Tal bilan 3 saka ia bulan yaok thun, bhap bini dalam taneh ia jeng yau bhap bini di ban raya HCM ba gauk mai dom kandi, dom labik kakuh pô Hùng piah pok bingu pok gilau pahadar saong thau dhar phol dom pô Hùng, dom urang hu buh pren yava padang taneh ia. Daok 3 harei tra, harei 9/4 (nan lac harei 10 bingun bilan 3 saka ia bulan) lac harei pacit daa, bruk kuhria caga ka harei rija praong ini hu dom mban khik iek kandi pô hùng di ban raya HCM rami ramik biak siam, caga taduan rok bhap bini ban raya mai pok gilau kakuh. Kadha vak di Thúy Linh, urang vak di rayo sap ndom VN daok di ban raya HCM brei thau ka bruk nan:

Daok 2 bilan tra saai Thành Minh Quân nao ngak bruk di negar Japon. Dom harei daok di sang, saai oh var nao tal kandi pô Hùng dalam Thảo cầm viên ban raya piah am gilau pok kakuh hadar tal dom pô Hùng. Ngan saong saai, ini lac bruk praong, kayua oh lac brei mboh hatung hatian di drei ngan saong dom rai rah nao dahlau, saai daok caong dom pô Hùng ba patuah jamo ka mbang nao di saai hu siam mekre salamat. Saai Quân khan lac:

“Dom pô Hùng nan lac dom urang hu buh pren yava padang taneh ia saong khik taneh ia. Meng kan hu dom po Hùng bo VN hu yau harei ini. Tapa ralo bruk mesruh metak piah khik caga ka bangsa, khik caga ka nòi giống di drei. Dom po Hùng padang ngak hu nền tảng khang kajap ka sử học, ka sajarah dak rai jeng yau gah đầu tranh, gah tinh thần di xã hội urak ini ngan saong dom rai rah harei hadei nan ye kol dahlak saneng lac brei thau dhar phol dom po Hùng, dom urang hu buh pren yava ka taneh ia hu jak jeng praong, hu sajarah biak hadah hadai. Tuk hadar tal dom harei ini, dahlak biak caong mai rivang baoh kandi bak yaom glaong ngan saong yaok urang VN”.

Jeng dalam kandi pô Hùng dalam Thảo cầm viên, kol dahlak gaok amuk Đoàn Thị Hồng Hoa saong dom urang di kapul parang me-in thể dục dưỡng sinh ban raya. Yaom lac umo taha praong thun, min amuk Đoàn Thị Hồng Hoa saong dom urang di kapul daok kham merat pasram megru dom động tác dưỡng sinh yau habar ka nyu samu saong mekre iek. Ini jeng lac kadha di kapul rik tame ka tuk peih ngak rija pacit daa pô Hùng di harei 10/3 saka ia bulan tal. Amuk Đoàn Thị Hồng Hoa lac:

“Yau yaok thun, tal harei pacit daa po Hùng ye kapul hu mban ngak adat daa mai piah ka bruk peih ngak rija hu praong prang. Hatung hatian di yaok urang hu hadar tal po Hung padang taneh ia di drei, muk kei drei samar dahlau padang taneh ia saong khik taneh ia. Drei brei mboh hatung hatian di drei tapa bruk hu mbaok tame parang me-in rik daong ngak brei rija hu praong prang jang”.

Piah ngak ka harei pacit daa po Hùng di kandi pô Hùng dalam Thảo cầm viên rah tabiak siam mekre, miuyim sajarah dak rai ban raya – jabat khik iek baoh kandi hu pambuak bruk saong UB bhap bini quận 1 padang kế hoạch saong jalan ngak grap tanat. Tui nan, harei pacit daa po hùng hu ngak dom adat yau: pok gilau pahadar dom po Hùng; adat rok phạm phục hu 18 pei nung, 18 bánh dày; adat rok kiệu, pok bingu… Tui kuhria tuai damuai mai hu mbaok di harei pacit daa po hùng di labik ini biak ralo nan ye mban peih bruk hu caga phân luồng giao thông; ramik mblang khik radaih ô tô, radaih mô tô, biển báo tacei pato jalan piah ba mbuan lagaih ka tuai damuai mai hu mbaok ngak adat pacit daa po Hùng, khik ka pahu siam mekre, selamat. Ong Lâm Ngọc Hùng – phaok giám đốc miuyim sajarah dak rai ban raya HCM brei thau:

“Thun ini hu janih barau nan lac tapa bruk xã hội hóa ye kol dahlak hu jak ba kapul cổ vật di ban raya HCM  alin hadaih brei kandi sa kiệu meng kayau sarak biak gheih, biak mekre. Daok bruk ngak adat ye kol dahlak jeng peih ngak meng 8 tuk meteh hadei di tuk  adat cambat praong di ban raya rah tabiak. Pacit daa po Hùng yaok thun kol dahlak tuk halei jeng peih ngak njauk adat meng kan. Yau yaok thun bhap bini ban raya pataom mai di labik ini biak ralo”.

Langiu kandi po Hùng dalam Thảo cầm viên di ban raya, dom labik kakuh dom po Hùng karei karei di ban raya HCM urak ini jeng daok thrap gap kuhria caga piah ka harei pacit daa po Hùng rah tabiak praong prang; brei mboh hatai thau dhar phol di anek taco urang Việt ngan saong dom po Hung hu padang taneh ia saong peih tabiak triều đại Hùng Vương – An Dương Vương hadah hadai dalam sajarah dak rai bangsa./.