Lac labik hu ralo bhap bini Chăm daok, dom thun tapa, xã Phước Hữu, huyện Ninh Phước biak sangka tal bruk ba bruk ngak ka baoh sang urang kamei Chăm saong mek hu rilo siam mekre biak njauk pok meyaom. Nao dahlau nan lac kapul urang kamei xã. Piah daong ka urang kamei Chăm hu bruk ngak mbang tani tanat, patagok kinh tế baoh sang, kapul urang kamei xã hu pambuak bruk saong dom jabat, đơn vị peih tabiak ralo danak dak, dự án ba bruk ngak tapa bruk pachreih dom baoh sang urang kamei mesraiy phun jien piah pablei salih sit, raong glang; peih ngak dự án pato bruk ngak pambuak saong ba bruk ngak barau….tapa nan, hu daong ka baoh sang urang kamei Chăm dalam palei hu bruk ngak tani tanat, paglaong jien mek tame, dak harei dak salih barau rai diuk. 

Saai La Thị Thanh Thủy daok di palei Hữu Đức, xã Phước Hữu, huyện Ninh Phước, tỉnh Ninh Thuận lac sa dalam dom urang hadah krah di dự án pato bruk ngak pambuak saong ba bruk ngak barau. Hadei di sa bilan hu mbaok tame khoá bac ngak mbang huak kayua kapul urang kamei xã Phước Hữu peih tabiak, tal urak ini saai Thủy hu sa bruk ngak tani tanat, saong yaom jien mek tame oh lac takik. Tuk hu likhah caga, lễ, tết, mikva dalam palei jeng mai daa saai nao ngak mbang huak. Kayua dom janih saai ngak jeng mbang njauk cambuai bhap bini, bo yaom kaom jeng mbiah, knan ye mikva thei jeng takre. Saai Thủy khan lac:

“Sap Chăm”

Bruk peih ngak dự án mesraiy phun jien ba bruk ngak di kapul urang kamei xã Phước Hữu jeng mek hu rilo siam mekre njauk pok meyaom, hu daong ka labaih 200 adei saai kamei Chăm padang labik pablei salih sit, peih praong dom bruk pablei salih. Taphia di nan, adei saai kamei jeng hu jien mek tame. Amuk Bá Thị Thu Vân – akaok kapul urang kamei Chăm xã Phước Hữu, huyện Ninh Phước, tỉnh Ninh Thuận brei thau:

“Sap Chăm”

Oh lac xã Phước Hữu saoh, bo di xã Phước Hải, huyện Ninh Phước, bruk ba bruk ngak ka urang kamei Chăm dalam tukvak tapa jeng hu peih ngak siam. Meng phun jien mesraiy ba bruk ngak di gilang pariak sarak karja huyện Ninh Phước, kapul urang kamei xã Phước Hải hu brei ka 600 baoh sang urang kamei Chăm mesraiy phun jien piah raong limo menek. Tui nan, yaok baoh sang hu mesraiy meng 15 tal 30 triệu đồng. Meng nan, rai diuk di ralo baoh sang urang kamei Chăm hu salih barau. Amuk Kiều Thị Lâm Viên – phaok akaok kapul urang kamei xã Phước Hải, huyện Ninh Phước, tỉnh Ninh Thuận lac:

“Sap Chăm”

Oh lac tok hu 2 xã Phước Hữu, Phước Hải ngak siam bruk ba bruk ngak bo dalam tukvak tapa, jaik abih dom palei dalam tỉnh Ninh Thuận hu ngak siam bruk ini. Tapa nan, daong ka yaok ribau urang kamei Chăm jeng yau urang kamei bangsa takik tỉnh Ninh Thuận duah hu bruk ngak lagaih, patagok jien mek tame, salih barau rai diuk. Ini jeng lac sa dalam dom bruk ngak praong dalam bruk patagok kinh tế ngak nông, palei pala, daong samar ngak salah danak dak bruk ngak pakat negar padang ngak palei pala barau di tỉnh Ninh Thuận./.