1./Pahadar 85 thun harei padang Kapul urang ngak nong Việt Nam (14/10/1930-  14/10/2015), melam bloh 14-10, di Hà Nội, kapul urang ngak nong Việt Nam pambuak bruk haong Ban Tuyên giáo Trung ương, Mintri ngak nong saong patagok palei pala peih bruk pok meyaom saong jao brei angan urang ngak nong naih gheih thun 2015. Thun ini, 63 urang nông hadah krah dalam negar hu pok brei angan urang nong xuất sắc dalam thun. Ini lac dom urang nong ngak kinh tế joi saong yaom jien mek tame yaok thun yaok tỉ đồng saong hu rilo jalan ngak bharau ba mai kein laba ka bruk ngak nong.  Pok brei angan urang nong Việt Nam xuất sắc thun 2015 ka dom kreih camin nan, akaok Quốc hội Nguyễn Sinh Hùng caong lac: kapul urang ngak nong njauk kham merat ngak po, ngak tabiak pandap panda kaya nong  meriak gauk hu, pablei hu di darak pasar dunya. 

2/ Di HN, Pasak pato pakai thiên nhiên pambuak bruk song jabat patagok dunya Hoa Kỳ peih lễ jao giải buh pren yava khik ramik athur glai mbang ka 2 piah pok meyaom 5 urang jakar iek gah adat hukum song 2 urang vak ngak hu bruk praong dalam khik caga dom janih athur glai di VN

     3./Di Đại học Tây Bắc daok di ban sit Sơn La, tỉnh Sơn La, Học viện biên phòng pambuak bruk haong Miuyim bộ đội biên phòng saong sang bac Đại học Tây Bắc peih parang iek rup thaot tư liệu, bản đồ, dom harak gar ka dua pulao Trường Sa saong Hoàng Sa di Việt Nam. Parang iek hu parang tabiak rilo bản đồ klak di Việt Nam meng abap XV saong yaok rituh blah rup thaot tư liệu ka pulao Hoàng Sa, gam saong  3 tập bản đồ hu patabiak di Trung Quốc saman patao Thanh saong saman Trung Hoa Dân quốc, bộ Atlas bản đồ dunya hu 6 tập patabiak di thun 1827.

4/ Harei kabroi , 14/10 UB bhap bini tỉnh Thừa Thiên-Huế hu tabiak harak brei thau lac ngak hu bloh bruk phổ cập pato pakai mầm non ka uranaih umo ala 5 thun. Urak ni, Thừa Thiên- Huế lac sa dalam takik tỉnh, ban hu tong abih xã mek hu tanut pato pakai mầm non ka uranaih umo ala 5 thun. Tong abih dom xã, phường, ban sit dalam tỉnh jeng hu sang bac mầm non. Dalam labaih 200 sang bac mầm non di tỉnh Thừa Thiên- Huế hu labaih ¼ sang bac mek hu tanut pakat negar. Uranaih umo ala 5 thun nao bac hu labaih 99%  

    5./Mintri jalan mbak pajeng ba bahrau peih bruk brei radaih peih tapa jalan Dự án peih praong jalan roya 1A labik tapa tỉnh Bình Định saong labik tapa tỉnh Phú Yên. Jalan roya 1A tapa tỉnh Bình Định atah jaik 140km, dalam nan hu ramik ngak pasiam meng labik  đèo Bình Đê, jaik tỉnh Quảng Ngãi tal jhung huyện Sông Cầu, tỉnh Phú Yên, jalan praong 21,5 m, hu 4 jalan radaih praong, 2 jalan radaih sit, hu ngak saong yaom jien abih tih jaik 7.800 tỷ đồng.  

6/ Kapul urang njauk jru klik kruac ban sit Đà Nẵng bahrau pambuak bruk song dom DN brei 100 pok pandap ka urang njauk jru klik kruac di huyện Hòa Vang, yaok pok yaom 400 ribau đồng dalam nan hu jien, har, kẹo saradang ia tasau. Lingiu di nan, hu dong ramik pasiam 3 boh sang anit ranam ka urang njauk jru klik kruac daok di xã Hòa Tiến, huyện Hòa Vang, taduan dong ba 15 kamuac, yaok kamuac sa bilan hu 150 ribau đồng.

    7./Hadei di labaih 3 bilan yam tame bruk ngak, Kapul daong urang ruak kan kathaot Tây Nam Bộ hu jak ba meng dom gilang pariak, dom doanh nghiệp, kapul nyaom, menuac urang yaom jien jaik 64 tỷ đồng. Meng yaom jien ini, kapul daong urang ruak kan kathaot Tây Nam Bộ hu peih bruk alin brei 100 baoh sang Jum pataom, yaok baoh yaom 32 triệu đồng brei ka urang kan kathaot,  150 pok jien bac, yaok pok yaom 1 triệu đồng brei ka anek saih kan kathaot bac da-a naih joi, peih bruk iek ruak, brei jru ka labaih 1.500 urang ruak kan kathaot, brei jaik 5.000 tấn xi măng ka dom palei dalam bhum piah padang ngak palei pala bahrau. 

8/ Panuac khan di sang iek ruak Tự do Hoàng gia Luânđôn brei thau, pren yava di  y tá Paulin dok jhak nao hadei di tuk hu iek ruak kayua dom biến chứng meng Êbôla. Anai   Paulin hu iek ruak Êbôla hadei di tuk mai meng Xiêra Lêôn (Sierra Leone) thun bloh. Y tá ni hu tabiak truh labik cách ly catang di sang iek ruak di bilan sa meng bloh min mboh ruak ruak di adit dahlau song hu kapan haoh bol bala samar ba nao iek ruak chip di Luânđôn. Dom chuyên gia brei thau: urak ni, yaok ribau urang daok duik hadei di tuk njom Êbôla di Tây Phi urak ni dok njauk dom tác dụng phụ suai lavik di ruak ni.

   9./Di ban ine Viêng chăn (Vientiane)- Lào bahrau peih nyom biai urang ngak praong pakat glaong ASEAN+3 (hu Trung Quốc, Hàn Quốc saong Nhật Bản) ka patagok palei pala saong patruh eik patrun kathaot mbang ka 8.  tapa nan hu ginum biai haong dom taneh ia pambuak bruk ka jalan peih ngak dom danak dak daok dalam dom gah yau: padang khu dân cư  khang kajap saong khik hu ginup padai brah piah mbang, padang labik daok khang kajap piah pacang bala meng lingik tasik, klah rabha ilamu patagok palei pala saong patruh eik patrun kathaot haong dom tổ chức xã hội piah patagok hu khang kajap.

10/ Harei 14/10 di ban Toyama, Nhật Bản hu rah tabiak bruk tabiak mbaok kapul Hữu nghị Nhật Bản - Việt Nam bhum Hokuriku,  hu mbaok di Đại sứ Đặc mệnh toàn quyền negar Cộng hòa Xã hội chủ nghĩa Việt Nam daok di Nhật Bản. Hội Hữu nghị Nhật Bản - Việt Nam bhum Hokuriku hu padang ngak piah dong patagok talei pambuak bruk nao mai di bhum  Hokuriku song Nhật Bản song Việt Nam, tapa dom bruk KT, pablei salih, đầu tư, pambuak bruk ilamu công nghệ, klah rabha ilamu, pato pakai urang ngak./.