Umo birau 10 thun, min adei Lê Mỹ Kim, anek saih tal bac 5C, sang bac Tiểu học Hà Huy Tập, huyện Krông Ana, Đắc Lắc gaok rilo pandik harao, metui amaik, metui ame. Amuk jeng maik di Kim lac: “ Tuk nyu 5 thun, ruak urang thư phổi ngak ka ame nyu palang lahik. Thun hadei, kayua sang kan kandah, oh hu jien iek ruak, amaik di Kim jeng plang lahik kayua ruak xuất huyết não”. Oh daok amaik ame, Kim hu ong muk jeng maik ba mai raong. Yaom lac sang kan kandah min adei kham merat yam tapa, bac da-a naih joi 5 thun gam, hu gru anit, ayut ranam. Min, bruk nao bac di adei daok rilo glaih glar tuk yaok harei adei brei nao takai labaih 3 mbaik jalan meng tal labik bac. Mboh bruk kan kandah, glah glar nan, birau ini, Kadung jien daong uranaih tỉnh Dak Lak alin brei sruh radaih juak yaom 1,5 triệu đồng piah ka adei nao bac hu mbuan lagaih jang. Kim khan lac: “Sruh radaih juak ini lac pandap alin hu yaom biak praong ngan saong dahlak, hu sruh radaih juak ini dahlak nao tal sang bac samar jang. Dahlak kham merat bac piah pabak hatai caong di ong muk, anai gru, cei gru saong taong abih mikva..”

Daok ngan saong ong Hoàng Văn Vệ daok di palei Sơn Trà, xã Bình Hòa, huyện Krông Ana oh plaih hu druat druai tuk hu kadung jien daong uranaih tỉnh Dak Lak alin brei sruh radaih lăn ka Hoàng Văn Minh, anek likei ruak metai glo akaok jaik 10 thun ini mai. Sang ong biak kan kandah; oh hu taneh pala drak, diuk pasang ong nao ngak mbang apah, anek likei bhian ruak kik, sang dak harei dak kan kandah jang. Caong khin hu sruh radaih lăn piah lagaih nao mai saong ba anek nao bac hu jeng biak. Ong Hoàng Văn Vệ brei thau: “Anek nyu jaoh jo yau ini hu karja palei sangka daong brei sruh radaih lăn dahlak biak bui. Dahlau diah hu sruh radiah lăn klak khut ye min oh hu jien blei radaih birau. Hu sruh radaih lăn ini  daong ka amaik ame  oh daok pok anek piah ngak dom bruk karei.”

Lê Mỹ Kim, Hoàng Văn Minh nan lac dua dalm yaok ribau uraniah sang kan kandah, jaoh jo hu kadung jien daong uranaih tinh Dak Lak  daong. Meng thun 2011 mbiah tal ini, Kadung jien daong gam gam ka jaik 400 uranaih metui medhar oh hu thei raong, saong labaih 1.500 uranaih jaoh jo, daong blaic raih baoh hatai, pasiam chức năng ka jaik 1.500 uranaih saong yaom jien labaih 14 tỷ đồng, alin jien bac ka jaik 6.000 anke saih, alin pandap saong daong pandap dinh dưỡng ka labaih 24 ribau uranaih sang kan kandah di dom xã bhum atah bayah, bhum urang bangsa takik ngan saong yaom jien labaih 6 tỷ đồng. Ong Lâm Đình Nhiên, Giam đốc kadung jien daong uranaih tỉnh Dak Lak brei thau, dalam tỉnh urak ini daok labaih 9.700 uranaih metui medhar, 10.700 uranaih jaoh jo. Tukvak anak tal, kadung jien daong uranaih tỉnh brei jak ba padang Kadung jien piah daong dom adei saong amaik ame di dom trun meneing kan kandah, yam tagok dalam raidiuk:“ Thun 2016, Kadung jien daong uranaih brei jak ba dom kapul dalam saong langiu tỉnh, dom kapul dunya piah ngak dom danak dak yau: blaic raih dị tật ka uranaih njauk jru mek kalik kruac, uranaih ruak baoh hatai. Langiu di nan, kham daong ka dom sang bac uranaih bhum atah bayah, jien bac ka anek saih kan kathaot bac da-a naih joi saong alin radaih ka uranaih jaoh jo”

Meng dom bruk ngak siam lagaih mboh di anak meta di Kadung jien daong uranaih tinh Dak Lak hu peih tabiak jalan ka yaok ribau uranaih dalam tỉnh yam tapa dom kurang lahik, kan kandah kathaot rambah, klah rabha dom pandik harao, daong ka dom adei yam tagok dalam raidiuk./.