1/ Mesup harei 14/10 di xã Hồng Phong, huyện Đông Triều, tỉnh Quảng Ninh, Mintri ngak nong song patagok palei pala pambuak bruk song kapul padai brah song Nông nghiệp Liên hợp quốc (FAO) di VN song UB bhap bini tỉnh Quảng Ninh pahadar 34 thun harei padai brah dunya 2014, pahadar mbang ka 69 harei padang kapul padai brah song Nông nghiệp Liên hợp quốc. Meng panuac ieu: ngak mbang tui baoh sang: raong diuk dunya, khik caga baoh taneh", angan ieu di harei padai brah dunya thun 2014 hu ndom tal labik dang prong di boh sang ngan saong bruk patruh eik patrun kathaot, khik caga an ninh padai brah song dinh dưỡng, patagok rai duik, khik ramik drap ar song alam môi trường piah patagok khang kajap, abih di nyu nan lac di bhum palei pala. Ni lac kadha hu makna prong ka VN, labik boh sang ngak nong rik dong biak prong dalam bruk langyah dom gaok daok nan  lac patagok bruk ngak padai brah khang kajap song patruh eik patrun kathaot.

2 # Piah pachreih bhap bani yam tapa kan kathaot, 3 thun tapa huyện Tu Mơ Rông, tỉnh Kon Tum hu buh tabiak labaih 7 tỷ đồng, pok brei ka 1.500 baoh sang tabiak truh  angan baoh sang kathaot. Bruk alin brei jian ka dom baoh sang tapa truh kathaot hu huyện Tu Mơ Rông, tỉnh Kon Tum peih ngak meng thun 2011, ngan haong yaom jien 5 triệu đồng ka yaok sa bao sang. Sa binah phun jien hu neh tabiak meng kadung jien di tỉnh, binah karei mai meng jien patak pataom dalam bruk cai pandar saong jak ba doanh nghiệp, urang ngak pah hala rik daong.

3/ Urak ni, bruk xóa mù chữ song patao pakai hadei di tuk thau haroh di dom labik dok dalam tỉnh Ninh Thuận dok rilo kan kandah kayua urang gru pato chuyên trách bruk phổ cập pato pakai tiểu học oh ka tani tanat. Rilo labik oh pachreih hu ginup menuac piah peih tal pato  xóa mù chữ kayua menuac urang oh dok sa labik song kuhria ngak mbang. Kayua yau nan ye, urak ni, urang oh thau haroh di tỉnh NT dok labaih 11.000 urang, tagok labaih 2,6% menuac urang, urang oh thau haroh meng umo 36 tagok dok di bhum ceik, bhum urang bangsa takik hu labaih 3,1%.

4 # Harei kabroi (13/10), pak công viên Lê Thành Duy, bal Bà Rịa, Ủy ban bhap bani tỉnh Bà Rịa-Vũng Tàu peih bruk kluak vắc xin sởi - rubella oh mek jien ka uranaih meng sa tal 14 thun. Bruk klauk jru pacang caga sởi-rubella dalam tỉnh hu rabha jeng 3 mbang, dalam tukvak meng ini tal harei 16/1/2015. Tui kuhria dahlau meda hu labaih 260.000 ranaih meng 1 tal 14 thun meda hu klauk jru pacang caga dalam mbang ini. Tỉnh Bà Rịa-Vũng Tàu kham merat hu labaih 95% uranaih dalam umo hu klauk jru pacang caga.

5/ Urak ni, yaok pluh urang nong dok di xã Bình Nhì, huyện Gò Công Tây, tỉnh Tiền Giang biak dut hatai kayua pala meriak oh tabiak boh. Tui mik va urang nong, phun meriak biak that siam, dhar glong min tabiak takik bingu hadei di nan jaruk abih oh tabiak boh. Pajaih meriak ni hu angan lac Hồng Hạc 2- sa janih pajaih bahrau kayua Công ty Trách nhiệm hữu hạn pajaih phun pala Long Hoàng Gia dok Quận Tân Bình, ban raya Hồ Chí Minh pabak brei. Kuhria taeng jien pajaih, khak, jru mik va dok buh tabiak labaih 10 triệu đồng ka sa công taneh pala meriak. Hu boh sang pala dom công meriak, jeng hu sang pala tal sa ha meriak.

