1/ Thun 2014, meng kadung jien dự án ADB, jiak 600 boh sang di dom bhum atah bayah dalam huyện Hướng Hóa, tỉnh Quảng Trị hu điện pandar. Điện hu truac hadah dahlau di tuk tapa thun bahrau hu ba mai rilo bui sambai chreih chrai ka bhap bini huyện Hướng Hóa. Sa-ai Hồ Văn Hưn, daok di palei Pa Ka, xã Hướng Lộc, huyện Hướng Hóa lac, urak ini hu điện ye nyu daong ka drei pandar hu gaok lisei điện, kandik điện, tu li-an saong blei tivi mai iek piah bac jalan ngak mbang patagok kinh tế jang.

2/ Piah ngak siam bruk pacang cakak buôn lậu, bleik saleik dalam pablei salih saong pandap ja dalam tuk tết anek sak pabe thun 2015, chi cục khik iek darak pasar tỉnh yên Bái hu khan brei thau lait phon piah taduan panuac tố giác di bhap bini ka dom bruk pablei salih pandap ja, pandap oh siam. Tui chi cục khik iek darak pasar tỉnh Yên Bái, bruk buôn lậu, bleik saleik dalam pablei salih saong pandap ja jeng daok hu ralo, abih di nyu nan lac di bhum glaong, bhum atah bayah, labik hu ralo urang bangsa takik diuk rai.

3/ Ủy ban bhap bini tỉnh Thừa Thiên-Huế bahrau tabiak quyết định yaom dong ka urang dalam sarak karja tuk Tết Nguyên đán anek sak pabe 2015. Tui nan, tỉnh Thừa Thiên-Huế hu dong ka dom pasak rong ba nan lac 1 triệu đồng sa pasak, 700 ribau đồng ka sa baoh sang hu buh pren yava ka taneh ia. Langiu di nan, dom boh sang lac anek di urang tame bruk mesruh metak njauk jru hóa học, urang dok mbang jien bảo trợ XH song boh sang jiak si kan kathaot hu dong 100 ribau đồng sa boh sang. Tong abih yaom jien ka bruk ini jiak 10 tỷ đồng. 

4/ Xã Tri Hải, huyện Ninh Hải,  tỉnh Ninh Thuận lac palei tapen tasik, bhap bini diuk rai ralo meng bruk taong cap ikan di tasik atah, raong pala kaya ikan saong ngak sara. Peih ngak danak dak padang ngak palei pala barau, xã hu pagam dom tanut saong bruk patagok kinh tế tasik saong hu bhap bini pachreih tui. Meng nan, ralo bruk raong pala kaya ikan, kapul jum pataom taong cap di tasik atah saong hu kein laba, pagalong rai diuk ka bhap bini, rik daong ngak brei salih barau mbaok meta palei pala.

5/ Hadei di jiak 3 bilan peih ngak Nghị định 67 di rajaei, urak ni dalam tỉnh Bình Thuận hu 107 hồ sơ tut angan ngak bahrau, pasiam veik kapan tong ikan di tasik atah tui sarak patagok kaya ikan. Dalam 107 harak tut angan, hu 82 harak hu UB bhap bini tỉnh BT phê duyệt saong yaom jien abih tih labaih 600 tỷ đồng, dalam nan hu 71 boh kapan ngak bahrau, 11 kapan pasiam veik, salih jamriak bahrau. Huyện palao Phú Quý hu rilo di abih ngan song 51 hồ sơ, patui di nan lac La Gi, Phan Thiết song Tuy Phong

6/ Piah khik tani tanat yaom kaom dom janih pandap blei pandar rilo di bhap bini dalam tuk tết anek sak pabe, tỉnh Kon Tum hu buh tabiak 20 tỷ đồng meng kadung jien karja daong ka 5 doanh nghiệp khik mepiah pandap. Ngan saong 20 tỷ đồng meng kadung jien karja, yaok doanh nghiệp hu mbaok tame danak dak tani tanat yaom kaom di tỉnh Kon Tum hu daong meng 3 triệu tal 5 tỷ meteh. Urak ini dom doanh nghiệp hu ba tame kho dom pandap hu blei ralo dalam tuk tết yeu brah, saradang, sara, ia tasau, menyek mbang.

7/ Urang pan akaok Tỉnh ủy, Uỷ ban bhap bini tỉnh gam song dom mban ngành dalam tỉnh Cà Mau bahrau padang rilo kapul nao rivang song tangi sua, pachreih ba dom boh sang njauk khat lihik kayua pui mbang di pasak pasa Thới Bình, huyện Thới Bình song dong ka yaok boh sang 10 triệu đồng. Urak ni dom gah chức năng di tỉnh Cà Mau song huyện Thới Bình dok duah thau makna ba tal apui khauk, saong daok brei menuac trun khik iek, dong ka bhap bini puh ramik pandap panda, rami ramik labik daok siam mekre ka urang hu sang khuah.

 Patui di ini dom khau tin dunya:

8/ Urang brei panuac di hội đồng lập pháp negar di TL brei thau, harei 8/1, hội đồng lập pháp negar hu peih mbang nyom pasang iek bãi nhiệm ngan saong ong Xổm-xặc - urang dahlau daih ngak gah akaok QH saong ong Ni-khôm urang dahlau daih ngak akaok Thượng viện. Patui di nan, harei 9/1, hội đồng lập pháp negar pasang iek bãi nhiệm amuk Dinh-lắc Xin-na-vắt urang dahlau daih ngak Thủ tướng Thái Lan. Tui kuhria, di puac bilan 1, hội đồng lập pháp negar hu buh phiếu bãi nhiệm 3 urang ini.

9/ Cảnh sát In-đô-nê-xi-a brei thau, tal urak ni, gah chức năng hu duah mboh cambaih angan di 24 urang dalam 49 urang metai hu srong tagok dalam mbang laik kapal haoh QZ8501.

10/ Công ty Oa-ca di Bỉ barau brei tabiak rai sa hệ thống khik mepiah kaya nông meng năng lượng ia harei yaom lap, daong khik hu livik jang baoh kayau saong njam patam. Ini lac bruk bui sambai ngan saong dom urang nông oh hu điều kiện trang bị hệ thống khik mepiah kaya nông./.