Pasak Pasiam veik pren yava samar drah Covid-19 di sang iek ruak Việt Đức hu padang ngak samar drah di Sang iek ruak Dã chiến 13 (huyện Bình Chánh, ban raya Ho Chi Minh) saong hu ba tame pandar dalam dom harei tapa. GS, TS Trần Bình Giang, Yam ndok Sang iek ruak Việt Đức brei thau, tuk hu tacei pato di Mentri Y tế, dom y, bác sĩ di sang iek ruak haong gah padang ngak, ba gauk ngak bruk luac harei melam ngan haong hatai caong khin samar drah daong hu ka urang ruak.

GS Giang brei thau "Bruk padang ngak pasak ini biak samar drah”. Dom urang ruak njauk ba mai ini biak prong, yaok ribau mbang iew phon tal pasak khaol dahlak dalam dom harei tapa". 

Sang iek ruak Việt Đức urak ini hu 320 y bác sĩ, urang jakar hu ilamu kajap hu mbaok pak ini luac harei melam piah taong ruak ka urang ruak.

GS Giang ndom lac: "Dalam 500 meneng di pasak, hu 200 meneng pasiam veik pren yava ka urang ruak trak njauk luai suan meng mac, 200 meneng ka urang ruak luai suan ô-xy saong 100 meneng piah tui iek urang ruak njuan jang. Meng dom pandap panda saong urang hu rilo ilamu, khaol dahlak caong lac Pasak Pasiam veik pren yava samar drah ini meda daong hu ka rilo urang ruak trak".

Ruak Covid-19 trak tagok biak samar nan ye dom y, bác sĩ njauk nduac pakacah haong tukvak piah daong manuac. Abih di nyu lac, Pasak pasiam veik pren yava samar drah Covid-19 caik dalam mblang bein haong Sang iek Dã chiến 13 nan ye tuk urang ruak trak meng sang iek ruak dã chiến ba tapa biak  laghaih.

Pasak Pasiam veik pren yava samar drah (ICU) caik di Sang iek ruak Y học cổ truyền Tiền Giang kayua dom y, bác sĩ Sang iek ruak Hữu nghị Việt - Xô daong ngak. Kapul ngak bruk hu 9 urang, dalam nan hu 3 bác sĩ saong 6 điều dưỡng pambuak bruk haong dom urang y tế di pasak pasiam veik pren yava di tỉnh hu mbaok tame bruk taong ruak ka urang ruak Covid-19, rivang iek saong ngak thủ thuật di tal glaong abih dalam mô hình tháp taong ruak.

Taduan hu bruk daong samar drah di Sang iek ruak Hữu nghị, Bác sĩ Chuyên khoa II (BSCKII) Lê Thanh Bình, Phaok Yam ndok Sang iek ruak đa khoa Pasak Tiền Giang, jeng lac phaok Yam ndok Pasak pasiam veik pren yava samar drah drut droi ndom lac: “Sang iek ruak khaol dahlak hu pambuak bruk khang kajap haong Trung ương tui jalan abih drei daong ka urang ruak. Dom bác sĩ Sang iek ruak Hữu nghị hu tacei pato dom urang jaka y tế, bác sĩ pak ini jalan mong iek, taong ruak meng mac luai suan, meng nan bo rilo urang ruak hu siam veik pren yava. Caong lac dalam tukvak anak tal meda hu rilo jang urang ruak hu ba nao labik iek ruak njul, taong thit abih ruak". 

Pasak pasiam veik pren yava samar drah (ICU) prong abih di Bhum taneran kraong Cửu Long hu padang ngak blaoh di Sang iek ruak Đa khoa Trung ương Cần Thơ saong ba tame pandar di harei 16/8. Pasak meda taduan taong ruak dom urang njaom Covid-19 trak mbuan metai lahik di dom tỉnh dalam bhum taneran kraong Cửu Long. Ini lac sa dalam 12 Pasak pasiam veik pren yava samar drah pakat negar hu Mentri Y tế padang tagok dalam negar.

Tui BSCKII Nguyễn Minh Nghiêm, Phaok Yam ndok Sang iek ruak đa khoa Trung ương Cần Thơ, Pasak pasiam veik pren yava samar drah hu 200 baoh meneng hu ô-xy nén 20 tấn, hu ginup abih dom janih pandap panda y tế bahrau yau mac suak yava, monitor tui iek, gam haong menuac ngak hu chất lượng glaong hu bac megru dalam ka pasiam veik pren yava samar drah meda daong ngak brei patrun biak rilo manuac metai ngan haong dom urang njauk Covid-19 trak./.

  Urang lang: Jasi - 19/08/2021