Jeng tỷ phú kayua pandar cong nghe di raong glang pabui

           Lac sa dalam 4 sang urang nong hu mbaok dalam nyaom roya pakacah gauk anit taneh ia Kapul urang nong VN barau ini, ông Trịnh Duy Tân, daok di xã Kim Mỹ, huyện Kim Sơn hu khan brei thau ilamu yam tagok jeng tỷ phú meng pandar công nghệ dalam bruk raong pabui. Kadha vak di urang vak Kim Khanh yaih khan ka kreih camin ini, daa mikva saong grauk yut tui pang :

Peih bruk padang ngak trang trại raong pabui meng thun 2010  ngan saong 20 drei pabui binai, tal urak ini, ông Tân hu trang trại praong 2.500m2 saong 100 drei pabui binai, menek yaok mbang meng 700 tal 1.000 drei pabui pajaih saong pabui rilo. Yaok thun ong pablei tabiak darak pasar meng 170 tal 200 tấn pabui rilo, yaom pablei tuk halei jeng glaong jang duk saong dom trang trại karei meng 3.000 tal 7.000 đồng/ sa kg, jien mek tame hu meng 3 tal 5 tỷ đồng/sa thun. 

Piah ngak hu yau ini,  ông Tân khang hatai pandar công nghệ dalam raong glang, buh jien tame padang trại pabui yaok tỷ đồng. Meng dây chuyền máng mbang tự động, yaok harei, ong tok tuh haleik sa mbang, hu tuk 2 harei meng tuh tabiak, oh cang menuac pasang iek. Tapol pabui mbang tal halei haleik nduac tabiak tal nan, tuk halei pabui mbang trei tabiak truh máng mbang, hệ thống eng drei nyu padheih tuh haleik, biak lagaih, patrun jien buh tame, patakik  urang ngak. Ông Trịnh Duy Tân lac :  Raong glang njauk hu rilo phun jien. Kol dahlak jeng gaok rilo kan kandah, sa lac gaok kateik yaom blei tame, dua lac kateik yaom pablei tabiak. Barau blaoh, kapul urang nong tỉnh hu daong yaok urang 50 triệu đồng. Dahlau meda nyaom mikva veik, khan brei ka mikva thau alamu raong glang, daong jien ka mikva trun takik jien buh tame, paglaong jien mek tame ka mikva. Taphia nan, jak ba mikva pablei pabui aval piah mesraiy jien nan daong dom urang  caga pablei pabui min oh ka hu jien blei haleik. Urang ini daong urang thiah gam ngak kaya meda” 

Ông Đinh Hồng Thái, akaok kapul urang nong tỉnh Ninh Bình brei thau, ông Trịnh Duy Tân lac urang nong tabiak meng sang kathaot, tui công giáo. Ông jak ba dom urang dalam sang, dalam palei ba gauk patagok kinh tế. Tuk tabiak truh kathaot, urak ini jeng sang kaya meda, ong padang hợp tác xã raong glang Tân Tiến ngan saong 28 urang. Urak ini Hợp tác xã di ông Tân lac sa dalam dom kreih camin hadah ka bruk patagok kinh tế tập thể. Taong abih dom urang nong dalam kapul jeng njauk gauk, daong gauk; pabak pandap mbang raong glang, pajaih, jru thú y, eik glang jeng ye pacang caga ruak ka pabui saong kuhria labik pablei pabui rilo, pabui binai “Ông Tân jeng lac kreih camin hadah ka mikva dalam palei ba gauk patrun kathaot, ngak kaya meda, hu mbaok tame bruk di Kapul. Kol dahlak caong lac bruk raong glang yau  ông Tân daok hu per praong dalam tỉnh”.

Oh lac kuhria ngak kaya meda, ông Tân daok sangka tal bruk alam moi truong. Hadei di tuk bac megru dom trang trại dalam saong langiu tỉnh, ông padang ngak dom bể, pandar khí thải ngak biogas piah ngak mbang ngak huak yaok harei. Meng bruk pandar công nghệ ini, ông Tân oh lac patak pataom hu jien blei gas bo daok khik ka var raong tuk halei jeng hacih mùi, tapol pabui praong samal, oh ruak kik. Ông Tân jia lac, meng bruk ngak kaya meda di ông, dom urang tame hợp tác xã di ông dak harei dak rilo jang saong anak tal, palei ong hu rilo tỷ phú yau ông.