1/ Labaih 3000 boh sang kan kathaot dalam bhum bhian njauk ribuk ia ndik ia sua di 17 huyện, ban sit dalam tỉnh Thanh Hóa hu dong padang sang plaih ribuk ia sua. Nan lac bruk di đề án dong boh sang kan kathaot pang sang dok plaih ribuk ia ndik ia sua dalam tỉnh Thanh Hóa pamong tal. Đề án kayua Sở xây dựng peih ngak tui harak Quyết định 48/2014/QĐ-TTg harei 28/8/2014 di Thủ tướng rajaei.

2/ UB bhap bini ban sit Đa Nẵng brei buh tabiak 14,9 tỷ đồng meng kadung jien karja tỉnh piah alin hadiah pandap, daong ka dom urang daok dalam sarak karja, urang kan kathaot dalam tỉnh tuk tết anek sak pabe. Langiu di nan, UB bhap bini ban sit Đà Nẵng daok hu daong ka dom urang ngak bruk pataom mek nerak dalam tuk tết, urang hu harak adat hành nghề saong daok peih xích lô, radaih thồ kayua quận, huyện khik iek.

3/ Dom harei akaok thun bahrau 2015, rilo janih jnam patam boh karaoh di Đà Lạt tagok yaom. Dalam nan rilo janih njam mbang hala tagok jang 3 mbang. Yaom lac tagok yaom min rilo janih pandap jeng daok pabak ginup ka dom labik blei. Tapa pasang iek di darak kaya nong Đà Lạt, labik pablei salih njam patam di jalan Thánh Mẫu, Nguyễn Siêu di phường 7, ban sit  Đà Lạt mboh lac, jaik abih dom janih yau bắp cải, cải thảo, xà lách, súp lơ...jeng tagok yaom. Hu janih tagok meng 10.000 tal 12.000 đồng sa kg dut song dahlau di nan.

4/ Dalam tuk tết anek sak pabe thun 2015, tỉnh Tiền Giang hu caik tabiak 18 tỷ đồng piah alin hadiah pandap, daong urang buh pren yava ka cách mạng saong baoh sang kan kathaot dalam tỉnh. Tui nan, labaih 43.000 urang buh pren yava ka cách mạng hu akaok negar alin hadiah pandap, yaok paok pandap yaom meng 300 tal 500 ribau đồng. Dalam nan, tỉnh daong pabak tame yaok pok pandap 100.000 đồng. Meng kadung jien di tỉnh, tỉnh Tiền Giang hu daong ka labaih 20.000 urang hu buh pren yava ka cách mạng yaom jien meng 300 tal 500 ribau đồng sa urang.

5/ Tui bruk ba tabiak, abih tih yaom pandap mepiah pablei Tết thun anek sak pabe 2015 di tỉnh Cà Mau labaih 1.216 tỷ đổng, rilo jang 6,5% dut song tết nguyên đán thun dahlau. Piah caga hu siam, pabak ginup pandap panda dalam tuk tết,  Sở Công thương tỉnh Cà Mau urak ni dok pambuak bruk song dom DN, đơn vị dang akaok peih prong dom labik palei salih cố định song lưu động, abih di nyu nan lac di dom huyện xã atah bayah.

6/ Miuyim Mỹ thuật Việt Nam saong công ty nghệ sĩ Mê Kông barau peih parang iek rup cih jak ba “sa khí thế cách mạng”. Labaih 70 blah rup cih jak ba saong mẫu tem di dom họa sĩ VN cih meng dom thun 1950 – 1980 hu ngak veik praong jang, brei mboh cambaih bruk mbang ngui, daok dang, ngak mbang, ngak huak, mesruh metak, rup binguk urang kamei VN, sa-ai bộ đội wa Hồ.

7/ Rayo papar binguk ban raya HCM pambuak bruk song gilang pariak Thương mại cổ phần  An Bình peih danak dak doh tamia ngak pahla Tết An Bình pamong tal bhap bini ngan song kadha “Tết An Bình – hatai anit ranam palao kaoh”. Danak dak yau panuac thau dar phol payua tal dom urang lin song mik va tong ikan harei melam pambuak haong tasik piah khik iek palei negar. Danak dak hu rah tabiak harei 23/1/2015 song hu papar binguk tapak angaok HTV9 

Patui di ini dom khau tin dunya:

8/ Urang vak di rayo sap ndom VN daok di Lào brei thau: Tổng Bí thư, akaok negar Lào, Chum-ma-ly  Say-nha-sỏn hu pok ông Sỉ-thông    Chít- nho-thin, ngak Đại sứ Lào di Cộng hòa Dân chủ Đức; gam taneh ia Ba Lan, Cộng hòa Séc, Latvia, Estonia saong Lít-va. Dahlau di tuk hu pok ngak Đại sứ di Đức, ông Sỉ-thông Chít-nho-thin lac akaok Vụ Báo chí saong jeng lac urang brei panuac di mintri Ngoại giao Lào.

9/ Urang pan akaok negar Đức brei thau, hu duah mboh vi-rút cúm H5N8 dalam dom janih cim glai di negar ni. Janih virut ni hu duah mboh di 2 drei vịt trời di mban Xắc-xông – An-han (Saxony-Anhalt). Piah pacang cakak jit ruak njom mbak, dom bhum dalam dom mban di Đức hu tabiak adat oh brei palao rong menuk ada. Dom mban di gah negar Đức jeng brei paglaong sangka anak bruk mbuan njom jit ruak meng cim brim, ada song ada kangan./.

10/ UB bầu cử tối cao Ai Cập brei thau: bruk pilih ruah urang ka quốc hội Ai Cập hu peih tabiak di harei 21/3 tal saong tui kuhria dui atah dalam 47 harei. Tui lịch trình hu UB bầu cử Tối cao Ai Cập brei thau di mbang họp báo barau ini, bruk pilih ruah urang ka Quốc hội Ai Cập hu rabha jeng dua mbang, dalam nan mbang sa meng harei 21 tal harei 23/3 saong mbang dua meng harei 25 tal harei 27/4./.