#/ Chi cục khik caga chất lượng kaya nong song kaya ikan tỉnh Quảng Nam pambuak bruk song dom gah chức năng peih bruk  am klak 400 kg rabung mesam hu pandar chất phụ gia vàng ô. Dom rabung mesam nan di tiểu thương Nguyễn Thị Duyên song Nguyễn Thị Bảy di drak  Nam Phước, huyện Duy Xuyên. Tapa dut iek di pasak Kỹ thuật tiêu chuẩn đo lường chất lượng 2 di Tổng cục Tiêu chuẩn đo lường chất lượng brei thau, dom rabung mesam nan hu chất Auramine 0 ( dok ieu lac chất vàng ô), sa chất phụ gia oh brei pandar di  mintri Y tế, ngak jhak tal pren yava di urang mbang

#/ Klauk vacxin ka athur raong, menuk ada lac sa dalam dom bruk praong daong ka baoh sang raong glang pacang nyaik hu jit ruak siam. Min, dom thun jaik di ini bhap bini jeng oh ka thau hu yaom glaong di bruk klauk pacang cakak, khik kajap ka tapol athur raong, menuk ada; bruk klauk pacang daok biar nan ye jit ruak bhian rah tabiak. Di dom puk palei dalam tỉnh Cao bằng, jit ruak di tapol athur raong, menuk ada njom mbak praong, ngak khat lahik jien padai ohtakik ka urang raong glang.

#/ Thau lac pathau khan lac sa dalam dom bruk prong, dong ngak brei jak jeng  palih ruah urang ka Qh song Hội đồng bhap bini dom pakat tuk vak 2016-2021, huyện Xuân Lộc, tỉnh Đồng Nai hu parabha bruk ka dom urang jakar xã, palei trun tal dom boh sang Chăm piah pathau khan tacei ba mik va dom hukum bầu cử QH song Hội đồng bhap bini, dom harak tacei ba, kadha ka bruk palih ruah. Tapa nan hu pathau khan tal bhap bini rilo jalan ngak siam lagaih yau tual pa-nô, áp-phích, băng-rôn, radeih lưu động song dom jalan thông tin đại chúng.

#/ Xã  Đăk Ơ, huyện Bù Gia Mập, tỉnh Bình Phước lac bhum pala phun lavik thun di tỉnh Bình Phước ngan saong jaik 6.200 ha, ralo meng lac pa-aok blait, amriah kalu, cao su saong cà phê. Yaom lac urang nông labik ini hu ngak abih jalan piah hu ia daong ka phun pala, min bruk pandiak bhang jeng daok rah tabiak sa bilan tra, ye rilo phun pala di mikva nyu metai, abih di nyu nan lac phun amriah kalu. Daok ia pandar, jaik 900 baoh sang dalam abih tih 3.600 baoh sang daok di xã Đăk Ơ daok nao blei ia yaom 40.000 sa m3, dalam nan hu meteh dom baoh sang lac urang bangsa takik. 

#Tui akaok UB bhap bini tỉnh Tiền Giang, bala pandiak mbak dalam bilan thu 2016 ngak kan kandah trak tal bruk ngak mbang song rai duik di bhap bini puk palei. Tui kuhria tal akaok bilan 5 thun ni, tong abih jien khat lihik labaih 104 tỷ đồng, dalam nan prong di abih lac phun padai jiak 3.900 ha padai đông xuân njauk metai kayua thu pandiak song njom mbak. Anak bruk nan, TG hu peih ngak rilo jalan pacang cakak yau jhuk kuac, ngak jalan ia puk palei, jang yau buh tame dom danak dak jalan nding ba ia taba pabak ka mik va di bhum atah bayah, dui xà lan pajeng ia taba mai ka mik va di huyện palao kaoh Tân Phú Đông.

# / Yaom lac langik pandiak dui atah, min piah ka bruk ngak padai Hè thu thun 2016 njauk bilan, urang nông dom xã An Thạnh, Lợi Thuận, Tiên Thuận, Long Chữ, huyện Bến Cầu, tỉnh Tây Ninh hu hamu tapen kraong Vàm Cỏ trun pajaih hu jaik 3.500 ha dalam 10.500 ha padai, meblah labaih 30% duk saong bruk ba tabiak di huyện. Urak ini, dom blai njuk ia xã Long Thuận, Bến Đình, Long Hưng, Long Khánh hu khan brei thau lịch njuk ia pruh, piah urang nông kuhria bruk pala drak ka nyu lagaih, abih di nyu nan lac trun pajaih padai hè thu hu siam mekre. 

Patui di ni dom khau tin dunya:

#/ Kuhria tal harei ni hu 16 urang metai song 50 urang karei njauk rambuac hadei di mbang bala radeih buýt  rah tabiak di bang Chát-tít-ga, gah kreik negar Ấn Độ. Urang metai meda hu rilo jang kayua hu rilo urang njauk rambuak trak. Tui pathau khan di gah Y tế dunya, yaok thun, Ấn Độ hu 200 ribau urang metai kayua radeih phaok gauk  

#/ Di Luông Pha-băng, Lào barau rah tabiak đối thoại urang ngak praong QP ARF. Tapa nan, dom taneh ia thành viên ARF hu ginum meyai, klah rabha ilamu saong duah jalan jhul pakhang talei pambuak bruk quân sự dalam bruk ngak pahala, daong urang njauk bala saong dom cuang kandah gah an ninh mạng dalam khu vực, daong padang hatai jia piah pacang cakak dom cuang kandah gah an ninh dalam tukvak anak, khik kajap sron mbon, tani tanat pambuak bruk dalam khu vực saong dunya.

#/ Jien 500 Euro dok dang anak bruk brei palahik nao, hadei di mbang ginum biai praong  harei 4/5 di gilang pariak Trung ương châu Âu (ECB). Blah 500 Euro lac jien baar hu yaom glong di abih dalam jien euro. Chủ tịch ECB Mario Draghi brei thau, ECB meda pasang iek tani tanat bruk khai tử blah jien hu yaom prong ni, kayua nyu dok hu pandar dalam dom bruk phạm pháp. Ong ndom lac jien 500 euro  meda palagaih ka dom bruk rao jien kayua mbuan pajeng ba song kan mboh./.