Hu iew lac kapul urang bac si halan hatian iek ruak di phuong 15, quan 5, ban raya HCM, min biak di nyu kapul tok hu 1 bac sy, daong bruk nan lac 2 urang jakar di Kapul chữ thập đỏ phuong, saong sa urang kumei jakar urak ini lac Akok Uy ban mat tran negar phuong 15, quan 5. Ini lac dom urang tuk halei jeng abih hatai saong bruk iek ruak piah ba prein yawa, haniem phol mai ka dom baoh sang kan kathaot, dom urang taha daok sa drei dalam phuong. 

“Kapul Bac si halan hatian iek ruak ka urang kan kathaot” di Phường 15 - Quận 5 tabiak rai atah di ni labaih 4 thun, kayua bac sy Phan The Nghiep, dahlau diah ngak Giam đoc Quan y vien 115, Đại tá bác sỹ padeih huu dang akaok kapul. Dom thun tapa, hu bruk daong di dom pakat karja, kapul bac sy halan hatian iek ruak hu dom bruk ngak iek glang prein yawa  ka urang kan kathaot yau peih bruk iek ruak brei jru saong alin pandap ka labaih 300 boah sang kan kathoat di 5 khu pho labaih 80 trieu dong. Langiu di nan, piah ngak siam bruk “ bayar dhar phol”  tukvak harei 27/7, kapul bac si halan hatian iek ruak hu pambuak bruk saong UBMT negar phuong nao rivang saong alin hadiah pandap, iek ruak saong brei jru ka 50 baoh sang dalam sarak karja kan kandah  abih 10 trieu dong. Langiu di nan, daok peih bruk tacei pato jalan iek glang prein yawa tapa phon saong iek ruak ka urang kan kathaot tuk caong khin. Meng dom bruk ngak yau nan, kapul  Bac si halan hatian iek ruak hu daong ka pakat Đảng, karja phuong ngak siam bruk an sinh XH, bruk patrun kan kathaot, patagok baoh sang kaya meda tui tanut ba tabiak di ban raya. Amuk Nguyễn Thị Hồng, Akok Ủy ban Mặt trận  phường 15, quận 5 brei thau:  "Dom thun tapa bruk ngak di kapul halan hatian iek ruak hu daong ka khol dahlak  biak rilo dalam bruk an sin xa hoi di phuong, kapul bac sy daok rik daong alin brei harak BHYT ka urang kan kathaot. Taphia di nan, bac sy Phan The Nghiep daok kaoh tabiak jien bilan padeih huu di drei saong jien Wa taduan hu meng kadung jien daong ka urang njom jru mek kalik ruac piah brei ka daom baoh sang kan kathaot nyim ngak mbang oh mek laba".

Lac phuong hu rilo urang Lo daok, baoh sang kan kathaot hu rilo, bruk ngak mbang kinh te kan kandah, yau nan ye bruk iek ruak takik hu mikva sangka. Meng hatai lac “gru jru yau amaik slut”, kapul bac si halan hatian iek ruak hu rik jien saong halan hatian iek ruak brei saoh ka urang kan kathaot dalam phuong.  Urak ini, kapul bac sy halan hatian iek ruak hu peih rilo mbang iek ruak, brei jru saong alin paok jien bac ka dom anek saih sinh vien kan kathaot, urang taha daok sa drei … Thun 2014, kapul hu daong 10 trieu dong ka amuk Nguyen Thị Út  lac urang kan kathaot daok sa drei dalam phuong ruak trak, saong hu daong panduan ba nao daok labik karei dalam tuk pasiam veik jalan hẻm. Amuk Nguyen Thi Minh sa urang daok di phuong 15, quan 5 brei thau: "Hu kapul halan hatian mai iek ruak brei jru ka dahlak. Jeng hu kapul iek ruak ini, dahlak meng thau lac drei ruak tagok darak, kapul bac si brei ka dahlak yaok bilan jru, ia tasau saong pandap karei tra, dahlak biak thau dhar phol kapul".

Hu oh takik bhap bini di labik ini hu mesre phun jien saong hu tapa truh kan kathaot. Min, takik urang thau lac phun jien nan hu padang tabiak meng hatung hatian di Đại tá, Bác sỹ Phan Thế Nghiệp. Ngan saong ong, ngak hu bruk hgait daong ka urang kan kathaot ye ong oh damen prein oh huac abih jien. Đại tá, Bác sỹ Phan Thế Nghiệp lac: "Dahlak biak anit urang kan kathaot, tapa dom mbang taom gaok tuk nao iek ruak haong kapul Quân y B2 blaoh harei lei jeng daok di sang iek ruak piah pato, hu dom urang kathaot tame iek ruak oh hu jien, saong yaok page ba gauk mai labik radaih ngak pahala piah urang brei pandap. Meng nan, dahlak sahaneng urak ini bruk ngak di drei pambuak saong phuong padang kapul halan hatian iek ruak ka urang kan thaot".

Dalam rilo kreih camin “Urang siam bruk siam” di ban raya Ho Chi Minh jeng yau di quan 5, kapul bac si halan hatian iek ruak di Phuong 15 – Quận 5 kayua bác sỹ Phan Thế Nghiệp dang kaok njauk lac sa kreih camin hadah ka bruk abih hatai jai dalm bruk iek ruak, ba mai prein yawa, haniem phol ka dom urang kan kathaot dalam xã hội ini./.