Dahlau di thun 1975, tỉnh Khánh Hòa lac labik pataom dom căn cứ, pasak chỉ huy di karja Bei Gon. Meng kreh bilan 3 thun 1975, bruk rah tabiak biak samar, bộ đội chủ lực gam gam mek hu jayah di Tây Nguyên; abih di nyu nan lac jayah di sư đoàn 10 di đèo Phượng Hoàng, jaik brum tỉnh Khánh Hòa saong Đắc Lắc, ngak ka kol khamang di ban sit Nha Trang tayah tayac saong nduac klak. Menuac di drei daok dalam ban Nha Trang padang dom tổ tự vệ vũ trang brok tagok piah khik iek dom jabat ngak bruk, mblang pabah lamnge, mblang kapal haok, khik caga trật tự dalam tuk cang lin peih paha tame tiếp quản ban sit. Ong Bùi Hồng Thái, Dahlau daih lac phó bí thư thường trực tỉnh ủy Khánh Hòa brei thau, hadei di tuk peih paha, ban sit Nha Trang yau daok khik hu tamo, oh khut tayah hagait kayua padang hu lực lượng dalam bhap bini:   

“Dom kapul chủ lực taong tapak trun Ninh Hòa, tuk nan pandar binh vận, tàn quân hù gauk, ngak srau kadau ka lực lượng pak nan. Menuac di drei pak nan dang tagok, meblah karja, meblah dom jabat ngak bruk praong, oh brei palai pajoa. Tuk menuac di drei angaok daih mai, drei dalam ini tabiak, ba mai Nha Trang. Di Nha Trang oh hu patuh sa sap phao halei”.

Dalam tuk nan, hadei di tuk rah tabiak dom mbang taong praong di đèo Phượng Hòang meng harei 1/4, sư đoàn  10, quân đoàn 3 tui jalan roya 21 meng ceik glai Tây Nguyên samar mai gah tasik, peih paha huyện Ninh Hòa, tui jalan roya 1A mai ban sit Nha Trang. Tal biar harei 2/4, đoàn quân peih paha tame pasak ban sit Nha Trang. Sang halei jeng tuan hala dok peih paha, uan tabuan taduan rok  bộ đội. Đại tá Nguyễn Quang Lâm, dahlau daih lac phó chính ủy trung đoàn 24, sư đoàn 10, đơn vị akaok meti mai peih paha Nha Trang hadar veik:

 “Dua gah jeng oh taong gauk, oh palai pajoa ban sit. Urak ini maong veik lac bruk patuah jamo ka 2 gah, drei hy sinh bloh tal nan jeng padeih veik. Gah daih jeng yau nan, jeng lac urang VN drei, urang padeih veik, urang mai veik saong baoh sang, kuhria rai diuk ka rup drei saong dak padang taneh ia”.

Harei 3/4, căn cứ Cam Ranh hu peih paha. Hadei di nan, bhap bini tỉnh Khánh Hòa hu rik daong pren yava, drap ar brei ka chiến dịch HCM, yasa taneh ia. Labaih 4000 tấn xăng, 1000 tấn menyek, 2000 tấn brah saong labaih 1000 radaih ô tô hu ieu pataom caga ba bộ đội tame gah meraong patui bruk mesruh metak.

40 thun tapa bloh, meng sa ban sit tapen tasik, bhap bini ralo meng nao taong ikan tapen tasik saong dom dịch vụ ka dom căn cứ quân sự, tal urak ini, ban sit Nha Trang hu ralo salih barau, menuac sia rilo jang 3 mbang, bruk ngak mbang kinh tế tagok jang 20 mbang. Ban Nha tRang daok rik daong tal 75% dalam abih tih jien mek tame kadung jien karja labaih 15 ribau tỷ đồng yaok thun di tỉnh Khánh Hòa. Dom palei ngak ikan kan kathaot tapen tasik hu salih tapa dom khu tái định cư praong, siam. Urang taong cap ikan dahlau daih nao tasik mai veik dalam harei meng gaiy sit urak ini hu kapul kapal taong cap ikan di tasik atah yaok rituh sruh, tabiak tal bhum tasik Hoàng Sa, Trường Sa. Urang taong cap ikan angan Mai Thành Phúc, daok di labik tái định cư Hòn Rớ, xã Phước Đồng, ban Nha Trang khan lac:

 “Tuk nan nao jaik 100 hải lý oh thau jalan mai sang. Urak ini drei nao Hoàng Sa – Trường Sa, giay gilai nyu praong jang. Po kapal jeng hu sang dua tal, 3 tal, oh yau dahlau diah sang taik tahak, riyak paoh tame ye jaleih abih, tuk nan eik lipa, tasik riyak praong nao oh hu”.

Ong Lê Thanh Quang, bí thư tỉnh ủy, akaok hội đồng bhap bini tỉnh Khánh Hòa brei thau, tỉnh daok buh jien tabiak padang ngak ralo công trình hạ tầng, jalan mbak praong di ban nha trang yau: pasak pablei salih – dịch vụ di mblang kapal haok Nha Trang, khu đô thị - hành chính barau di tỉnh Khánh Hòa, jalan trục Bắc – Nam, jalan Nha Trang – Đà Lạt, kè kraong Cái, kè saong tathuak ia sua kraong Tắc – kraong Quán Trường. Ong Lê Thanh Quang ndom lac, Nha Trang - Khánh Hòa daok brei mboh labik dang di drei lac đô thị praong di bhum duyên hải Nam Trung bộ.

 “(Cơ sở hạ tầng siam, pachreih doanh nghiệp buh phun jien tame ngak mbang, phun jien karjabuh tabiak 1 min tư nhân buh tame meng 4 tal 5. Urak ini, Nha Trang lac đô thị ka sa di tỉnh praong di abih dalam taneh ia saong dak harei dak jeng đô thị pasak ka dịch vụ, pablei salih, ilamu kỹ thuật di Nam Trung bộ. Meng hu langik tasik siam, anak tal oh suai livik, meda jeng sa đô thị di TƯ”.

Ban Nha Trang – tỉnh Khánh Hòa dak harei dak brei mboh lac ban khang kajap, kaya meda. Bhap bini palei Trầm Hương daok ngak brei pabak jang dom dalikan ka sa ban oh lac sami samar, hadah krah bo daok lac văn minh,  lac labik mai tal di ayut sahlat dalam saong langiu taneh ia./.