Mban khik iek glai pacang caga tapen tasik Thuận Nam ngak hu bruk praong oh sahneng mboh tal nan lac pala pabak hijao ceik patau 

Huyện Thuận Nam hu langik tasik pandiak thu luac thun, taneh riya thu lagu, patau meluk dalam haluk biak glaong ngak ka bruk pala glai gaok biak rilo kan kandah. Piah me-aom hijao taneh kalu ceik patau, mban khik iek glai pacang caga tapen tasik Thuận Nam hu duah rilo janih phun hu pren diuk hu dalam pandiak bhang yau phun trôm, keo lai, phi lao, cóc hành, bạch đàn… piah ba tame pala min oh hu yau hatai caong khin. Sa binah makna lac kayua pandiak bhang, binah karei lac dom janih phun pala ini njauk athur di mikva raong palao palai pajoa.

Ong Lê Xuân Hòa, Phaok akaok mban khik iek glai pacang caga tapen tasik Thuận Nam brei thau, piah pasiam bruk nan, mban khik iek glai hu roh duah, duah hu phun thanh thất lac janih phun glai pak ini brei mboh rilo siam lagaih jang saong hu prein diuk hu dalam pandiak bhang; abih di nyu lac pabo, pabe, limo oh mbang hala di phun thanh thất yau dom janih phun karei. Tapa duah mboh ini, thun 2015, hu bruk daong di Danak dak JICA 2, danak dak pala glai di danak dak pacang caga biến đổi khí hậu SP - RCC, mban khik iek glai pacang caga tapen tasik huyện Thuận Nam hu pala iek 5 ha phun thanh thất piah taong yaom prein kandauk dalam di janih phun ini.

Phun thanh thất tamuh siam,dalam langik pandiak bhang dui atah, hu pala mek kayau atau ngak cảnh, mek halui, phun glaong tal 20 mét. Maong mboh siam mekre di glai pala meng phun thanh thất, mban khik iek glai pacang caga tapen tasik Thuận Nam hu peih prong bruk pala, tal tukvak ini pala hu labaih 650 ha phun thanh thất angaok ceik patau glai pacang caga tapen tasik Thuận Nam. Meng jalan cak rok patagok ini, dalam 10 thun tra, angaok glai pacang caga tapen tasik Thuận Nam, phun thanh thất meda me-aom hijao dom labik dahlau diah tok maong mboh ceik patau.

Oh lac tok me-aom hiajao glai ceik patau, phun thanh thất daok ba bruk ngak mbang duah jien khang kajap ka bhap bani daok pak ini. Mban khik iek glai pacang caga tapen tasik huyện Thuận Nam daok jao 2.147 ha glai ka 4 kapul nyaom bhap bani ngan haong 78 baoh sang daok jaik glai. Dom urang taduan mek glai gam khik iek, pacang caga khuah glai gam raong glang ala halui glai, ngak jeng bruk ngak mbang khang kajap. Ong Châu Hội (xã Phước Nam, huyện Thuận Nam) urang dang akaok di 15 urang taduan mek glai piah khik iek labaih 450 ha glai brei thau, tame bilan pala glai dom adei sa-ai dalam kapul hu bruk ngak nan lac hu mbaok tame bruk pala phun thanh thất haong mban khik iek glai.  

Tui ong Đặng Kim Cương, Akaok Sở Ngak nong saong patagok palei pala tỉnh Ninh Thuận, meng phun thanh thất, bhum taneh thu lagu gah Meraong di tỉnh daok pasiam veik hu mboh di anak meta, palaghaih ka mikva raong glang athur ala phun glai. Taphia di nan, peih tabiak jalan bahrau dalam bruk palih ruah janih phun piah pala pabak veik glai di dom labik glai ceik patau, glai pacang caga tapen tasik di Ninh Thuận saong ka taong abih bhum taneh Nam Trung bộ urak ini.

Piah ngak hu bruk daok pamaong tal, Ninh Thuận daok ieu pataom jien padai meng dom danak dak, daong peih ngak pambak prong dom bruk pala glai meng phun thanh thất saong dom janih phun glai laghaih haong taneh riya langik tasik pandiak bhang, hu yaom kinh tế piah ba tame pala glai salih, glai pacang caga, pala glai mek kayau. Gam haong nan, tỉnh patagok bruk pathau khan adat hukum ka bruk khik iek saong patagok glai; pambuak hoang peih prong  bruk ngak mbang ala phun glai piah paglaong jien mek tame ka mikva daok di labik ini./.

Urang lang: Jasi – 26/05