Pathau mikva saong taong abih gauk! Bruk glut jaleh haluk tapen dua gah takai kraong di Đồng Tháp tuk vak jaik di ini biak khang saong kan kandah jang. Min, gam saong bruk pacang dom khut khat di bala ye bruk duah labik piah bhap bini bhum akaok ia ndik ia sua hu labik daok siam mekre piah padang mbang ngui jeng daok lac sa kadha kan kandah ngan saong karja di labik ini. Kadha vak di urang vak Thanh Tùng hu khan brei thau dom puk palei njauk glut jaleh trak, ngak kan kandah tal rai diuk di bhap bini Đồng Tháp. 

Dahlau daih, baoh sang di amuk Nguyễn Kim Hương, palei Tân Phú A, xã Tân Bình, huyện Thanh Bình daok atah di kraong dom pluh mét ye urak ini daok cang tuk jaleih trun kraong. Oh lac yau nan saoh, dom thun jaik di ini, bruk glut jaleh haluk nyu daok luan lihik taneh di sang amuk. Amuk Hương brei thau, tal urak ini hu labaih 1 ribau m2 taneh di sang amuk jaleih trun kraong. Urak ini sang daok yah ton saong geng sang piah ba nao labik karei kayua glut jaleih daok mai jaik tal:

“Nyu jaleih miat, tal urak ini labaih 1 công taneh ye. Urak ini sang dahlak daok nyu jaik jaleh. Daok yah piah mek pasei, kayau. Daok janih hagait drei ngak oh dil ye nyu laik trun kraong”.

Gam saong baoh sang amuk Hương, urak ini huyện Thanh Bình hu jaik 600 baoh sang bhap bini daok dalam bhum glut jaleh haluk brei panduan nao chip duk saong 1.300 baoh sang daok dalam labik glut jaleh dalam huyện. Min, dom baoh sang ini oh daok taneh piah panduan nao. Puk palei jeng daok having akaok kayua nền sang dalam cụm, tuyến dân cư abih labik. Meng akaok thun tal ini, dalam huyện glut jaleh abih tih jaik 17km.

Meng akaok thun tal ini dalam huyện Hồng Ngự hu 28 mbang glut jaleh haluk. Glut jaleh haluk ngak kan kandah tapak tal 52 baoh sang bhap bini, ba seik 2 baoh sang saong 23 baoh sang njauk yah chip. Tui UB bhap bini huyện Hồng Ngự, di dom xã Long Thuận, Thường Phước 1, Long Khánh A, Phú Thuận B, Phú Thuận A tal tukvak ini hu labaih 1 ribau 500 baoh sang daok dalam labik taneh glut jaleh brei panduan nao. Ong Nguyễn Trạng Sư, phaok akaok UB bhap bini huyện Hồng Ngự brei thau, dom baoh sang bhap bini daok dalam labik glut jaleh daok hu karja palei samar ba nao. Cambaih laih nan lac, ngan saong xã Thường Phước 1, hu jaik 300 baoh sang caong mai daok di 3 cụm dân cư labik hành chính huyện saong huyện hu rami ramik mbang 1 ka 96 baoh sang, hu labaih 580 baoh sang caong khin padang cụm, tuyến dân cư di xã piah tame daok tani tanat; xã Long Thuận hu 81 baoh sang hu ba tame cụm, tuyến dân cư… Min, bruk njauk duh hatai urak ini nan lac hu dom xã oh daok taneh piah brei ka bhap bini tame daok:

“Kol dahlak caong khin tỉnh samar hu sarak piah parabha cụm tuyến dân cư brei ka labaih 580 baoh sang ini. Tapa nan bhap bini meng tani tanat rai diuk hu. Urak ini bo ia sua trun ye glut jaleh daok trak jang”.

Tui mban tacei jalan pacang cakak ribuk ia sua saong daong duah urang njauk bala tỉnh Đồng Tháp, meng akaok thun tal ini hu jaik 8.000 m2 taneh glut jaleh, ngak kan kandah tal rai diuk di jaik 2.000 baoh sang bhap bini daok dalam bhum nan. Urak ini, tỉnh hu ba 400 baoh sang daok dalam labik mbuan glut jaleih tame daok dalam cụm tuyến dân cư. Min, daok hu jaik 1.500 baoh sang bhap bini oh ka hu ba tame kayua cụm tuyến dân cư mbang ka 2 dom nền oh daok ralo. Dom bhum palei yau Hồng Ngự, Thanh Bình, Tân Hồng… jeng daok kurang taneh piah ba bhap bini bhum glut jaleh barau tame labik daok tani tanat. Amuk Lý Thanh Tâm, phaok jabat ngak nông saong patagok palei pala huyện Thanh Bình hu panuac lac:

“Anak dom cuang kandah yau nan, kol dahlak jeng hu tham mưu piah huyện pok panuac tagok tỉnh saong TƯ daong ka puk palei, abih di nyu nan lac di dom xã Tân Bình. Tân Quới, Bình Thành…bhap bini daok gaok kan kandah khang kayua glut jaleh”

Anak bruk glut jaleh tapen takai kraong rah tabiak dak harei dak khang, ong Nguyễn Thanh Hùng, phaok akaok UB bhap bini tỉnh khan lac, bruk langyah khat lahik glut jaleh nan lac bruk praong saong lac cuang kandah praong ngan saong tỉnh, abih di nyu nan lac anak bruk biến đổi khí hậu urak ini. Kayua yau nan ye, dom pakat, dom ngành saong puk palei brei pataom tame langyah saong ngak tui jalan “4 di labik, 3 caga ngak” piah khik kajap tính mạng saong drap ar di bhap bini:

“Anak meta kol dahlak tacei pato dom puk palei jhul samar bruk pasang iek, ba bhap bini tame dom cụm tuyến dân cư mbang II. Di dom cụm tuyến ye jeng brei nền jaik 50% piah brei ka bhap bini bhum glut jaleh. Ngak yau habar jhul samar bruk ngak piah ba bhap bini tame labik an toàn chip”./.