39 thun hadei di harei gah Meraong hu peih paha, Bai Gon –ban raya Ho Chi Minh jeng sa pasak kinh te, ilamu di taneh ia. Ngan saong labik lac dang kaok  bhum kinh te praong di gah Meraong, ban raya Ho Chi Minh daok mbeik drei, yam tapa dom kan kandah piah nao tal dahlau dalam bruk cong nghiep hoa, hien dai hoa.

39 thun tapa, min harei 30 bian 4 thun 1975 tuk halei jeng daok miat dalam akok sahneng di kien truc su Nguyen Huu Thai. Page harei nan, bộ đội drei meng dom gah yau ngin yau ribuk taong tame Ban Gon. Kol nguy quân, ngụy quyen Ban Gon tayah tayaic. Ong Thai saong dom kapul daok kandauk gah dalam, daok caga ba jalan ka bol lin peih paha tame dom labik praong.

Tuk pabah mbang dinh Doc Lap njauk radaih tăng di drei ginuh jaleih, đại đội trưởng Bùi Quang Thận pan hala daok nduac tagok, ong Thai saong giáo sư Huỳnh Văn Tòng tacei ba jalan tagok tabung dinh Doc Lap. 11tuk meteh, hala daok bhong patuh kanjik hu tuan tagok tabung dinh dalam sap klao sambai chreih chrai saong sap phao patuh dane tagok langik.

Patui di nan, ong Thai nao haong Tổng thống Dương Văn Minh, Thủ tướng Vũ Văn Mẫu, Chính ủy Bùi Văn Tùng saong sa urang vak mbao Tây Đức…ndik radaih nduac nao gah rayo papar sap. Di labik ini, Tổng thống Dương Văn Minh hu panuac lac taduan alah bol lin peih paha. Ong Thai hadar veik: “Tuk rayo papar sap tabiak panuac taduan  alah di ong Dương Văn Minh saong panuac chấp nhận di chính ủy Bùi Văn Tùng ye tal mong 2, maong 3 biar harei ye Bai Gon chreih chrai gilac veik, bhap bini bui sambai, abih di nyu nan lac dom dam dara tabiak ndom biai bui sambai haong bộ đội. Mboh oh yau sa harei peih paha gah quan su bo lac sa bruk pataom mbaok di sa baoh sang praong hadei di dom pluh thun calah gauk”

Gah Meraong hu peih paha, ong Thái saong bhap bini Bei Gon – Ban raya Ho Chi Minh yam tame raidiuk bharau. Rilo kan kandah dak angaok gauk, min ong saong dom rairah jeng daok khang hatai jia tame bruk cách mạng, rik pren yava tame bruk dak padang veik taneh ia.

39 thun, ban raya Ho Chi Minh nao biak samar angaok jalan cak rok patagok. Abih di nyu nan lac dalam tukvak salih birau, Đảng bộ, karja saong bhap bini ban raya patagok ilamu hadah krah, sami samar, jalan ngak birau, jalan sahaneng birau piah mek hu jak jeng praong di taong abih gah, jeng labik dang akaok kinh te taneh ia.

Hu bruk tacei ba naih gheih di Đảng bộ, karaj ban raya, yaom lac gaok kan kandah kayua suy thoái kinh tế dunya, min tukvak 2011- 2013, kuhria rah tapa pandap ngak tabiak dalam taneh ia iew lac GDP di ban raya tagok 9,6%, rilo jang 1,74 mbang dut saong dalam taneh ia; GDP kuria tui yaok akok manuac hu 4.513 dola My sa urang di puac thun 2013.

Ban raya hu pataom prein khang piah peih ngak dom bruk quy hoạch đô thị, dom khu công nghiệp, patagok gah jalan mbak. Rilo danak dak hu jeng bruk hadah mbaok meta di urang ban raya, nan lac: jalan lubang tapa kraong Ban Gon, jalan raya Võ Văn Kiệt, Phạm Văn Đồng, jalan Hoàng Sa – Trường Sa, khu đô thi Phú Mỹ Hưng.

Hu brei angan lac ban raya anit ranam, ban raya hu ba tabiak rilo danak dak gheih saong hu yaom galong, hu pambak praong tal grauk labik dalam taneh ia. Jaik abih nan lac danak dak blah blah harak anit ranam; danak dak grap tanat drak apsar, bruk “3 patak pataom, 3 daong gauk”, danak dak “ trun baoh sang kan klathaot, paralo sang kaya meda”…         

Abih di nyu nan lac, dalam bruk patagok kinh tế, dak gaok kan kandah ye labik dang di doanh nhân Bai Gon dak hu mboh cambaic lac jang. Tui jalan khin sahaneng, khin ngak,  khin dang anak dom kan kandah, doanh nhân ban raya ba tabiak rilo angan je pandap Viet dang kajap di darak pasar dalam taneh ia saong yam tabiak negra langiu. Ong Pham Ngọc Hưng, Pho akok Kapul  Doanh nghiệp ban raya uan tabuan khan lac: Atah di ini 10 thun, pandap Thái Lan tame Viet Nam biak rilo. Min meng bruk sami samar di ban raya, pandap panda di Viet Nam urak ini pabak abih. Oh lac meriak pandap Thai Lan di Viet Nam bo daok meblah pandap Campuchia, Lào, Myanma. Ngan saong Doanh nghiep ban raya Ho Chi Minh pagam samar saong bruk salih birau ilamu- cong nghe ngak tabiak rilo pandap piah pakacah siam di darak pasar.

Urak ini, ban raya oh daok baoh sang kan kathaot tui tanut chuẩn negar, baoh sang kan kathaot tui tanut birau di ban raya nan lac 16 trieu dong sa urang sa thun daok hu 130 ribau baoh sang, meblah 7,12% baoh sang dalam ban raya.

Min, taphia di nan, ban raya jeng daok rilo tavak tavaiy, nan lac bruk cak rok patagok kinh te samar min oh khang kajap ; cơ sở hạ tầng saong kỹ thuật xã hội yaom lac hu patagok min oh ka sumu bruk  đo thi hoa, oh pabak sumu bruk patagok kinh te saong salih birau raidiuk; bruk tachrauk nerak alam moi truong…

Piah ba ban raya cak rok patagok tui jalan birau, tui Quy hoạch tổng thể patagok kinh te – xa hoi mbiah tal thun 2020, pamaong tal thun 2025 pagam saong Quy hoạch tong the patagok kinh te xa hoi bhum pasak praong gah Meraong tal thun 2020, pamaong tal thun 2030 di Thủ tướng Rajaei, ban raya Ho Chi Minh kham merat jeng do thi van minh, salih birau, nao dahlau dalam bruk  cong nghiep hoa, hien dai hoa, dak harei dak jeng pasak  praong gah kinh te, jien padai, pablei salih ialmu – cong nghe di taneh ia saong bhum Dong Nam A. Ong Le Hoang Quan, Akok Uy ban bhap bini ban raya Ho Chi Minh khan lac: Patagok sa pasak praong pataom rilo bruk ngak brei mboh labik dang saong bruk ngak di Ban raya Ho Chi Minh ngan saong bhum kinh te praong jeng yau dalam taneh ia. Kham merat tal thun 2020 gilac nao brei sumu saong dom ban praong dalam khu vực. Ini jeng lac bruk biak hadah mbaok meta min jeng lac biak trak.

Tui jalan sami samar, hadah krah, oh kadun likuk anak bruk kan kandah, Đang bo, karja saong bhap bini ban raya Ho Chi Minh meda khang takai yam tagok piah nao tal dahlau dalam bruk cong nghiep hoa – hien dai hoa taneh ia./.