Kayua pandiak bhang dui atah meng akaok thun tal ini  ngak ka  aia dalam dom baoh ribaong di Bein cim Bạc Liêu dalam phường Nhà Mát, ban sit Bạc Liêu, tỉnh Bạc Liêu trun biar; urak ini rilo phun glai daok thu kaveo. Dom harei tapa, mBan khik iek Bein cim hu patagok tanut brei thau lac mbuan khuah glai pak ini tagok pakat 5, saong daok brei  peih ngak ralo jalan ngak piah khik caga glai haong cim.

Dom harei tapa di Bạc Liêu langik dak pandiak saong pa-uh jang. Tuk jala pandiak langik pandiak biak khang, nhiệt độ di bein cim tuk halei jeng daok di tanut meng 35 độ C tagok. Anak bruk mbuan rah tabiak khuah glai, mBan khik iek pambuak haong Trạm kiểm lâm bein cim padang kapul khik caga nao tui iek luac harei melam, oh brei bhap bini,  tuai damuai tame labik cim daok  piah plaih di khuah glai. Ong Nguyễn Trung Chánh- Akaok Bein cim Bạc Liêu brei thau:Tal tukvak ini njauk ndom lac thu lagu dalam glai nan lac biak thu, tal hareik angaok mbaok haluk nyu thu racam, capat nyu ralai abih, pak ini hu hasit pui pagap yau akaok pakao ye  nyu khuah chip. Hadei di tuk brei tagok tanut mbuan khauh glai tal pakat 5, khaol dahlak brei manuac ndih daok pak nan khik caga, daok kapul urang pak nan brei khik caga catang, tagok kanjan mong iek saong mac moc jamriak khaol dahlak hu ba abih mai pak ini piah caga tuk hu pui khuah.

Kayua Bhum taneran Kraong Cửu Long daok yam tame tabung glaong bilan pandiak bhang nan ye mbaok aia di dom baoh ribaong di bein cim daok trun biar. Anak bruk yau nan, mBan khik iek bein cim jeng hu jalan ba ia tame khik piah di 67 baoh ribaong dalam bein cim piah hu ia padam tuk pui khuah, saong daok ngak jeng độ ẩm ka glai. Taphia di nan, mBan khik iek bein cim daok pambuak bruk haong dom ban, ngành hữu quan saong karja palei peih bruk pathau khan, pato pakai mikva daok jaik taphia piah ka mikva paglaong hatai saneng di drei dalam bruk pacang caga khuah glai saong khik caga bein cim. Ong Nguyễn Đình Thụ- Akaok balai kiểm lâm Bein cim Bạc Liêu brei thau: Pataom bhap bani veik drei khan brei thau tapak, hu dom baoh sang nao ngak oh hu mbaok dalam van pathau khan ye drei pandar dom blah harak ba-ar, dom harak cam kết payua tal dom baoh sang nan piah ka mikva mong iek veik. Tapa dom mbang pathau khan nan bhap bani jeng paglaong hatai saneng, meyah hu tame puh ngak hareik khin cuh ye mikva mai taom gaok adei sa-ai daok khik caga piah brei thau blaoh likau tuk cuh ka nyu lagaih, dom tuk oh hu hangin, page mesup atau biar harei, nhiệt độ trun, tuk nan adei sa-ai mai hu mbaok khik caga brei mikva cuh piah samar pacang cakak meyah hu bruk hagait rah tabiak. 

Lac labik bảo tồn thiên nhiên pakat negar, Bein cim Bạc Liêu prong abih tih labaih 360ha, dalam nan bhum lõi meblah 130 ha. Di labik ini, urak ini hu labaih 100 janih cim ngan haong jaik 60.000 drei chim, dalam nan, hu ralo janih cim quý hu angan  dalam tapuk bhong yau: giang sen, bồ nông, điên điển… haong ralo janih động vật lưỡng cư, bò sát. Kayua yau nan ye, bruk ngak di urang jakar, urang ngak bruk pak ini dalam bilan pandiak bhang biak glaih glar, kayua lac taphia bruk khik caga phun kayau dalam bein, daok khik brei ka cim daok veik dalam bein. Ong Lê Văn Cương – urang jakar phòng kỹ thuật Bein cim Bạc Liêu brei thau: Bilan thu ini phun glai nyu thu biak thu, hala druh trun saong danao aia jeng thu lagu, nan ye kadha kan kandah praong di khaol dahlak nan lac njauk patagok aia taba, khik habar ka aia taba oh njaom ia  mbak ye anek cim nyu mong pak ini yau sang di nyu, nan ka nyu meng daok suai lavik.

     Jeng tui panuac khan di mBan khik iek Bein cim Bạc Liêu, janih biak karei di bein cim nan lac daok dalam bal sit nan ye hu ralo tuai damuai mai rivang iek. Tui kuhria mboh yaok thun, pak ini hu labaih 10.000 mbang urang mai rivang iek. Dom harei anak tal, tuk Bạc Liêu peih Festival Đờn ca tài tử pakat negar mbang ka sa, bein cim Bạc Liêu jeng peih pambang taduan raok tuai damuai mai mong iek. Tuk nan, bruk khik caga bein cim anak bruk apui mbuan khuah dak kan kandah jang, yau nan min, urang jakar, urang ngak bruk pak ini daok kham merat khik ka bein cim miat miat hu sambo màu hijao mekre, piah ka labik ini tuk halei jeng lac bhum taneh siam piah ka cim mai ndam./.