Thun 2021 ini, sang sa-ai A Thá saong sa-ai Y Éo daok di palei Pêng Lang, xã tapen negar Đăk Blô, huyện Đăk Glei, tỉnh Kon Tum hu tabiak truh kan kathaot. Sa-ai Y Éo bui sambai brei thau, hu yau nan meng hu bruk daong ba biak prong di Đại úy Hoàng Văn Hiệp, akaok Kapul Jak ba bhap bani haong urang jakar, urang lin Đồn Biên phòng Đăk Blô hu pambuak talei rohim haong sang, abih hatai tacei pato jalan ngak mbang patagok kinh tế, iek glang ka anek bhik bac da-a:

“Đồn Biên phòng Đăk Blô, urang jakar Đồn lac cei Hiệp tacei pato ka sang jalan ngak mbang patagok kinh tế. Pagap yau bruk pala phun sâm talei atau pala phun bei plom, daong ka dua diuk pasang raong pabui piah ngak kinh tế. Sang jeng bui sambai raong hu anek bhik bac da-a, sang danaok hu padang ngak khang kajap”.  

Khik ramik, peih ngak siam tui jalan “3 pambuak, 4 nao gam”, nan lac: “pambuak jabat, pambuak labik ngak, pambuak jalan ngak, sarak” saong “gam mbang, gam daok, gam ngak, gam ndom sap di mikva” ngan haong bhap bani, urang lin Biên phòng Kon Tum hu rik daong biak rilo dalam bruk jhul patagok bruk ngak mbang kinh tế- xã hội bhum tapen negar Kon Tum cak rok patagok.

Dom Đồn Biên phòng rah tui jalan tapen negar hu brei 67 urang đảng trun hu mbaok tame sinh hoạt di 58 chi bộ puk palei saong jaik 300 urang đảng mong iek jaik 970 baoh sang; 46 urang jakar, sỹ quan pambuak talei rohim daong ka 38 baoh sang urang bangsa takik kan kandah yam tagok tabiak truh kan kathaot.  

Gam haong nan, gah Biên phòng hu peih ngak rilo bruk siam daong ka bhap bani cak rok patagok kinh tế-xã hội, yau: taduan raong 75 anek saih tui danak dak veih takai adei nao tal sang bac; taduan 14 kamuan ngak anek raong di Đồn Biên phòng; daong 124 drei limo pajaih ka 67 baoh sang kathaot;  bruk pala sâm talei, bời lời... hu daong ngak brei patagok rai diuk, paglaong jien mek tame ka urang kathoat. Ong A Mon, Phaok Akaok UBND xã Đăk Blô, huyện Đăk Glei - xã tapen negar kan kandah abih di tỉnh Kon Tum brei thau, urang jakar, urang lin Biên phòng tuk halei jeng lac labik pambak tame di karja saong bhap bani dalam palei:   

“Đồn Biên phòng Đăk Blô pambuak bruk rik panuac ka karja palei peih ngak danak daong ka bhap bani cak rok patagok kinh tế, xã hội, an ninh quốc phòng. Abih di nyu lac daong ka bhap bai peih ngak bruk blei limo menek, ka dua tra lac drei pabui pajaih, kak lau lac ada.”

  Gam haong bruk daong bhap bani di bhum tapen negar cak rok patagok kinh tế paglaong rai diuk, dom Đồn biên phòng di Kon Tum jeng hu pambuak bruk haong dom pakat ủy Đảng, karja 13 xã tapen negar jhul khang bruk pathau khan, pato pakai adat hukum ka bhap bani. Đại úy Diệp Xuân Hòa, Chính trị viên Đồn Biên phòng Đăk Blô, brei thau:  

“Dalam dom thun tapa hu biak rilo sang saong menuac urang dalam xã Đăk Blô hu gam haong urang jakar, urang lin Đồn Biên phòng mboh tangin pambuak bruk hu mbaok tame khik caga jalan tapen, cột mốc, rik daong khik kajap an ninh chính trị puk palei dalam labik Đồn khik iek”.

Dalam 5 thun tapa, hu 245 mbang kapul nyaom di puk palei; jaik 720 mbang baoh sang, labaih 570 mbang urang di dom xã tapen negar di tỉnh Kon Tum halar hatian tut angan hu mbaok tame khik iek jalan tapen negar, cột mốc ... Đại tá Lê Minh Chính, Chính ủy Bộ đội Biên phòng tỉnh Kon Tum brei thau, gah Biên phòng Kon Tum padang ngak hu thế trận biên phòng taong abih bhap bani khang kajap di jalan tapen negar:  

“Pakat ủy Đảng, karja palei saong bhap bani dom xã bhum tapen negar biak bui sambai tuk rilo danak dak, rilo dự án hu mai tal mikva. Rai diuk di mikva bhum tapen negar dak harei dak hadah hadai. Meng dom bruk ngak yau angaok nan hu rik daong tame bruk pakhang pakajap thế trận biên phòng taong abih bhap bani”.

Meng dom rik daong di gah Biên phòng Kon Tum, tal harei ini hu 4 xã bhum tapen negar di tỉnh Kon Tum mek hu ginup 19 tiêu chí dalam bruk padang ngak palei pala bahrau. 9 xã daok veik mek hu meng 9 tiêu chí tagok. Gam haong karja palei, urang jakar, urang lin dom Đồn Biên phòng jeng daok kham merat daong ka bhap bani padang ngak dom janih pandap OCOP saong pambuak pagam ngak jeng chuỗi pambuak gauk dalam bruk ngak pandap, pablei pandap panda kaya nong. Gah Biên phòng Kon Tum tuk halei jeng thau lac, rik daong patagok kinh tế - ilamo, dak padang rai diuk trei sil, haniem phol ka bhap bani daok tapen negar nan lac bruk prong piah pakhang, padang thế trận biên phòng taong abih bhap bani khang kajap./.

Urang lang: Jasi 16/12/2022