Sa-ai Đàng Sinh Ái Chi khan lac:Mboh hatung hatain di mikva pamaong tal palei Hamu Craok lac biak njauk iek praong kayua kham merat nao jak ba dom pandap panda kaya mbang piah daong ka mikva palei Hamu Craok dalam labik njauk pacang veik.

Palei Cam Hamu Craok di Ninh Thuận lac labik njauk pacang veik ka 6 bo kapul ngak pahla di mikva Cam palei Karang, xã Phú Lạc, huyện Tuy Phong, tỉnh Bình Thuận ba pandap nao daong. Hu padang tagok di akaok bilan 7, kapul ngak pahla tuk akaok mereip bahrau hu dom urang saong dalam nan rilo meng lac gru pato. Dom urang ini nao jak ba mikva dalam palei rik daong njam patam, baoh karaoh, ikan… piah ba nao daong ka mikva Cam palei Cavat daok njauk pacang veik kayua hu menuac njauk COVID-19.

  Amuk Đàng Thị Phi Yến, Akaok dhar kapul urang kamei palei Karang, urang kak kajap haong kapul ngak pahla meng tuk bahrau padang tagok.

Tuk jit ruak njaom mbak prong, kapul daok ngak bruk pahla meng nao jak ba dom urang ngak pahla piah daong ka bhap bani dom labik daok njauk pacang veik. Sa-ai Lư Sĩ Pháp, urang lambaok kapul brei thau, meng tuk tabiak rai tal ini, kapul peih ngak hu 6 mbang pandap, yaok mbang yaom meng 15-30 triệu đồng piah daong ka mikva daok di labik njauk pacang veik, labik brei daok karei di ban Phan Thiết, ban La Gi…  

Dahlau daih daok dalam labik pacang veik di palei Cavat nan ye sa-ai Nguyễn Thị Thu Duyên thau hu dom kan kandah di bhap bani. Nan ye, tuk palei Cavat hu peih talaih pacang cakak, sa-ai Thu Duyên hu mbaok tame kapul saong jak ba mikva dalam palei rik daong njam patam piah kapul ba nao daong ka urang kan kandah:  

“ Yaok adit jeng nao jak ba mikva brei njam patam, baoh karaoh, thei hu hagait brei nan piah daong ka mikva labik njauk pacang veik. Drei daok dalam labik pacang veik bahrau hu tabiak, drei mboh rai diuk di mikva dalam labik pacang veik biak kan kandah, kurang rilo janih”.

Amuk Bố Thị Xuân Linh – Akaok UBMT Negar Việt Nam tỉnh Bình Thuận taong yaom, dom bruk ngak pahla yau di mikva Cam palei Karang biak njauk iek prong:

  “Xã Phú Lạc hu rilo bhap bani jeng hu bruk rik pataom dalam palei piah daong ka dom labik brei daok karei, labik pacang veik. Abih di nyu lac dahlak mboh bruk gul pataom biak glaong di xã Phú Lạc piah daong ka mikva yam tapa kan kandah dalam tukvak tapa”.   

Yaom lac bruk rik daong oh ka rilo yau hatai caong khin, min ngan haong dom urang dalam kapul ngak pahla palei Karang, nan lac brei mboh bruk “anit ranam gauk, daong brei ka gauk”, piah ba gauk yam tapa kan kandah dalam jit prong COVID-19./.

Urang lang: T.Sĩ -12/9/2021