Saai Thông Thị Treo, bangsa Chăm, sa kreih camin hadah ka baoh sang takre bac daa oh lac di  palei chăm Phò Trì bo daok hu angan je dalam taneh ia. Kayua dalam 5 urang anek, tok di hu sa urang anek tacua padeih bac nao ngak daong ka amaik raong dom adei, 4 urang anek daok veik jeng bac tamat saong daok bac di dom sang bac đại học sư phạm, đại học khoa học xã hội saong nhân văn, đại học tài chính ngân hàng ban raya HCM. Dalam kadha “Kreih camin palei negar” harei ini, daa mikva saong taong abih gauk pang kadha vak di Văn Phụng, angaok harak báo Bình Thuận khan brei thau ka bruk kham merat yam tapa kan kandah di saai Thông Thị Treo daok di palei Phò Trì, huyện Hàm Tân, tỉnh Bình Thuận.

Saai Thông Thị Treo lac urang akaok meti di huyện Hàm Tân hu nao pataom mbaok dalam nyaom meyai baoh sang takre bac daa, but pajaih takre bac daa di HN saong hu TƯ kapul pachreih bac alin brei harak meyaom di puac thun 2013. Kreih camin yam tapa kan kandah, patak pataom jien padai raong anek mbang bac jeng menuac jeng urang di saai Thông Thị Treo hu jeng kreih camin hadah ka bhap bini dalam palei.

Kayua sang kan kandah nan ye saai Thông Thị Treo njauk padeih bac tuk barau bac tamat tal 5. Umo 18 thun, ngak diuk sa urang likei dalam palei. Hu 5 urang anek ye pasang metai kayua ruak. Pasang metai nao, sa-ai drei ngak bruk glaih glar yaok harei piah duah candaih mbang saong kuhria ka 4 urang anek nao mbang bac. Mboh saai rambah rambup, ralo urang pandar saai brei ka dom urang anek padeih bac, daok di sang daong ka amaik piah cadu glaih glar. Min saai Treo lac, caong ka dom anek thau akhar, thau haroh nan nyu pachreih saai oh huac glaih glar ngak bruk duah jien raong anek mbang bac, meng bruk mbang pah, nduac radiah pajeng pandap, thei ieu ngak hagait ngak nan, tok caong caong khin brei ka dom urang anek hu nao bac. Thau lac sang drei kan kandah, dom anek di saai jeng kham merat bac daa.

Dalam baoh sang sit min hacih sa-at, dom bằng khen di dom urang anek nan lac pren yava saong caong khin di saai. Saong nan lac panuac sanya haong pasang palang lihik bloh. Bruk caong hu akhar huroh di diuk pasang saai hu dom urang anek thau, kham merat ngak saong mek hu siam mekre. Dalam 5 urang anek, ye hu 2 urang bac tamat bloh saong 2 urang daok bac đại học. Harei hadei hadah hadai daok nao gam saong dom adei tapen thaik binguk di urang amaik glaih glar, var rup drei brei ka bruk bac daa di anek bhik./.