Bí Thư chi bộ palei Quàng Văn Thương brei thau, yau dom palei ilamu – du lịch karei, palei Mền tok hu tỉnh saong dom doanh nghiệp buh jien tame 200 tal 300 triệu đồng piah padang palei ilamu – du lịch. Min, kayua thau cambaih makna di bruk patagok du lịch ilamu pambuak saong patagok kinh tế - xã hội, nan ye dom thun tapa, ralo baoh sang daok di palei hu buh jien tame ngak pasiam veik sang danaok, ngak pandap thủ công meng kan, hu mbaok tame dom bruk ngak ilamu, daoh tamia, padang ngak veik dom rija roya meng kan piah taduan rok saong duh ka tuai du lịch. Urak ini, yaok bilan, palei jeng hu meng 10 tal 15 kapul mai du lịch.

Tame bilan bingu ban, atau tuk pahadar jayah ĐBP 7/5, meda lac harei halei jeng hu tuai, hu harei hu meng 5 kapul mai rivang palei. Tui yaom meng 100 ribau đồng tagok ka sa urang mbang, ndih 50 ribau đồng sa urang sa melam, gam saong jien mek tame meng bruk daoh tamia, yaok thun palei jeng hu jien mek tame tani tanat meng 150 tal 200 triệu đồng. Meng thau khik kajap dom bruk ilamu – du lịch bo sang kan kathaot di palei Mền trun daok takik dalam dom thun jaik di ini, rai diuk di bhap bini hu paglaong. Bí Thư chi bộ palei Mền - Quàng Văn Thương  brei thau:

“Dahlau daih tuk oh ka padang palei ilamu du lịch ye palei kol dahlak jalan mbak, sang danaok oh hu hacih saat yau urak ini. Meng tuk tut angan tame padang palei ilamu du lịch, hu taduan rok ralo kapul tuai damuai mai ye rai diuk di bhap bini salih barau biak ralo. Piah taduan raok dak harei dak ralo kapul du lịch, kol dahlak hu tacei kapul daoh tamia brei pasram megru piah yaih khan dom kadha ndung bak ilamu bangsa; dom pandap mbang ralo meng lac dom pandap mbang di urang Thái. Abih di nyu nan lac, khan ao ye njauk lac khan ao meng kan di bangsa drei”.

Rai diuk di bhap bini daok di palei Phiêng Lơi, xã Thanh Minh, ban sit  Điện Biên Phủ jeng hu salih barau biak rilo hadei di labaih 10 thun peih bruk ngak ilamu du lịch. Dom kapul yau kapul dam dara, kapul urang kamei… jeng hu jien mek tame piah pabak tame kadung jien ngak bruk. Saai Quàng Văn Muôn, Bí thư Chi đoàn palei Phiêng Lơi brei thau:

 “Meng tuk hu brei angan lac palei ilamu, dom tuai damuai du lịch mai rivang palei ye rai diuk di bhap bini hu salih barau biak ralo. Kayua tuk hu tuai mai, dom baoh sang hu ngak mbang huak taduan tuai,  urang đoàn meda hu mbaok tame bruk ngak mbang huak, atau taduan tuai ka dom baoh sang, jien thù lao ye rik tame quỹ piah puac thun urang đoàn tổng kết atau khen thưởng ka anek saih joi di palei”.

Ndom meyai saong urang vak di rayo sap ndom VN, ong Đoàn Văn Trì, Phó giám đốc Sở ilamu – Thể thao saong Du lịch tỉnh Điện Biên brei thau: gam saong du lịch sajarah dak rai, gilang inem krung ilamu hadah krah meng khan ao, pandap mbang huak, bruk ngak thủ công, tal dom rija roya meng kan di bangsa… nyu pachreih tuai damuai mai rivang iek, du lịch di Điện Biên dak harei dak patagok. Kayua yau nan ye, piah pasiam veik dom tavak tavaiy, saong piah ngak tabiak ralo jang pandap du lịch, pachreih tuai damuai, thun 2011, sở ilamu – TT saong DL tỉnh ĐB daok patui bruk padang đề án padang palei ilamu bangsa tukvak tal thun 2015. Dalam nan, palih ruah gilac 10 palei ilamu daok angaok dom jalan du lịch praong di tỉnh pambuak saong dom bangsa Thái, Mông, Lào, Khơ Mú… di dom huyện Tuần Giáo, Điện Biên, Mường Chà saong ban sit Điện Biên Phủ.

Hadei di tuk hu buh jien tame padang ngak, dom palei kham merat yaok thun taduan raok saong duh meng 10 tal 15% dom tuai du lịch mai tal Điện Biên. Eng thun 2015, yaok palei taduan raok saong duh labaih 4 ribau mbang tuai damuai, dalam nan labaih 20% lac tuai negar langiu. Ong Đoàn Văn Trì, Phó giám đốc Sở ilamu  – Thể thao saong Du lịch tỉnh Điện Biên brei thau: 

“Mbang ini kol dahlak padang oh lac eng palei ilamu urang Thái, bo hu gam palei urang Mông, urang Khơ mú, urang Lào… piah ngak yau habar pandap du lịch oh trùng lắp. Ini lac bruk kol dahlak biak sangka. Kayua pren di tỉnh oh ka khang, nan ye bruk buh jien tame ngak đề án tal urak ini jeng oh ka hu yau hatai caong khin, min anak meta daok hu peih ngak. Kol dahlak caong khin dalam tukvak tal, hadei di tuk dom palei ilamu ini hu padang ngak tui njauk bruk ba tabiak, meda rik daong oh sit ka bruk dui pachreih tuai damuai mai tal Điện Biên”.

Du lich bhap bini lac sa kadha di dịch vụ du lịch. Kayua yau nan ye, bruk pambak praong saong patagok khang kajap bruk ngak ilamu – du lịch bhap bini pambuak saong du lịch sajarah lac jalan nao njauk di du lịch Điện Biên. Jalan nao ini oh lac paglaong rai diuk ka mikva puk palei, bo daok  rik daong khik ramik saong patagok yaom glaong ilamu meng kan di bhap bini dom bangsa tỉnh Điện Biên./.