1/ Meng kreih bilan 8 tal ni, tỉnh Quảng Trị hu 39 urang ruak pandiak tabiak darah, Gah Y tế tỉnh Quảng Trị hu peih bruk pruh jru hóa chất, pasiam môi trường, padang kapul tui iek tapak di cơ sở, tacei pato mik va jalan pacang caga. Dom cơ sở y tế hu taduan saong iek ruak chip tuk urang ruak tame sang iek ruak. Bác sĩ Lê Đan Tâm, Phó Giám đốc sang iek ruak Đa khoa ban sit Đông Hà, tỉnh Quảng Trị brei thau: Bilan bloh hu pato pasram ka taong abih urang jakar jalan pacang ruak pandiak tabiak darah di Mintri Y tế. Urak ini sang iek ruak Đa khoa Đông Hà hu caga ginup abih janih piah duh ka urang ruak.   

2/ Dự án pasiam dom ar saong pala glai dauk ia mbak hu tỉnh Bình Định peih ngak 3 thun tapa, piah pacang biến đổi khí hậu bhum danao Thị Nại. Dự án hu yaom jien buh tame abih tih labaih 300 tỷ đồng piah pasiam labaih 24 km jalan ar Đông saong dom công trình angaok ar yau ye pacang ia dauk, tathuak ia sua, pacang ia mbak njom tame. Ong Lê Xuân Sơn, giám đốc mban khik iek dự án thủy lợi tỉnh Bình Định brei thau: Dự án hu ngak jaik bloh, pacang hu ia sua thun ini:

“Hu 3 hạng mục, urak ini kol dahlak hu 2 labik, labik di Quy Nhơn saong labik di Phước Thuận. Daok labik di Phước Sơn saong Phước Hòa ini 8km ye kol dahlak daok ngak. Urak ini jaik tal bilan hajan ia sua di bhum kreih negar nan ye kol dahlak daok caga bloh saong dom công trìnhpacang hu ia sua”.

3/ Urak ni gah ngak nong tỉnh Ninh Thuận dok tacei pato dom puk palei hu ia pruh yau huyện Ninh Phước, Ninh Sơn, Ninh Hải song ban sit Phan Rang - Tháp Chàm samar trun pajaih bilan padai thun 2015, ngan song taneh prong labaih 22.000 ha, dalam nan taneh ngak padai labaih 11.300 ha. Kayua pandiak bhang dui atah dalam tuk vak tapa, hajan takik nan ye dom danao ia dalam tỉnh dok kurang ia trak. Piah plaih khat lihik ka bruk pala drak dalam bilan ni, gah ngak nong tỉnh NT brei salih 840 ha taneh padai tapa pala njam patam, patak patom ia, tagok kein liba dalam bruk pala drak.

4/ Tui po dom trang trại raong menuk công nghiệp di tỉnh Đồng Nai, urak ini, menuk pablei di trại yaom jaik 29.500 đồng sa kg, hu yaom jang 3.000 đồng sa kg duk saong akaok bilan 9. Ini lac bruk bui sambai ka urang raong glang, kayua dahlau di nan menuk công nghiệp dang yaom 20.000 đồng sa kg ngak ka urang raong menuk khat trak. Đồng Nai urak ini hu tapol menuk ada abih tih jaik 16 triệu drei.

5/ Peih ngak danak dak pato bruk ngak ka urang ngak palei pala, tỉnh An Giang hu daong pato bruk ngak ka 51.462 urang ngak. Hadei di tuk bac bloh, urang bac hu bruk ngak labaih 36.744 urang (samu 71%), rilo meng lac dom bruk gah ngak nong. Dalam nan hu dom mô hình pato bruk ngak ba mai kein liba glong yau rong hadang tui jalan ngak bahrau, rong lanun, pabam pajaih song rong ikan sặt rằn, rong limo kubao, pala njam.. dong ba bruk ngak tani tanat ka urang ngak dalam tỉnh. 

6/ Kapul liên hiệp urang kamei pambuak bruk saong Thành đoàn ban cần thơ barau peih bruk ndom biai “Paglaong phẩm chất đạo đức kamei dara dalam samar barau” ka dom urang kunei đoàn. 5 thun tapa, sở lao động thương binh saong XH ban Cần Thơ hu pato bruk ngak saong ba bruk ngak ka labaih 42.000 kamei dara. Langiu di nan, kapul urang kamei ban Cần Thơ daok hu daong ka 44.000 baoh sang hu phun jien ngak mbang, padang sang daok.

7/ Tui mintri pato megru, anek saih klah bac di dom tỉnh bhum taneran krong Cửu Long rilo di abih dalam negar, tong abih dom pakat jeng hu anek saih klaak bac rilo jang 3 mbang dalam taneh ia. Tui nan, anek saih klak bac di dom tỉnh bhum taneran krong CL di pakat tiểu học lac  0,45% (dalam negar 0,16%), Trung học cơ sở 3,26% (dalam negar 1,37%) song pakat Trung học phổ thông 3,94% (dalam negar 1,79%). Kan kandah prong abih di bhum taneran krong CL lac kurang sang bac, tal bac song balik bac khut rilo, urak ni dalam bhum dok hu labaih 1.230 balik bac tạm.

Patui di ini dom khau tin dunya:

8/ Dalam var peih mbaok mbang họp yaok thun di Kadung jien dunya (IMF) saong gilang pariak dunya, rah tabiak di Oa-sinh-tơn (Mỹ), Tổng Giám đốc IMF C.La-gác-đơ hu panuac lac, bruk kinh tế dunya daok dang anak bruk patagok biar dalam tukvak suai lavik. Tui nan, tốc độ patagok thun 2015 tui kuhria suai jang duk saong thun bloh saong daok di tanut mbiah thun 2016. Makna mai meng bruk srau kadau di darak pasar gam saong bruk giảm tốc di kinh tế TQ.

9/ Sa kapan haoh pajeng pandap di Mỹ gaok bala di sa mblang kapan haoh di ban Gia-la-la-bát (Jalalabad), pasak tỉnh Nan-ga-ha (Nangarhar), gah timur negar Áp-ga-ni-xtan  harei  1/10. Bala ni ngak takik di abih 12 urang metai, Tui khau tin di labik ni, kapan haoh Mỹ gaok bala lac boh kapan C-130. Makna di bruk njauk bala nan dok hu duah thau.

10/ Tổng thống Mỹ Ba-rắc Ô-ba-ma sa mbang tra hu panuac ieu ngak catang hukum khik iek phao, hadei di mbang cuh phao di sa sang bac tiểu học di mban Ô-rê-gân, ngak takik di abih 13 urang metai saong 20 urang njauk rambuac. Tui ong, Mỹ lac taneh ia patagok duy nhất  angaok dunya bhian mboh dom bruk cuh phao yau ini, meda lac dom bilan rah tabiak sa mbang. Tổng thống Obama ndom lac, hukum brei hu salih barau saong pachreih QH ngak piah patagok bruk khik iek phao ndao./.