Phun jien brei mesre takik, yaom jien jhung glaong saong tukvak brei mesre katut panak nan lac dom cuang kandah ngak ka ralo urang nong di tỉnh Bà Rịa-Vũng Tàu tuk mesre phun jien meng Kadung jien daong ka urang nong mboh suh sah saong sahneng lac: njauk patui veik bruk mesre phun jien meng kadung jien ini halei oh?

Sa-ai Ngô Thị Kim Phượng, daok di palei Thanh An, xã Láng Dài, huyện Đất Đỏ mesre phun jien meng Kadung jien daong ka urang nong tỉnh Bà Rịa-Vũng Tàu piah “Raong limo palimek, limo menek” saong yaom jien 20 triệu đồng, tukvak mesraiy dalam 2 thun. Yaom jien ini, sa-ai Phượng oh ginup blei sa drei limo binai. Kayua yau nan ye, sang sa-ai njauk nao nyim jaik 16 triệu đồng tra meng blei hu sa drei limo binai mai raong. Sa-ai Phượng, lac: “Mikva drei khin hu phun jien ralo jang hasit kayua 20 triệu blei sa drei limo oh tal, tukvak mesre njauk tagok 3 thun, 2 thun ye jaik ralo”.

Sa-ai Phạm Xuân Hiệu daok di xã Hòa Hội, huyện Xuyên Mộc jeng mesre phun jien meng Kadung jien daong ka urang nong piah “Iek glang saong pasiam veik bein amriak kalu”, saong yaom jien 20 triệu đồng dalam tukvak 2 thun. Min, tui saai Hiệu, yaom jien ini oh ginup blei khak drak, jru khik caga phun pala ka 5 sào amriak kalu daok tabiak bingu (jien buh tame ka 5 sào amariak kalu jaik 40 triệu đồng). Sa-ai Phạm Xuân Hiệu caong khin lac: “Urak ini đồng jien nyu karei jang dahlau deih, meyah kapul urang nong brei mesre meng kadung jien ini meda brei tagok meng 30 triệu tagok meng hu siam jang”

Dalam thun tapa, Kapul urang nong dom pakat di Bà Rịa –Vũng Tàu hu brei ka jaik 380 baoh sang urang nong mesre meng kadung jien daong ka urang nong. Ngan haong yaom jien mesre ka yaok baoh sang meng 20 tal 30 triệu đồng, tukvak brei mesre katut panak meng 2 tal 3 thun  (tui dự án), jien jhung glaong (0,8% sa bilan saong 9,6% sa thun), nan ye ralo baoh sng hadei di tuk mesre blaoh mboh biak kan pandar hu njauk bruk kayua phun jien mesre biak takik dut haong bruk ngak di urang nong. Kayua yau nan ye, ralo urang nong dalam tỉnh urak ini mboh biak duh hatai, oh thau anak tal njauk patui veik bruk mesre jien meng kadung jien ini, atau duah labik karei hu phun jien brei mesre glaong jang piah buh tame bruk pala drak, raong glang. Ndom ka bruk ini, ong Võ Minh Giang, Phaok akaok Kapul urang nong tỉnh Bà Rịa-Vũng Tàu, brei thau:“Biak di nyu khaol dahlak thau abih, min ieu lac kadung jien daong hu makna oh lac brei mesre abih, bo urang nong njauk rik tame hasit, ka dua lac phun jien hu oh ka tal  40 tỷ đồng bo brei mesre abih labik dalam tỉnh ye yau sara tuh trun tasik, urak ini tui tanut brei mesre 20-25 triệu ka sa baoh sang meng hu ralo baoh sang mesre, meyah khaol drei brei mesre tagok 30-40 triệu ye takik baoh sang mesre hu phun jien ini, yau nan tal tuk halei phun jien hu ralo ye meng patagok yaom jien brei mesre ka yaok baoh sang ”

Kapul urang nong tỉnh Bà Rịa-Vũng Tàu daok pok panuac tagok Ủy ban bhap bani tỉnh saong Trung ương Kapul urang nong Việt Nam patagok yaom jien brei Kadung jien daong ka urang nong, piah patagok yaom jien brei mesre ka dom baoh sang urang nong. Kapul patui veik bruk jak ba piah ka urang nong thau cambaih saong hu mbaok tame bruk brei mesre ngak mbang meng Kadung jien daong ka urang nong, taphia di nan brei duah thau cambaih urang mesre piah phun jien hu urang nong mesraiy pandar njauk bruk./.