Dom thun jaik di ini, tal bilan hajan ribuk, yaok rituh baoh sang bhap bini daok tapen dom kraong, caraoh di tỉnh Quảng Bình mbang ndih oh bingi, huac  lahik sang, lahik taneh ngak mbang kayua jaleih haluk takai kraong. Dalam tuk bruk langyah pacang glut jaleih di karja palei oh ka siam.. Urang vak di rayo sap ndom VN daok di bhum kreih negar brei thau ka bruk ini:

Sang ong Nguyễn Văn Niên daok di palei 9, xã Xuân Trạch, huyện Bố Trạch, tỉnh Quảng Bình thun halei tal bilan hajan ia sua jeng mboh duh hatai. Bruk glut jaleih haluk takai kraong dui atah meng 3 thun ini mai dak harei dak khang jang, ngak ka jaik 2 ha taneh daok saong taneh ngak mbang njauk ia ba seik. Urak ini sang ong Niên daok atah di takai kraong oh ka tal 10 mét. Mbang ribuk ia sua khang di puac thun bloh, ia njom tame dalam tal palei 9, xã Xuân Trạch, huyện Bố Trạch meng 2 tal 3 mét, hu labik tal 10 mét. Labaih 20 baoh sang bhap bini daok dalam bhum mbuan glut jaleih haluk takai kraong, min bahrau hu 4 baoh sang panduan nao daok labik barau. Ong Nguyễn Văn Niên brei thau: yaom lac karja daong yaok baoh sang 10 triệu đồng piah panduan nao min yaom jien ini oh ginup piah ka bhap bini padang ngak sang daok.    

“Bilan hajan ia sua mai oh ndih hu, caga nduac, caga jaleih haluk. Bein panat labung patei tea jeng seik abih tui ia, urak ini kan kandah biak ralo. Sarak daong hu 10 triệu min xã pacap blei nền sang abih 8 triệu, sang daok veik labik ini oh hu jien panduan nao. Amaik ame taha ye, kol dahlak biak caong karja daong khik caga tính mạng saong drap ar di baoh sang dalam bilan hajan ribuk”.

Di huyện Quảng Ninh, tỉnh Quảng Bình bruk lahik taneh ngak mbang kayua hajan ia sua yaok thun jeng biak khang. Karja palei hu pachreih bhap bini pala dom janih phun hu pren pacang glut jaleih yau krem, bần, rươi… min phun oh ka dil praong, hajan ia sua tuh mai ba seik tui ia: Ong Nguyễn Viết Ánh, akaok UB bhap bini huyện Quảng Ninh, tỉnh Quảng Bình brei thau: Thun ini, huyện hu TƯ daong jaik 40 tỷ đồng piah pasiam veik ar pacang, dom danao, bruk  panuan ba jaik 4 ribau baoh sang bhap bini daok di bhum biar nao tagok dom bhum glaong piah nyaik tuk hu bala rah tabiak jeng hu caga bloh.

  “Ngan saong jalan ngak 4 di labik, tacei pato dom xã kuhria caga pandap mbang, ia menyum; kuhria caga radaih, menuac urang piah daong pacang cakak tuk hu bruk. Kan kandah di kol dahlak di labik jalan nao mai oh mbuan, abih di nyu nan lac dom xã bhum biar. Meda lac dalam huyện dom ar pacang kraong ribaong hu buh jien tame ngak pasiam. Kol dahlak daok pok panuac tagok tỉnh, TƯ daong dom phun jien padang ngak dom labik mbuan glut jaleih”.

Tỉnh Quảng Bình urak ini daok hu labaih 6 ribau baoh sang bhap bini gam saong labaih 20 ribau menuac daok dalam bhum mbuan glut jaleih ceik, takai kraong, dalam nan, 3000 baoh sang bhap bini njauk panuan nao chip. Min, dom baoh sang njauk panduan nao biak ralo, dom palei gaok kan kandah oh hu taneh bahrau ka mikva, dalam tuk phun jien biak takik. Anak meta, tỉnh Quảng Bình brei panuan nao dahlau labaih 100 baoh sang daok dalam labik glut jaleih taneh patau, ia ba seik lahik sang danaok. Tui kuhria tal puac bilan 12 thun ini hu ngak salah bloh bruk panuan ba. Ong Nguyễn Ngọc Phụng, akaok chi cục pacang cakak ribuk ia sua saong khik iek ar pacang tỉnh Quảng Bình brei thau:

 “Phun jien takik nan ye daok hu dom kan kandah dalam bruk daong ka bhap bini panuan sang danaok nao labik siam mekre. Karja palei bhian pasang iek, meyah hu bala rah tabiak ye hu jalan langyah chip. Ngan saong jalan ngak 4 di labik, ieu pataom menuac sia pandar dom vật liệu, kayau krem  pacang kateik  piah patakik khat lahik kayua bala rah tabiak”.

Nan tok di lac jalan ngak di anak meta. Suai lavik, piah patakik khat lahik kayua glut jaleih takai kraong, takai tasik, tỉnh Quảng bình brei pacang cakak bruk kuac mek cuah randaih sung hukum rah tabiak meng rilo thun ini mai, brei pala phun kayau, ngak ar pacang glut jaleih dom takai kraong di puk palei./.