Hadei di ralo thun khat lahik gam gam, rai diuk di urang pala tabau di bhum taneran kraong Cửu Long laik tame jalan kan kandah. Tui nan yaok ribau ha tabau salih tapa pala dom janih phun karei yaom lac oh thau nyu hu kein laba jang phun tabau halei oh? Bruk ini ngak ka gah chức năng saong sang mac saradang biak duh hatai tuk quy hoạch sản xuất njauk tayah tayac. Min dom jalan ngak daong ka phun tabau tal urak ini jeng daok lac bruk kan kandah, oh ka hu jalan langyah. Kadha vak hadei ini di Sa Oanh, urang vak di rayo sap ndom VN daok di bhum taneran kraong Cửu Long brei thau ka bruk nan. Daa mikva saong taong abih gauk tui pang:

Ini lac thun ka 3 gam gam urang pala tabau di bhum taneran kraong Cửu Long njauk khat lahik. Urak ini tabau 10 chữ saradang hu sang mac saradang Sóc Trăng blei yaom 910 đồng/kg saong urang mai blei di hamu yaom meng 600 tal 650 đồng sa kg. Tui yaom yau ini, hadei di jaik sa thun iek glang ngan saong năng suất 110 tấn sa ha ye urang pala tabau  khat meng 6 tal 11 triệu đồng yaok ha. Yaom khat lahik daok glaong jang tuk năng suất saong chữ saradang trun ralo. Ralo urang mboh glaih glar pablei gam tabau meda saong pablei abih kuhria tui công atau ha. Bruk njauk duh hatai nan lac urang halei hu ralo taneh pala tabau ye kan kathaot rilo jang. Ong Hồ Văn Sinh daok di xã An Thanh 1, Cù Lao Dung - urang barau pablei mão labaih sa ha tabau khan lac:

“Phun jien buh tame 7 triệu meteh sa công, gam 2 triệu meteh jien pah urang ngak. Min tabau urak ini urang blei bayar yaom 7 triệu meteh sa công. Kuhria oh pablei min saneng veik ieu urang mai blei brei nyu laneng taneh”.

Dalam tuk nan di tỉnh Trà Vinh, bruk pala tabau jeng oh hadah hadai jang. Tabau  pablei di sang mac urak ini yaom 900 đồng sa kg janih tabau 10 chữ saradang saong meyah trun 1 chữ saradang ye kaoh tabiak 70 đồng. Tui yaom yau nan, hamu tabau halei mek hu meng 140 tấn tagok dalam yaok ha meng hu laba, min bruk ini biak takik. Anak bruk njauk khat lahik ralo thun gam dom baoh sang pala tabau hu sahneng tal bruk salih phun pala karei. Min piah ngak pasiam taneh pala tabau piah pala phun karei brei hu ralo phun jien, dalam tuk phun pala, anek raong barau jeng oh ka hu labik pablei tani tanat.. Kayua yau nan ye urang pala tabau tok cang maong sarak daong ba di karja piah patrun kan kandah. Ong Thạch Khôl, daok di xã Kim Sơn, huyện Trà Cú lac urang hu jaik 20 thun pala tabau brei thau: oh ka tuk halei urang pala tabau mboh duh hatai yau urak ini; pala tabau njauk khat lahik, salih tapa phun karei jeng oh lagaih:

“Pala tabau mboh tagok oh truh min klak tabau oh thau ngak hagait, ngak hamu jeng oh hu mbang. Min hu dom baoh sang salih tapa pala bei java tuk takik ye pablei hu, tuk ralo oh hu thei blei jeng njauk khat lahik. Dom urang rok danao raong ikan kalet jeng khat lahik. Urang nông urak ini oh ka duah mboh jalan tabiak”.

Huyện Cù Lao Dung, tỉnh Sóc Trăng saong huyện Trà Cú, tỉnh Trà Vinh lac bhum pala tabau praong piah ngak saradang di bhum taneran kraong Cửu Long. Dua huyện ini urak ini hu labaih 14 ribau ha tabau, min dom thun jaik di ini taneh pala tabau dak harei dak takik nao. Tui kuhria oh ka ginup abih, eng thun bloh di labik ini hu labaih 1.500 ha taneh tabau salih tapa pala phun karei. Ong Phạm Hồng Văn, phaok akaok UB bhap bini huyện Cù Lao Dung, tỉnh Sóc Trăng ndom lac:

“Meyah yaom tabau daok trun yau ini,  anak tal huyện Cù Lao Dung tok daok  meng 4 tal 5 ribau ha. Caong khin dom công ty dalam saong lingiu tỉnh hu jalan klah rabha  dom kan kandah di mikva piah patagok hu kein laba. Meyah hu klah rabha yau nan, dom công ty tabau saradang dalam saong langiu tỉnh meng pambuak bruk hu. Daok oh klah rabha ye anak tal meda gaok biak rilo kan kandah”

Dalam tuk nan di huyện Trà Cú, tỉnh Trà Vinh, thun tabau 2014 – 2015 tal dom baoh sang pala tabau di huyện tuk mbaoh tangin pambuak bruk pabak tabau piah ngak saradang ka công ty, meda hu daong pajaih tabau barau, khak drak, jru khik caga phun pala saong jien 12 triệu đồng yaok ha. Tal tuk pablei, công ty mek veik phun jien saong sanya blei abih tabau tui yaom darak pasar, oh biar jang yaom dalam khu vực. Dalam tuk UB bhap bini tỉnh Trà Vinh barau brei buh jien tame padang ngak jalan ar atah jaik 20km, jien abih tih labaih 223 tỷ đồng piah khik caga bhum tabau di tỉnh. Bruk ngak jalan ar khang kajap hu daong ka dom baoh sang pala tabau khik hu siam mekre jang saong patrun hu meneng yaom jien iek glang. Min, meyah hợp đồng blei abih tabau nyu gaok tavak tavaiy saong tabau di Trà Vinh saong bhum taneran kraong Cửu Long hu yaom phun daok glaong jang 30% yaom phun di dom taneh ia dalam khu vực ye oh merak hu saong janih tabau yau gauk, ye urang nông jeng daok gaok kan kandah. Ong Trần Quốc Tuấn, phaok yam ndok sở công thương tỉnh Trà Vinh lac;

“Bruk praong nan lac pajaih tabau, kayua di sa mblang taneh praong nde gauk bo pajaih tabau di Thái Lan, di Lào sản lượng nyu glaong jang. Abih di nyu nan lac chữ saradang dalam tabau jeng glaong jang pajaih tabau bo urak ini kol drei daok pala. Tuk bo năng suất chữ saradang biar, kol drei kan meirak yaom saradang saong dom taneh ia dalam khu vực. Meyah oh langyah hu bruk  pajaih tabau ye kol drei biak kan khik  hu taneh pala tabau yau urak ini”.

Meng rilo thun ini mai phun tabau oh khik hu “ ia yamen” saong urang nông, pabak tame nan, lac bruk hợp đồng blei abih tabau jeng daok ralo tavak tavaiy oh ka langyah hu, ngak ka phun pala karei dak harei dak lih tame taneh tabau nan lac bruk oh plaih hu. Kayua yau nan ye, piah ka urang nông patui jalan pambuak bruk saong phun tabau, tani tanat taneh langiu sarak daong brei, dom pakat, dom gah njauk pok panuac brei dom urang ilamu samar hu mbaok tame bruk piah ngak ka pasiam chất lượng jeng yau năng suất tabau yau bruk hu ngak ka phun padai dahlau daih. Hu yau nan meng caong langyah hu bruk patagok khang kajap ka phun tabau saong rai diuk di urang pala tabau./.