Ini lac bruk ngak akaok meti di danak dak “Xuân halan hatian – Tết anit ranam thun 2015” rah tabiak di 3 huyện Ba Vì, Mê Linh, Mỹ Đức. Dalam harei akaok meti ini, mban tổ chức hu alin hadiah 150 paok pandap, yaok paok yaom 700.000 đồng brei ka 150 uranaih bangsa takik, dam dara urang ngak gaok kan kandah, urang joh jo. Yaom lac pandap oh praong hagait min ini lac bruk pachreih ba biak praong, ba bui sambai ka dom uranaih, urang kan kathaot, urang joh jo tuk dom harei tết anek sak pabe daok jaik tal. Saai Phạm Thị Tám, urang joh jo daok di xã Mê Linh, huyện Mê Linh, ban Hà Nội brei thau:

“Sang dahalak biak kan kandah, amaik taha saong 3 adei saai jeng joh jo, daok sit, hu taeng dahlak ngak bruk daong ka baoh sang. Barau ini hu kapul chữ thập đỏ brei sa mac jhik, nao pakacah saong pasram megru di HN. Hu doanh nghiệp jhik Phương Nam, daong brei hu bruk ngak saong hu daong ka baoh sang. Harei ini taduan hu pandap Tết di Thành đoàn dahlak biak uan tabuan saong dhar phon bruk sangka di dom pakat”.

Saai Nguyễn Quốc Tuấn, Phaok akaok kapul Liên hiệp dam dara Việt Nam ban Hà Nội brei thau: Ini lac thun ka 5, Thành đoàn- kapul Liên hiệp dam dara Hà Nội peih danak dak “Xuân halan hatian – Tết anit ranam”, brei mboh bruk sangka di dom tổ chức Đoàn – Hội, dom doanh nghiệp dalam ban HN tuk Tết Nguyên đán. Meng bruk ngak ini, kapul Liên hiệp dam dara ban HN caong khin hu ralo jang gac dom urang daong, urang ngak pahala ba tangin tame, klah rabha ngan saong dom urang gaok kan kandah piah urang hu pren saong hatai jia dalam rai diuk. Saai Nguyễn Quốc Tuấn lac:

 “Akaok meti mai meng bruk kol dahlak  caong khin hu bruk klah rabha dom kan kandah ngan saong urang, hu rik hasit pandap piah ka urang hu mbang tết bui sambai tapen gauk gar dalam baoh sang. Njauk ndom tal dom doanh nghiệp abih hatai jai daong ka bruk ngak ini di Thành đoàn saong kapul liên hiệp dam dara ban HN. Dalam thun ini kol dahlak alin hadiah 300 paok pandap saong jien, yaok paok yaom 500 ribau đồng dalam nan lac jien saong pandap. Yau nan abih tih yaom jien tagok tal 200 triệu đồng”./.