1# Dalam 5 bilan akaok thun 2016, pasak khik ramik inem mek Cố đô Huế pachreih hu labaih 1 rabau mbang tuai mai ravang mein, dalam nan hu 651.335 mbang tuai dunya; jien mek tame meng vé ravang hu labaih 116 tỷ đồng, tagok labaih 20% duk saong dom bilan ini thun dahlau. Piah pachreih tuai mai ravang mein Cố đô Huế, pasak hu peih dom mbang kích cầu du lịch, peih “ adit ameh ravang mein” di inem krung Huế meng harei 22 -28/4 ngan saong rilo bruk ngak biak siam.

2/ Dalam tuk menuac sia dalam taneh ia daok duh hatai ka njam oh saat, oh duah hu njam hacih piah blei ye di Phú Yên njam Viet GAP daok gaok kan kandah kayua oh pablei hu. Dom urang nông pala njam Viet GAP hu pasram megru cambaih nan ye samar thau jalan ngak ngan saong sản lượng yaok thun kurang labaih 110 tấn. Min, tuk ba tabiak darak dom janih njam kan pablei.

3# Piah ba bruk ngak, paglaong jien mek tame ka urang ngak di palei pala, rik daong pasalih cơ cấu urang ngak saong cơ cấu kinh tế, duh ka bruk công nghiệp hóa, hiện đại hóa ngak nong, palei pala, tỉnh Đồng Nai barau tabiak quyết định caik labaih 98 tỷ đồng pato pakai bruk ka urang ngak palei pala tukvak 2016 – 2020. Brei pato bruk dahlau ka urang ngak lac sang cách mạng; sang kathaot, sang jaik ssi kathaot; urang bangsa takik.

4/ Hadei di dom mbang hajan akaok bilan, ralo bein phun thanh long di bhum taneran kraong Cửu Long njauk jit ruak palai kaik. Tiền Giang saong Long An, 2 tinh hu taneh thanh long ralo abih bhum, daok njauk dom ruak: thán thư, ruak đốm nâu, kanyik, thu dhar di akaok trụ. Eng huyện Chợ Gạo, tỉnh TG hu jaik 500 ha phun thanh long njaom dom janih ruak ini.

5# Ủy ban Mặt trận negar Việt Nam tỉnh Sóc Trăng barau peih harei rik pataom jien daong bhapbini gaok kan kandah kayua bala meng lingik tasik, tua riya saong mbak dalam tỉnh tui jalan klah rabha lisaiy ia khan ao, neh rabha dom kan kandah gam saong mikva. Tapa nan, dom labik, doanh nghiệp, menuac urang, mikva kiều bào hu rik daong tame kadung jien daong mikva gaok kan kandah kayua tua riya, mbak yaom jien abih tih jaik 7 tỷ đồng. Ông Dương Sà Kha, akaok Ủy ban mặt trận negar Việt Nam tỉnh Sóc Trăng brei thau:

“ Ủy ban mặt trận negar saong mBan jak ba kadung jien daong di tỉnh samal ba kadung jien hu rik daong nao tal mikva gaok bala; taphia nan ieu bruk daong di abih hệ thống chính trị , daong mikva  pasiam dom kan kandah saong samal tani tanat raidiuk, pala drak veik di tukvak tal.

6/ Urak ini, tỉnh Long An hu patagok jaik 7000 ha kraoc aik. Kroc aik hu asar urak ini pablei yaom meng 12.000 tal 17.000 đồng sa kg, yaom biak tani tanat duk saong tukvak dahlau. Kroc aik oh hu asar hu yaom meng 23.000 đồng tal 26.000 đồng sa kg (glaong jang 3000 đồng tal 4000 đồng sa kg). Tui yaom yau ini, urang nông pala kroc aik biak chreih chrai.

7# Dalam adit tapa, dom huyện U Minh, Thới Bình saong Trần Văn Thời hu palao raong labaih 3 tấn ikan ia taba. Ini lac ikan pajaih hu urang nong caga piah palao raong veik vụ mùa 2017. Dom janih ikan hu palao raong hu 1.000 kg ikan kalaik, 400 kg ikan bổi, daok veik lac ikan dầy, ikan thát lát…Dom ikan ia taba thun ini tok sumu meteh duk saong bilan ini thun dahlau kayua tua riya dui atah yau nan ye ia meng dom danao nyu thu ngak ka yaok tấn ikan pajaih nyu metai. 

Patui di ini dom khau tin dunya:

8/ Sa urang ngak praong di mintri truyền thông saong công nghệ thông tin Ấn Độ barau brei thau taneh ia ini kuhria buh tabiak 56 tỷ USD tame gah điện tử dalam 4 thun tal piah pabak hatai caong dak harei dak patagok dalam taneh ia.

9# Rajaei Nhật Bản barau brei tapa bruk patagok dom jalan khik caga an sinh xã hội piah daong cakak bruk menuac sia daok taha nao. Piah hu jien padai ngk bruk ini, rajaei meda patak pataom meng bruk kakak trun pandar cai di rilo gah gam saong patagok kak je tuk kinh tế siam veik.

10/ Sa mbang megei baoh taneh khang 6,5 độ Richte di gah pai Indonesia mesup 2/6 ngak sa urang metai saong 14 urang njauk rambuah, taphia di nan ngak tayah ralo baoh sang saong sa sang bac. Oh hu cảnh báo sóng thần hu ba tabiak. Indonesia  daok dalam “vành đai pui thái bình dương, labik bhian hu megei baoh taneh./.