Dom urang ngak "cò” yaih khan ka tuai damaui dom lô taneh mbuan hu laba

Hadei di tuk hu panuac brei thau ka danak dak mblang kapar haoh Phan Thiết jaik hu padang ngak, urang ngak mbang gah taneh riya meng grauk labik dui gauk mai tal xã Thiện Nghiệp piah pablei salih taneh riya. Di rilo quan cà phê, angaok jalan nuac tame danak dak mblang kapar haoh, menuac urang dui gauk mai biak rilo dreih yau harei roya; ô tô hu biển số Hà Nội, TPHCM, Đồng Nai, Khánh Hòa… pataok bak jalan. Angaok dom mblang taneh hu brei thau lac daok jaik mblang kapar haoh anak tal, yaom lac langik pandiak yau pui, dom “cò” taneh jeng daok nduac nao mai yaih khan ka tuai damaui dom lô taneh mbuan hu laba. Dalam tuk nan, bhap bini xã Thiện Nghiệp yau bhian randap haong bruk ni. Saai Nguyễn Công Tuấn (xã Thiện Nghiệp) khan lac: “takik di nyu, ni lac mbang ka 3 rah tabiak bruk pandiak taneh di pak ni. Tuk mehit lac hu hagait pambuak tal bruk padang ngak mblang kapar haoh ye manuac sia dui gauk mai pablei salih taneh riya biak rilo. Yau ye di bilan 9-2019, tuk bahrau mehit lac hu ngak jalan praong pambuak haong mblang kapar haoh, samar chip taneh di xã Thiện Nghiệp hu jhul tagok biak glaong. Tuk nan, yaom sa sào taneh (1.000m2) di dom gah jalan praong hu brei thau lac jaik mblang kapar haoh, meng dom rituh triệu đồng, hu jhul tagok tal 2 tỷ 8 – 3 tỷ 2.

Tal mbang pandiak taneh ni, tok dalam dom harei, taneh di labik ni hu jhul tagok tal yaom drei oh saneng mboh. Sa sào taneh di mbaok jalan Trần Bình Trọng thun 2019 yaom labaih 2 tỷ 8, tal urak ni tagok tal jaik 6 tỷ đồng.Abih di nyu nan lac, labik taneh di mbaok jalan tỉnh lộ 715 (labik tapa xã Thiện Nghiệp), meng 3 tỷ 2 tagok 5 tỷ meteh sa sào. Daok dom labik atah danak dak mblang kapar haoh, dom lô taneh daok dalam hẻm urak ni jeng tagok 2 - 3 mbang dut saong thun 2019, lac labaih 2 tỷ meteh sa sào.

Lambaok karja xã Thiện Nghiệp khan lac, urak ni taneh di bhap bini vil val danak dak mblang kapar haoh Phan Thiết daok biak takik. Mikva pablei abih meng dom mbang taneh tagok yaom dahlau deih. Dalam tuk nan, dom urang ngak mbang gah taneh riya di pak ni brei thau, bruk brei thau lac mblang kapar haoh Phan Thiết jaik padang ngak lac sa bruk lagaih ka dom urang blei taneh biak rilo dahlau daih  meda pablei hu, mek veik phun jien, duah laba...

Sa “cò” taneh di pak ni angan Minh brei thau, mbang ni dom urang yaih khan pablei salih taneh riya mai tal ni piah pablei salih oh njauk lac manuac dalam palei, tuk dom urang nan saong dom urang buh jien tame lac sa. Kapul ni daok ngak rilo bruk pablei salih ja di dom urang “cò” haong gauk piah yuk yaom tane tagok. Dom mbang taneh tagok yaom bhian rahtabiak dalam tukvak biak katut nan ye dom urang nan daok samar duah yaok jalan ngak piah jhul yaom taneh tagok glaong. Hadei di nan, dom urang nan ba gauk tabiak nao, tuk nan urang blei njauk taduan abih.

Ong Đỗ Ngọc Hòa, akaok UBND xã Thiện Nghiệp brei thau, urak ni dalam xã oh hu danak dak halei parabha taneh nền hu brei harak adat. UBND xã hu pathau khan cambaih laih saong kakei bhap bini pak ni biak caik hatai, oh pablei salih taneh riya ka urang karei oh njauk adat hukum, plaik njauk lah pachot. Mayah bhap bini dalam xã ka oh thau cambaih dom adat ni, mek jien caik takai di urang blei taneh, hadei di nan oh kaoh taneh hu yau dalam harak pambuak bruk pablei salih ye gaok kan kandah biak praong, urang pablei njauk bayar tal 2 - 3 mbang jien urang caik cọc. Thun 2019, hu rilo menuac haiy oh tabiak sap tuk njauk biyar jien caik cọc ka urang blei, kayua oh thau cambaih dom adat.

Anak bruk sarau kadhau ni, akaok UBND bal Phan Thiết hu ieu kakei UBND xã Thiện Nghiệp paglaong bruk khik ramik gah taneh riya; bhian pasang iek, langyah catang dom bruk lih mek taneh kanja, pablei salih, jao taneh riya suan adat; pasang iek, taoh klaak dom bảng ieu pablei taneh, pablei salih taneh riya oh njauk adat hukum …

Urang lang: Thu Thảo – 19/03