Dalam saman barau, tín ngưỡng bhap bini jeng daok lac sa kadha oh kurang hu dalam rai diuk, nyu daong khik ramik saong patagok jalan diukrai siam hatung hatai. Adat pok kakuh Pô Hùng dak harei dak njom dalam tame akaok sahneng di bhap bini VN, ngak pamedeih hatung hatai anit ranam dalam yaok bhap bini, lac talei pambuak pakajap urang Việt saong gauk, lac jalan piah ngak jeng bản lĩnh di bangsa. Kadha vak hadei ini di Nguyễn Anh Tuấn angaok harak báo Phú Thọ, daa mikva saong taong abih gauk tui pang:

Dalam bruk pok kakuh pô Hùng, langiu hatai caong hu rai diuk siam mekre, hanem phol, dom urang daok diuk hu sarak tame dalam hatai jalan diukrai “menyum ia hadar tal halau ia”, thau anit ranam gauk daong ba gauk saong hadah mbaok meta ka ilamu di bangsa. Dom yaom glaong ilamu tapa bruk pok kakuh po Hùng nan lac jalan ba tal anit ranam taneh ia, jum pataom bhap bini, hatai dũng cảm, pachreih ba anek menuac pamaong tal halau gha. Bruk pok kakuh po Hùng brei mboh talei rohim siam mekre meng baoh sang, tal puk palei, tal taneh ia, khik ka talei rohim di yaok menuac urang saong bhap bini hu khang kajap, jalan diukrai siam mekre saong hatung hatai anit ranam gauk hu iek praong.

Bruk pok kakuh po Hùng nan nyu pabak hatai caong di anek menuac. Dahlau daih, urang Việt jeng yau bhap bini Phú Thọ jeng diuk rai ralo meng bruk ngak nông, nan ye dom bruk meng lingik tasik yau pandiak bhang, hajan ribuk, bala… jeng ngak kan kandah biak praong tal rai diuk. Kayua yau nan ye, urang hu hatai jia saong caong hu bruk sraong daong  di dom po Hùng.

Bruk pok kakuh po Hùng daok lac sa ilamu hadah krah di urang Việt, lac tiềm năng ilamu hu yaom glaong. Dalam hatai sahneng di bhap bini, po Hùng gam lac Thủy Tổ, gam lac Pô Yang, urang padang taneh ia min jeng lac urang iek glang ka rai diuk di bhap bini, gam ginreih, gam daok jaik. Bhap bini dalam taneh ia yaok thun hu peih ngak harei pacit piah hadar dhar phol Thủy Tổ peih taneh ia nan lac ilamu hadah krah dalam ilamu di urang Việt Nam tapa bruk pok kakuh po Hùng. Bruk pok kakuh po Hùng nan nyu pambuak pagam saong đạo đức di urang VN, jeng lac kreih camin brei mboh dom hatai jia saong adat cambat tanarakun meng kan di bangsa.

Agama, hatai jia tame sa agama halei nan urak ini lac bruk praong dalam giao thoa ilamu. Thủ tướng rajaei hu mbaoh tangin brei peih bruk ngoại giao ilamu tal thun 2020 piah jhul pakhang ngoại giao ilamu piah ka dunya thau jang ka anek menuac, taneh ia saong ilamu VN, bruk pok kakuh po Hùng nan lac sa kadha praong piah paglaong labik dang di taneh ia, ngak jeng labik pachreih urang mai du lịch saong buh jien tame ngak mbang.

Gam saong nan, bruk ieu pataom urang rik jien padai, pren yava saong ilamu tame ka taneh ia tapa bruk pok kakuh po Hùng dalam dom thun tapa biak siam lagaih oh lac ka bhap bini dalam taneh ia saoh bo daok hu gam abih bhap bini urang Việt daok diuk rai atah palei negar. Urang Việt daok pak halei jeng hu padang labik kakuh po hùng di pak nan, ngak padhi hadar dhar phol po Hùng. Bruk uan tabuan, hadah mbaok meta ka halau gha hu ngak ka urang jeng dom menuac ba ilamu bangsa nao tal dunya. Yaih khan saong paglaong labik dang di taneh ia tapa bruk ngak ilamu saong hatai jia, nan jeng lac dom jalan ngak bahrau biak siam saong khik caga ilamu bangsa.

Meda ndom lac, dom yaom glaong di bruk pok kakuh po Hùng hu ngak ka dom po hùng, dom anek bhik saong dom tướng lĩnh dalam saman po Hùng hu pok kakuh, patagok, khik kajap saong daok veik mbiah tal harei ini./.