Thun 2006, meng Bến Tre tagok ban raya, sang saai Cúc gaok ralo kan kandah. Pasang ngak gru pato tiểu học daok saai daok di sang iek anek. Hu hasit ilamu ka bruk jhik, saai nao mesraiy phun jien, blei jamriah piah mek pandap mai jhik gia công di sang. Mboh dalam khu phố hu ralo adei saai kamei daok saoh, oh hu jien mek tame, saai saneng tal bruk padang tổ jhik gia công, rabha pandap saong pato dom adei saai jhik, daong duah jien tame ka adei sa-ai. Meng 5 urang, livik livik nao tổ jhik di saai Cúc hu labaih 100 urang. Piah bruk nduac siam, saai Cúc gam eng bac gam pato veik ka urang cakak jhik, ngak jeng pandap toàn diện, oh daok jhik tui yaok khâu yau dahlau. Meng nan, saai peih praong labik ngak piah patagok jien mek tame ka urang ngak. Saai khan lac:

 “Tuk peih praong hu labik ngak ye bruk phun jien oh lac mbuan. Phun jien tame nan labaih rituh triệu ye. Tanyaik drei oh ka thau yau habar, hu pandap ja pandap plah tui. Labik dahlak hu gaok bruk yau nan ye. Tuk jhik bloh, ba nao jao ka urang mboh oh njauk chất liệu, drei njauk kua mai sang, klak nao jhik veik piah hu angan je saong urang blei”.

Meng hu peih praong bruk ngak, saai Cúc hu padang dom nyaom jhik “vệ tinh” brei ka dom baoh sang hu anek sit, dom urang raong menuac taha, ruak kik hu điều kiện ngak thêm. Urak ini labik ngak di saai hu labaih 10 nyaom, yaok nyaom hu 4 urang taduan jhik pandap tui mẫu. Ngan saong dom urang sang kan kandah, saai blei jamriak, pandap ka urang. Yau sang saai Võ Thị Mầu, pasang ngak thợ hồ, diuk lac công nhân, daok dalam duk pah sit giniuk. Meng tuk hu saai Cúc brei nyim jamriah jhik công nghiệp mai jhik di sang, saai gam hu iek glang dua urang anek sit, gam hu jien mek tame 4 triệu đồng yaok bilan nan ye tabiak truh bruk kurang anak, kurang likuk. Saai Võ Thị Mầu brei thau;

“Dahlau di abih drei daok sang pah, kan kandah lo. Hadei di nan hu dom saai giới thiệu haong saai Cúc, drei oh hu jien blei jamriak jhik. Saai Cúc lac brei nyim piah pandar, bloh kuhria hadei. Jeng oh ka hu nan ye saai oh ndom tal hagait. Dahlak thau dhar phon saai lo. Urak ini kham merat ngak pandap, drei patak pataom hu saong blei jamriah vắt sổ piah ngak hu ralo jang gac. Saai Cúc daong ka drei hu ginup pandap piah ngak”.

Piah hu ginup bruk ngak ka urang ngak, saai Cúc nao duah nguồn hàng, duah labik pambuak bruk. Urak ini, jien mek tame di labik jhik gia công Bạch Văn hu labaih 1 tỷ đồng yaok thun. Urang ngak di saai hu jien mek tame yaok bilan jaik 3 triệu 500 ribau đồng ngan saong dom urang ngak thêm saong 6 triệu đồng ngan saong jang jhik chính.

Thau kuhri kuhria, ngak mbang hu kein laba saong kham merat daong bruk ngak ka adei saai kamei, saai Cúc hu kapul urang kamei phường sangka, daong palagaih, tacei brei dom labik jhik khan ao đồng phục anek saih di dom sang bac. Saai Lê Thị Thanh Huyền, akaok kapul LH urang kamei phường 10, quận Gò Vấp lac:

“Meng tuk cơ sở peih tabiak hu daong ka bruk patruh eik patun kathaot di puk palei biak ralo. Daong ka bruk ngak di phong trào hu pabak pren khang, pachreih hu ralo adei saai hu mbaok tame dom bruk ngak di kapul jang. Kapul jeng hu pambuak bruk yaih khan saong duah urang ngak, nao duah dom hợp đồng di dom sang bac dalam quận”.

Hu labaih 100 urang hu bruk ngak saong hu jien mek tame tani tanat, min saai Cúc jeng daok sahneng duah jalan piah paglaong rai diuk ka adei saai urang ngak. Meng bloh, labik jhik di saai Đặng Thị Bạch Cúc hu adat brei padang cty, peih tabiak sa pabah mbang bruk ngak tra ka dom urang ngak nhập cư oh lac di quận Gò Vấp saoh./.