Kapul daoh tamia bhap bani Cam tỉnh Bình Thuận thei jeng ranam bruk ngak saong abih hatai dalam bruk ngak di drei

Labaih 16 thun kak kajap haong Kapul daoh tamia bhap bani Cam, sa-ai Xích Văn Trực yau thau hu abih ka bruk trun tagok di urang nghệ sĩ, abih di nyu lac nghệ sĩ daoh tamia ragu ragam bangsa. Lac sa urang oh kurang hu dalam đội nhạc di kapul, sa-ai Trực haong dom adei sa-ai dalam Kapul nao parang me-in grauk labik dalam tỉnh saong duh ka bruk chính trị. Piah patagok jien mek tame ka adei sa-ai, kapul daok hu nao parang me-in danak dak daoh tamia di dom labik ma-in sambai, dom Resort… 

Sa-ai Trực brei thau, dahlau di tuk jit Covid-19 rah tabiak, adei sa-ai diễn viên dalam Kapul hu rilo mbang parang me-in di gah langiu, nan ye hu jien mek tame, min meng di tuk jit Covid-19 tamuh khang dalam negar jeng yau di Bình Thuận, ye dom mbang parang me-in di gah langiu takik nao, ngak kan kandah  oh sit tal rai diuk di adei sa-ai: “Kayua Covid -19, adei saai dalam kapul gaok biak rilo kan kandah…”

Jeng meng hatai takre nghệ thuật, ranam ilamo di bangsa, sa-ai Thổ Minh Vượng hu kak kajap haong Kapul daoh tamia Cam tal harei ini. Sa-ai Vượng brei thau, lac sa urang taong Ghi-năng, nan ye jien mek tame jeng lac meng jien bilan saong dom mbang nao parang me-in di gah langiu. Anak bruk jit Covid-19 rah tabiak, padeih di sang, sa-ai nao ngak hamu apuh, gam pathram veik dom alat ragam Cam piah paglaong ilamu: “Meng nan rilo meng lac ragam ragu bhap bini di drei, min urak ni bac veik dom rau bahrau, yau ye ginang dien, ginang jazz,…”

Bruk kan kandah di 2 nghệ sĩ nan, lac sa  dalam rilo rilo dom kan kandah bo gah nghệ thuật jang yau gah ilamo daok gaok. Kayua yau nan ye, piah ka dom nghệ sĩ ngak dalam gah ilamo nghệ thuật yam tapa kan kandah saong oh hu thei njauk klaak veik gah likuk dalam bruk mesruh pacang jit Covid-19, gah ilamo njauk hu dom jalan ngak njauk, laghaih haong bruk daok rah tabiak. 

Sa-ai Tiền Duy Tân, Akaok Kapul daoh tamia bhap bani Cam tỉnh Bình Thuận brei thau, kapul urak ini hu 29 urang, dalam nan hu 20 anek kamuan urang Cam. Dom adei jeng hu bac megru chuyên nghiệp. Meng harei padang tagok tal ini, kapul hu nao parang me-in di rilo tỉnh ban, dalam dom bruk prong di taneh aia yau: Harei pataom ilamo dom bangsa Việt Nam, Festivan Huế, Nyaom biai pakat glaong Asean 37, adit gul pataom dom bangsa di Hà Nội thun 2020…

Dalam danak bruk ngak yaok thun, urang pal akaok kapul bhian caik hatai tal bruk roh duah yaom ilamo nghệ thuật bhap bani di dom bangsa dalam tỉnh tapa dom kadha eng drei padang ngak saong parang me-in, ngak jeng kadha biak karei. Meng nan bo hu angan di dom mbang pakacah, harei pataom diễn nghệ thuật pakat negar. Saong jaik di ini lac giải nhất brei kadha hòa tấu “Âm vang nguồn cội” saong giải nhì brei ka nghệ sĩ Văn Trực ngan haong kadha “Saranai harei roya palei negar”, “Cầu mùa”dalam mbang pakacah độc tấu saong hòa tấu alat ragam bangsa pakat negar thun 2020.

Tui sa-ai Tân, dalam kan kandah kayua bruk pambak di jit Covid-19, ye kapul nyaom daoh tamia bhap bani Cam daok hu kadha kan kandah karei: “Kan kandah prong abih urak ini lac umo thun saong umo bruk ngak, tuk bo abih umo bruk ngak blaoh bo umo thun jeng daok ye nan lac sa dalam dom bruk duh hatai di adei sa-ai ngak nghệ thuật, abih di nyu lac ngak dalam kapul ini. Bruk kan kandah ka 2 nan lac bruk palih ruah menuac tame piah pabak manuac ngak dalam kapul urak ini jeng biak kan. Urak ini rilo menuac daok huac tui bruk ini.”

Jaik abih dom adei sa-ai dalam kapul daoh tamia bhap bani Cam tỉnh Bình Thuận thei jeng ranam bruk ngak saong abih hatai dalam bruk ngak di drei. Abih di nyu lac dom danak dak parang me-in duh ka chính trị di dom bhum palei atah bayah, bhum urang bangsa takik. Min piah ka adei sa-ai sahanag hatai ngak bruk saong kak kajap haong kapul, saneng lac gah ilamo tỉnh Bình Thuận brei hu dom sarak salih labik ngak, pato pathram veik, salih bruk ngak ka nyu laghaih piah ka urang ngak daok hu patagok ilamu di drei./.

    Urang lang: Jasi – 14/03/2021