Mikva saong taong abih gauk pang rayo anit ranam! Bingu Hồng hu iek lac bingu di bruk meyut meyau saong haniem phul, hatai chung thủy saong bruk caong yam tal  siam mekre. Lac janih bingu hu rilo sambo, hu caik dalam bình, dalam lọ, pala chậu, pala bồn bonsai, pala ka nyu mekre vir taom dar sang. Dalam kadha “urang ngak hamu caong thau” harei ini, hu kadha vak tacei pato jalan pala bingu hồng di sang.

 Jalan ngak taneh dahlau tuk pala: Palih taneh atau pandap tasaoh hu độ tathuak ia siam oh caik ka ia pruh kandaong veik ngak khut gha, brei buh dahlau khak hữu cơ hu hoai mục piah buh ala bầu phun dahlau di tuk pala. Tuk pala tangin ieu khik phun, tangin hanuak lum haluk vir taom dar gol, kateik tangin tame phun brei phun dang tapak, plaih ngak klaoh gha phun, pala bloh pruh biak ralo ia. Iek tui kích thước bồn atau chậu bo palih khoản cách giỏ lagaih khik ka hala phun hu ginup pandiak ia harei, jui pala biak jaik gauk phun nyu tamuh vống glaong kayua meriak mek ia harei.

 Iek glang: Meng 10 tal 15 harei tuk phun tabiak gha tamuh hala meda  ye buh pabak khak asar yau: Dynamic, khak cim thu, khak NPK atau DAP… buh vir taom dar gha phun, buh bloh lum taneh veik, pandar cung cà phê piah định lượng khak drak ka an toàn. Nyaih ngak klaoh gha  saong khak oh brei buh jaik gol. Hadei di nan pruh veik ia daong ka phun bingu hấp thu siam dinh dưỡng. Bhian cakak klak hala bingu khut, ngan saong bingu rak brei cakak klak, tuk cakak brei cakak jhung tal dua tal hala piah ka phun bingu hồng hu pren tabiak dhar barau, meng yaok akaok dhar nan hu tabiak dom catai bingu barau. 

Tui iek meyah phun tabiak dhar barau hu sambo meraih saong dhar praong nan lac phun hu pabak ginup dinh dưỡng. Cagar veik phun bingu hồng tabiak dhar sit sot ye brei patagok bruk iek glang ka mbang kacak dhar mbang hadei. Pala bingu hồng brei hu bruk caik hatai iek glang di urang pala, pabak veik, tuk bingu hồng rak nyu ba bui sambai ka menuac sia ./.