ikan di tasik atah brei thau, gilai di ong  brei cang aia tasik tagok, dut iek jalan, cang aia ndik prong. Urang taong ikan di palei bhian randap haong jalan nduac gilai daok plaih hu, dom sruh gilai langiu tỉnh oh thau cambaih ye mbuan njauk kaoh, khut takai ada: “Tame tabiak kan kandah, gaok tuk mai gilai jeng njauk kaoh. Gilai sit bo njauk kaoh jeng kan tame, daok dom sruh gilai prong atah labaih 15 mét ye cang aia ndik prong meng tame hu, blaoh samar nduac tabiak chip nan ye bruk pajeng ba biak kan kandah.”

Oh lac tok hu jalan nduac gilai njauk pataom pambuk, dom gheng menyek gom  tín hiệu langiu pabah lamnge jeng khut meng lavik mai. Urang taong ikan rilo mbang khan brei thau min oh ka mboh jabat halei pasiam veik. Ong Phạm Bình, po gilai Bth 95572TS pandik hatai lac: “Likau blei dom baoh gom chớp langiu pabah tasik meng dom thun ini mai, Yam ndok pabah lamnge pagon sanya miat, urang taong ikan khaol dahlak rik jien piah blei gom menyek, adei sa-ai jeng rik pataom jien ngak hu 6 gheng piah kak gilai.”

Urak ini daok tame tabung glaong bilan ikan Nam, labik taong cap siam lagaih, urang taong mek hu rilo, min kayua jalan nduac gilai kaoh nan ye tok hu dom sruh gilai sit tame pabah lamnge Phan Rí Cửa. Ong Huỳnh Công Anh – Yam ndok Mban khik iek pabah lamnge Phan Rí Cửa brei thau, kayua kan tame tabiak pabah lamnge nan ye rilo sruh gilai prong di urang taong ikan huyện Tuy Phong njauk tame pabah lamnge Phan Thiết atau pabah lamnge di Bà Rịa- Vũng Tàu piah pablei ikan. Meyah caong khin nao tame Phan Rí Cửa ye njauk parabha pandap tagok dom sruh ghe, gilai sit jang piah pajeng meng kreh kraong tame pabah lamnge. Bruk ini ngak tagok jien ndo ka dom po gilai, taphia di nan, daok ngak kan kandah ka dom labik pablei salih dịch vụ hậu cần bruk ngak ikan: “Kayua rilo sruh gilai nao tame pabah lamnge oh hu, njauk nao duah dom pabah lamnge karei nan ye dom kaya ikan jeng parabha tui. Kayua yau nan ye, bruk yaok pataom sản lượng kaya ikan tagok pabah lamnge jeng suan biak rilo.”

Pabah lamnge Phan Rí Cửa hu padang ngak lac pabah lamnge janih II, hu pren pataom mek pandap 26.000 tấn sa thun; jalan nduac gilai tame pabah lamnge lac 20m saong dalam 4m; labik pataok gilai dalam 4m, gilai ikan atah 24m meda nao tame pabah lamnge hu. Di pabah lamnge hu dịch vụ bruk ngak ikan, dịch vụ pandap blei pandap panda kaya mbang menyum, kho khik la-ar…

Sở Ngak nong saong patagok palei pala hu pasang iek jalan nduac gilai saong ba tabiak jalan ngak ba tagok UBND tỉnh Bình Thuận brei ngak danak dak kuac kuah jalan nduac gilai Labik pataok gilai plaih njaik ribuk di pabah lamnge Phan Rí Cửa, huyện Tuy Phong dalam thun 2010. Danak dak ini hu jao ka Công ty TNHH khoáng sản Thiên Thiên Tường peih ngak tui jalan xã hội hoá. Tal urak ini, Bình Thuận hu 3 mbang ramik veik jalan ngak, jaik di abih lac di harei 27/5/2021, hu peih bruk kuah kuac samar drah jalan nduac gilai di pabah lamnge saong labik aia anak pabah lamnge Phan Rí Cửa, min bruk kuac kuah oh yau hatai caong khin. Ong Nguyễn Văn Chiến, Phaok akaok Sở Ngak nong saong patagok palei pala Bình Thuận brei thau: “Bruk kuac kuah pambuak haong bruk pataom mek cuah haluk. Doanh nghiệp kinh doanh ye pablei hu, min tui dahlak saneng njauk gaok kan kandah dalam bruk pablei cuah nan ye meng blaoh hu peih ngak min ngak klaih klaoh.”

Bruk pataom pambuk cuah di jalan nduac gilai, neriak tachuak alam môi trường oh lac tok rah tabiak di pabah lamnge Phan Rí Cửa. Piah palaghaih ka ghe gilai tame tabiak pabah lamnge pablei pandap panda kaya ikan, UBND tỉnh Bình Thuận njauk samar pasang iek saong hu jalan ngak piah kuac kuah dom jalan nduac gilai, abih di nyu lac tuk bilan ribuk daok mai jaik./.

Urang lang: Jasi -26/10/2021