Jayak di Cách mạng bilan 8 thun 1945 brei mboh cambaih di abih hatai jia di bhap bani ngan haong bruk pan akaok ba jalan di Đảng. Ngan haong yaok urang Việt Nam, meng hu hatai jia lac jayak nan ye oh huac metai lihik, rambah rambup piah nao tui jalan cách mạng bo Đảng hu tacei tabiak.  Tukvak pahadar 70 thun Cách mạng bilan 8  jayak, urang vak di rayo sap ndom Viet Nam hu kadha vak “Jayak Cách mạng bilan 8  - tuk hatai  bhap bani tui Đảng”. 

Hadhar veik tukvak dakrai sajarah atah di ini 70 thun, yaom lac umo taha, pren yava takik min ong Phương Đình Thu daok pak Hà Nội jeng daok mboh chreih chrai di urang likei umo bahrau 16 thun hu nao tui cách mạng saong ngak bruk abih hatai tukvak dahlau khởi nghĩa dalam kapul dam dara cứu quốc Thành Hoàng Diệu tuk nan. Og Thu brei thau, ngak cách mạng nan lac oh huac metai lihik, rambah  rambup, cang maong jayak di cách mạng, jayak nan meda lac 5 thun, atau 10 thun. Ngan haong ong, rup binguk bhap bani Hà Nội meng dalam saong langiu bal, dalam nan hu gam lin bảo an, cảnh sát di raja-ei bù nhìn ba gauk dang tagok, tui cách mạng miat miat daok sarak dalam akaok sahneng: “Yaom lac biak rambah rambup, meda njauk kaol khamang nyu mek, nyu pametai. Tuk nan, daok yaok pluh ribau lin Nhật ginup abih phao ndao, min jalan ngak di drei njauk,  khik oh ndom hagait piah drei ngak cách mạng. Tukvak nan hào hùng ralo, oh thei saneng tal rup drei, urang nao tui cách mạng, halar hatian ngak dom bruk di cách mạng. Tuk nan, dahlak tame thanh niên cứu quốc di Việt Minh, nao palaik truyền đơn, palai bruk mittinh trun jalan di kaol Đại Việt. Pataom hu hadom pluh ribau bhap bani,  thei jeng tui, yaom lac dam dara oh hu ralo, oh hu phao ndao.”

Ong Dương Trung Quốc, urang roh duah sajarah brei thau, harei 19/8/1945, bruk dang tagok tổng khởi nghĩa di Hà Nội hu jayak, nyu peih tabiak jalan ka khởi nghĩa dalam taneh ia mek hu jayak. Jayak nan oh lac peih tabiak sa kỷ nguyên bahrau ka bangsa Việt Nam, bo daok brei mboh pren khang di bruk jum pataom abih bangsa Việt Nam. Bo dahlau di abih nan lac hatai jia khang kajap ala hala dok độc lập, peih paha bangsa bo Đảng saong Chủ tịch Hồ Chí Minh hu palih ruah, pataom hu dom urang ranam taneh aia meng dom gah, dom kapul nyom, oh lac bangsa halei, agama halei, giai tầng halei dalam xã hội: “Meng bruk dang tagok tổng khởi nghĩa Hà Nội, khaol drei mboh lac dalam sa adit ye Huế, Bei Gon saong grauk labik dalam negar meblah hu karja. Brei mboh hatai yau gauk, lực lượng daok caga blaoh, bruk pal akaok ba jalan samar drah dalam negar atah, dalam tuk jalan mbak nao mai, thông tin liên lạc biak kan kandah min hu ba gauk dang tagok. Brei mboh hatai khang di bhap bani saong bruk pal akaok ba jalan di mặt trận Việt Minh. Bloh meng bruk cách mạng bilan 8 jeng hu sự kiện 2/9, Chủ tịch Hồ Chí Minh tabiak panuac độc lập, dak padang nền dân chủ cộng hòa, meng pren khang negar độc lập nan, patui veik dom mbang mesruh metak khik ramik palei negar khik caga jak jeng di cách mạng bilan 8”.

Giáo sư, Tiến sỹ Mạch Quang Thắng, Học viện Chính trị quốc gia Hồ Chí Minh mboh lac, canah jalan 30 thun salih bahrau, taneh aia drei mek hu ralo jak jeng prong hu yaom glaong sajarah, min jeng dang anak ralo cuang kandah oh sit. Nan lac cuang kandah meng mbaok gah likuk di kinh tế thị trường, bruk tham nhũng, palai pajua, bruk suy thoái akaok saneng, jalan diuk rai di oh takik urang jakar, urang đảng...“Cách mạng bilan 8 jayak nan lac bhap bani grauk labik brok tagok. Urak ini, pren khang di Đảng jeng khin hu bruk gul pataom bangsa. Dalam tuk dân chủ hu patagok, ilamu công nghệ hu patagok, nan ye, njauk salih jalan khik ramik, pal akaok. Ngak habar piah ka bhap bani thau hu trách nhiệm công dân du drei piah pataom pren. Ngak habar pacang hu tiêu cực dalam Đảng saong karja, nan lac pren pacang prong dalam bruk pataom abih bhap bani. Hu oh takik urang jakar, urang đảng suy thoái nan lac bruk cagar veik jak jeng di cách mạng bilan 8”.

70 thun nao tapa, jayak di Cách mạng bilan 8 ngan haong bruk tự hào di bhap bani Việt Nam hu brei mboh glaong di abih hatai jia di bhap bani ngan haong Đảng, jeng kadha piah bac megru meng lý luận tal thực tiễn dalam tukvak urak ini./.