Kapul dom menuac ngak bruk tự do bhian oh hu harak gar brei thau ka labik daok, nan ye bruk daong rah tabiak oh siam di kapul dom menuac ini

Langyah ka bruk doanh nghiệp caga ngak veik min kurang menuac ngak, amuk Phạm Thị Ngọc Thuỷ - Yam ndok điều hành mBan roh duah patagok kinh tế tư nhân ndom lac, urak ini, yaom lac dom tỉnh ban brei adat peih veik bruk ngak mbang, pablei salih, min doanh nghiệp brei hu tukvak piah caga saong pasiam veik. Dalam tukvak ini, urang ngak oh daok jien piah mbang, cai. Kayua yau nan ye, urang ba gauk nao veik palei.

Pasang iek di mBan roh duah patagok kinh tế tư nhân ngan saong gah menyim jhik bahrau ini daok tacei tabiak sa bruk lac, hu rilo urang ngak di gah Meraong takik ngak harak pambuak bruk ngak haong doanh nghiệp. Meng nan, tuk jit ruak rah tabiak, karja kan yaok pataom saong takik hu jalan piah daong. Lingiu di nan, dom doanh nghiệp jeng oh hu adat halei piah pacap brei daong ka urang ngak, oh sanya tuk halei peih pabah mbang. Kayua yau nan ye, kapul urang ngak ini biak samar abih jangaih jien ndo saong ba gauk nao palei piah duah jalan ngak mbang bahrau.

Dalam tuk nan, pasang iek dom labik daok trọ saong dom doanh nghiệp tuai blei pandap, ong Nguyễn Duy Minh - Tổng Thư ký Hiệp hội Logistics Việt Nam (VLA) mboh lac, dom urang ngak tuh nao palei, dahlau di abih bhian lac menuac ngak  mbang pah di dom sang mac sit, dom doanh nghiệp Việt Nam. Ong langyah : "Dom doanh nghiệp FDI takik gaok bruk kurang menuac ngak kayua urang iek glang menuac ngak biak siam”.

Min oh njauk lac doanh nghiệp hu phun jien negar lingiu halei jeng sahanang hatai ka menuac ngak dalam tukvak bahrau. Ong Vũ Tú Thành – Phaok Yam ndok Điều hành Khu vực saong lambaok Việt Nam di Hội đồng Pablei salih Mỹ - ASEAN (US-ASEAN) brei thau, dom doanh nghiệp Mỹ daok parabha jeng 2 kapul. Ka 1, dom doanh nghiệp sit, bhian hu mala 200 menuac, oh rah tabiak bruk kurang menuac ngak. Luac dalam vaktu padeih ngak, menuac ngak di kapul ini jeng daok hu bayar jien bilan yau nao ngak, atau trun hasit min iek jeng.

Dalam tuk nan, dom doanh nghiệp hu yaok pluh rabau menuac ngak gah takhaok klik, jhik khan ao... bhian gaok kan kandah biak praong. Yaom lac hu bayar jien bilan meneing min bruk pacang nao mai di dom tỉnh daok ngak ka menuac ngak oh mai veik hu dom ban praong.

Chuyên gia Trần Đình Thiên tacei tabiak 2 makna ngak ka menuac ngak nduac nao palei. Ka 1, kapul dom menuac ngak bruk tự do bhian oh hu harak gar brei thau ka labik daok, nan ye bruk daong rah tabiak oh siam di kapul dom menuac ini. Bhum gah Meraong bhian lac bhum hu hatai siam, bhian daong ka menuac sia, min urak ini hu adat brei takik nao mai ngak ka bruk daong rahra gaok kan kandah. Dua bruk nan rah tabiak sa mbang haong gauk ngak ka jalan ngak mbang duah jien di menuac ngak jeng kan kandah. Tui ong Thiên, nan lac makna ba tal bruk menuac urang ba gauk nduac nao palei.

Makna ka 2 mai meng jalan daong. Ong mboh lac, bruk daong ka menuac ngak daok ngak bruk oh siam lagaih, peih jien brei biak biar, jien sanya ba tabiak kan tal tangin rahra. Kadha ini meda ngak brei kurang hatai jia tame bruk daong di karja.

Ong Thiên ndom lac: "Kol drei brei khang hatai pandar kadung jien karja piah patagok jien an sinh xã hội, daong ka menuac ngak. Kayua lac, daong ka menuac ngak jeng lac daong prein patagok di taneh ia"./.

Urang lang: M. Phương – 17/10