Bruk taong cap ikan ngừ đai dương tui công nghệ NB di tỉnh Bình Định dalam tukvak tapa daok pambak praong tal urang taong cap ikan dom tỉnh tapen tasik Nam Trung Bộ. Bruk taong cap barau ini ba mai sa jalan ngak barau, pasalih akaok saneng di urang taong cap ikan, di doanh nghiệp saong karja dalam bruk taong cap, paglaong yaom angan ikan ngừ đại dương VN. Kadha vak di urang vak Thành Long daok di bhum kreh negar brei thau ka bruk nan. Daa mikva saong taong abih gauk tui pang:

Dahalau daih, urang taong cap ikan dom tỉnh tapen tasik Nam Trung Bộ meng Bình Định tal Khánh Hòa taong cap ikan ngừ đại dương tui jalan meng kan nan lac vah tangin pambuak haong gom dah nan ye chất lượng ikan oh glaong. Tuk tame bilan ikan, min ikan ngừ tok  hu urang blei yaom 80 ribau sa kg. Ikna ngừ đại dương lac janih ikan hu yaom kinh tế glaong, ikan cap hu ralo min urang taong cap oh ngak kaya hu meng bruk nao tasik. Hu talei pambuak bruk di hội hữu nghị Nhật – Việt di tỉnh Osaka, tỉnh Bình Định hu ngak iek bruk “taong cap ikan ngừ đại dương tui công nghệ NB”. Tui nan, tỉnh Bình Định padang sa kapul hu 5 kapal ikan hu dom jamriak vah bahrau, hu labik ướp ikan njauk quy cách. Urang taong cap ikan hu tacei jalan ngak meng vah ikan, ngak ikan saong khik mepiah ikan angaok tasik. Urang taong ikan angan Nguyễn Quê, sa dalam 5 po kapal ikan hu mbaok tame bruk ngak ini brei thau: hadei di 5 mbang nao tasik taong cap ikan ngừ tui công nghệ di NB hu peih tabiak jalan siam lagaih barau:

“Duk saong dahlau daih ye urak ini ye ikan nyu siam jang kayua taong cap tui công nghệ NB.  Dahlau daih pandar pren menuac, urak ini nao taong cap meng jamriak nan ye nyu hanjul jang saong samar jang. Dahlak biak chreih chrai kayua drei taong cap tui jalan ini ikan nyu hu yaom glaong jang piah ka urang taong cap ikan kol dahlak hu kein laba, kol dahlak biak uan tabuan”.

Dalam bruk taong cap ikan ngừ đại dương tui công nghệ di NB, doanh nghiệp lac sa labik pambuak bruk praong. Ikan siam, doanh nghiệp dang tabiak blei abih ikan ka urang taong cap ikan tui yaom glaong jang 20% duk saong yaom darak pasar. Amuk Cao Thị Kim Lan, giám đốc công ty cổ phần kaya ikan Bình Định, doanh nghiệp camereip abih hu mbaok tame bruk ngak ini brei thau: dahlau daih, công ty jeng pablei ikan ngừ đại dương tapa NB min kayua chất lượng ikan oh mek hu tanut chuẩn nan ye njauk khat lahik. Amuk Cao Thị Kim Lan ndom lac:

“Cambaih laih ini lac sa dự án biak siam, salih jalan sahneng ka urang taong cap ikan. Urang thau lac paglaong chất lượng nyu hu yaom glaong yau habar. Saong tuk mek hu chất lượng tui công nghệ di NB ye ikan ini meda pablei tapa Nhật, meda pablei ka drak dalam taneh ia, meda ngak jeng ralo phi lê yaom glaong pablei nao dom taneh ia dalam dunya. Meng bruk ngak iek camereip hu 5 kapal ye cty saneng lac brei peih praong jang”.     

Bruk taong cap ikan ngừ đại dương tui công nghệ NB di tỉnh Bình Định daok pachreih urang taong cap ikan dom tỉnh Nam Trung bộ tabiak tasik. Urak ini, ralo doanh nghiệp, rilo urang taong cap ikan di dom tỉnh Phú Yên, Khánh Hòa jeng samar salih jalan taong cap ikan, ngak ralo ikan, khik mepiah piah paglaong chất lượng ikan ngừ đại dương. Công ty Cổ phần Bá Hải di tỉnh Phú Yên khang hatai buh jien blei jamriak ngak pranh ikan ngừ đại dương; taphia di nan pambuak bruk saong doanh nghiệp NB peih ngak công nghệ khik mepiah, ướp ia patau ikan ngừ đại dương. Tui ong Lê Văn Hồng, giám đốc Cty cổ phần Bá Hải, kein laba di bruk taong cap ikan tui jalan di NB hu mboh cambaih, cty brei pambuak bruk saong urang taong cap ikan padang jaik 6 kapul taong cap ikan ngừ  bilan ikan Bắc jaik tal:

“Doanh nghiệp meda pambuak bruk saong urang taong cap ikan piah padang dom kapul, nyaom pambuak gauk taong cap angaok tasik, pajeng ba ikan tame samar dalam sa adit min, meng tuk vah tagok tal tuk ba tame gah, meng nan caik dalam dhung ba nao Bei Gon, par nao Nhật, nao Mỹ. Meng jalan vah barau saong jalan ngak barau ye kein laba taong cap ikan di urang taong cap ikan biak glaong”.  

Urak ini, dalam taneh ia hu jaik 3.600 kapal vah ikan ngừ, rilo meng daok di 3 tỉnh Bình Định, Phú Yên, Khánh Hòa, ikan taong cap hu jaik 16.000 tấn sa thun. Mintri ngak nông saong patagok palei pala hu patabiak “đề án ngak iek bruk taong cap ikan, blei ikan saong ngak ikan ngừ tui chuỗi giá trị” di 3 tỉnh tapen tasik Nam Trung bộ ngan saong yaom jien peih ngak abih tih jaik 760 tỷ đồng. Ini lac sa kadha bui sambai ka bruk pandar công nghệ barau, paglaong chất lượng saong paglaong yaom ikan ngừ đại dương./.