Tukvak tapa, rilo jalan palei di tỉnh Đồng Nai hu ramik pasiam saong hu padang ngak meng jien di Karja saong bruk rik daong di bhap bini. Njauk pok meyaom nan lac rilo urang ngak nong halan hatian brei taneh saong drap ar di drei yaom meng yaok rituh triệu tal labaih sa tỷ đồng piah daong pren haong Karja padang ngak jalan praong, siam, mbuan lagaih ka mikva nao mai. Sa-ai Nguyễn Văn Hùng, umo 47 thun, daok di palei Tân Tiến, xã Xuân Hiệp, huyện Xuân Lộc lac sa dalam dom urang yau nan. Sa-ai alin brei labaih 1.000m2 taneh di drei, yaom jaik 400 triệu đồng piah daong peih praong jalan Hiệp Tiến di palei.

Mai padang mbang ngui di xã Xuân Hiệp hu jaik 20 thun ini mai, sa-ai Nguyễn Văn Hùng tuk halei jeng hu mikva dalam palei anit ranam kayua tari taring, kham merat ngak mbang saong thau daong ka urang karei. Dahlau deih, jalan Hiệp Tiến lac jalan haluk sit, lingik pandiak ye thur mur, lingik hajan ye gluh baok, maikva nao mai, pajeng ba pandap panda biak kan kandah. Dalam bruk ba gauk padang ngak palei pala bahrau, tuk thau lac jalan hu peih praong, sa-ai Hùng brei tak klaak yaok ribau phun pa-ok blait, phun amriak kalu saong phun cà phê daok paik baoh saong yah paga tame dalam jaik 6 mét, jalan atah 140m, alin brei Karja labaih 1.000m2 taneh pala drak. Sa-ai Nguyễn Văn Hùng lac:"Meng bruk jak ba di UB bhap bini di xã Xuân Hiệp, dahlak mboh hu kein laba di sang drei, kein laba di bhap bini nan ye ginum haong sang kaoh brei taneh min hu kein laba harei hadei. Nan ye dahlak alin brei taneh piah ngak jalan. Jalan praong ye pandap panda jeng tabiak jeng hu mbuan lagaih, yaom pablei glaong jang, tui nan taneh riya jeng hu yaom jang. Dahlak mboh bruk ngak ini biak siam, biak hu kein laba."

Oh lac nao dahlau dalam bruk ngak tui sarak di Đảng, Karja, sa-ai Hùng daok kham merat pambuak haong karja palei pathau khan, jak ba dom baoh sang daok tapen dua gah jalan Hiệp Tiến ba gauk tak klaak kayau patau, yah paga tame saong alin yaok pluh ribau mét vuông taneh piah peih praong jalan. Meng nan, samar hu mặt bằng brei ka gah ngak jalan tuh menyek jalan Hiệp Tiến njauk tukvak ba tabiak. Ong Nguyễn Văn Ngọc, daok dalam palei nan, khan lac:  "Karja jak ba bhap bini alin taneh peih jalan, sang sa-ai Hùng taneh riya biak siam, ngak njauk lô, phun amriak kalu daok meda tak klak abih piah ngak jalan ka nyu samar. Sang adei jeng hu alin brei karja 4 sào piah peih jalan. Urak ini nao mai biak siam, dahlak mboh biak bui sambai."

Meng hu bruk pachreih tui, daong jien daong pren di mikva dalam palei, jalan Hiệp Tiến gluh baok dahlau deih hu tuh bê-tông menyek pandiak tui thiết kế praong 7m, atah 2.000m. Meng harei jalan hu ngak bloh, raidiuk ilamu di bhap bini hu patagok, rilo sang praong siam hu paga pacang hu padang tagok ngak brei hadah hadai puk palei, daong ba xã Xuân Hiệp ngak hu taong abih 19 tanut padang ngak palei pala bahrau meng thun 2013. Ong Trần Ngọc Linh, akaok kapul urang ngak nong xã Xuân Hiệp, huyện Xuân Lộc brei thau: "Hadei di tuk ngak salah jalan ini, mikva chreih chrai lô. Ini lac jalan ngak njauk piah daong ka mikva mbuan lagaih nao mai, ngak mbang. Biak pok meyaom bruk rik daong di sa-ai Hùng, dom phun amriak kalu, phun cà phê daok paik baoh min sang sa-ai halan hatian alin brei taneh saong phun pala"

Meng bruk alin brei taneh ngak jalan gam haong dom rik daong abih hatai jai ka bruk patagok kinh tế-xã hội di puk palei, urang ngak nong angan Nguyễn Văn Hùng hu jeng kreih camin hadah brei ka menuac sia bac megru, ngak tui./.