6 # Meng 12 tuk kreh pandiak harei 13/10, yaom menjek RON 92 trun 670 đồng/lít, daok 22.890 đồng sa lít. Dom janih menyek karei jeng hu trun yaom tui, dalam nan khang di abih lac menjek diezen trun 880 đồng. Yaom menjek xăng dunya daok trun. Urak ini janih xăng menyek hu yaom pablei glaong jang yaom cơ sở meng 449 đồng/lít,kg tal 658 đồng/lít,kg. Kayua yau nan ye, 1 mintri Tài chính – Công Thương pandar dom doanh nghiệp đầu mối pasang iek veik yaom kaom, kuhria yaom tui adat piah patrun yaom pablei dom janih xăng, menyek dalam negar.

7/ Beir harei kabroi, tỉnh Quảng Ngãi peih bruk parang iek hu angan “ Inem krung ilamu ala ia” hu 500 pandap klak hu parang iek song hu mbaok dom urang ilamu roh duah mai meng 17 taneh ia di ĐNÁ. Ni lac inem krung hu srong tagok meng dom boh kapan klak kram di bhum tasik gah kreik negar VN. Dalam nan hu dom inem krung njauk brei caik hatai yau Sưu tập pandap lan, pandap patau Champa dok mboh dalam kapan kram di bhum taneh Núi Thành, tỉnh Quảng Nam; Sưu tập pandap lan sứ saman Minh meng abhap 15 hu duah mboh song srong tagok di bhum tasik Bình Châu, tỉnh Quảng Ngãi song Hòn Cau, tỉnh Bình Thuận.

Nhạc cắt

Patui di ini khaw tin dunya:

8 # Tui Akaok Gah Y tế dunya Mác-ga-rét Chan (Margaret Chan), 90% khat lahik gah kinh tế kayua janih jit ruak halei jeng lac kayua dom jalan pacang cakak nhiễm trùng oh njauk saong oh hu tổ chức di anek anek manuac. Amuk Ma-ga-rét Chan jeng ndom lac, pato pakai bhap bani ka janih jit ruak halei jeng lac jalan pacang caga siam di abih. Tui Gah Y tế dunya, kuhria meng tuk tamuh tabiak dalam bilan 4 meng blaoh, jit Ê-bô-la ngak ka labaih 4 ribau urang metai, ralo meng lac dom negar Tây Phi.

9/ Harei 13/10 di pasak pablei salih Lào Ai-tếc, ban ine Viêng-chăn hu rah tabiak nyaom darak pasa parang eik pandap thủ công mỹ nghệ mbang ka 13. Ni lac darak pasa meng kan di Lào piah ka dom DN, dom urang ngak bruk thủ công mỹ nghệ meng kan di negar Lào yaih khan parang eik dom pandap thủ công mỹ nghệ song jeng lac tuk piah ka dom urang ngak bruk thủ công mỹ nghệ klah rabha ilamu song gauk, jang yau palagaih ka dom DN, urang đầu tư gah bruk ni duah jalan ngak mbang bahrau.

10 # Jeng dalam harei 13/10, Tổng thư ký Liên hợp quốc Ban Ki Mun (Ban Ki-moon) hu panuac chỉ trích bruk peih prong padang ngak dom labik daok di Ixraen angaok bhum taneh  di urang Palextin. Tổng thư ký brei mboh hatai suh sah di drei anak dom bruk ngak jaik ini di Ixraen pak dom thánh địa di Giê-ru-sa-lem (Jerusalem), khang panuac lac bruk ngak nan tok ngak brei bruk nyu catang jang saong njauk padeih chip./.