1/ Pahadar 65 thun harei anek, sinh viên song Hội sinh viên Việt Nam (9/1/1950-9/1/2015), di Phủ Chủ tịch, akaok negar Trương Tấn Sang hu taom gaok 102 urang nan lac dom sinh viên naih gheih mek hu angan “SV 5 siam” pakat TƯ song Giải thưởng "Sao tháng giêng" thun 2014. Tong yaom glong bruk kham merat di dom anek saih naih gheih. Akaok negar ndom lac bruk pok meyaom dom “SV 5 siam” njauk di harei sinh viên, lac bruk ngak biak hu makna, gam pabak jang ilamu hadah hadai di SV, gam pachreih bruk pakacah gauk di SV dalam taneh ia.

2/ Meng akaok adit tal ini, yaom pablei thanh long dalam tỉnh Bình Thuận hu tagok veik. Urang mai blei di bein, janih siam yaom meng 15.000 tal 16.000 đồng sa kg. Daok thanh long pablei tabiak TQ, yaom meng 10.000 tal 12.000 đồng sa kg, tagok meng 4000 tal 6000 đồng sa kg duk saong dom harei dahlau. Yaom lac thanh long barau tagok yaom veik, min urang nông Bình Thuận biak bui sambai. Kayua lac tui yaom ini, urang nông hu ginup phun, daok dom bein iek glang siam, hu baoh tasak siam yaom pablei 12.000 đồng sa kg urang nông jeng hu laba.

3/ Luac sa adit ni mai, yaom dom janih njam patam di ban sit Đà Lạt, tỉnh Lâm Đồng –tagok jang 2 mbang. Urang pala njam patam biak bui hatai kayua njam pablei tuk ini pabak hu bruk pandar cai jhung thun sa ka ia bilan. Ong Nguyễn Thanh Quang dok di palei Tùng Lâm, phường 7, ban sit Đà Lạt brei thau, drei kuhria tết ka anek bhik hu siam mekre jang, puac thun piah drei hu jien bayar ka dom po khak, mối jru di drei, nan lac sa bruk bo drei sahanang hatai di abih. Ngak piah hu jien mbang tết meng kan.

4/ Labaih 4 thun tapa, tỉnh Bạc Liêu hu buh tabiak labaih 4.350 tỷ đồng piah peih ngak danak dak padang ngak palei pala barau. Tal urak ini, tỉnh Bạc Liêu hu jak ba dom doanh nghiệp dalam, langiu tỉnh rik daong labaih 526 tỷ đồng brei ka danak dak padang ngak palei pala barau. Meng kadung jien ini, Bạc Liêu hu padang ngak labaih 700 jalan mbak palei pala tuh bê tông; padang ngak jaik 800 mbaik tatua palei pala gam saong ralo bruk karei karei.

5/ Tết thun ni, Trà Vinh hu dong 12 tỷ 500 triệu đồng ka dom DN hu mbaok tame bruk khik tani tanat yaom kaom. Thun ni, tỉnh Trà Vinh hu sarak takik pandar kadung jien kajar meng bruk tani tanat yaom kaom, jang yau pachreih dom gilang pariak dok ngak bruk dalam tỉnh hu sarak brei mesraiy ưu đãi ka dom DN hu mbaok tame bruk khik tani tanat yaom kaom dalam 4 bilan dahlau dalam song hadei tết.

6/ Hu padang meng labaih 20 thun ini mai, sang bac THCS Thạnh Ngãi, xã Thạnh Ngãi, huyện Mỏ Cày Bắc, tỉnh Bến Tre daok mbaih, daok khut. Urak ini, 12 duk bac saong duk ngak bruk di sang bac ini daok tapaok daning, geng bê tông caai dom pasei cariah; tabung tauk kavong saong haluh. Jaik 300 urang jakar, gru pato saong anek saih di sang bac biak duh hatai anak bruk mbuan jaleih, mbuan ba tal metai lihik.

7/ Harei 10/1 anak tal, ban raya HCM brei radaih peih iek labik jalan meng An Phú tal tanut vành đai 2, di dự án jalan cao tốc Bắc – Nam, labik meng ban raya Hồ Chí Minh – Long Thành – Dầu Giây. Jalan An Phú – Vành đai 2 atah 4 km hu padang ngak tui tanut jalan đô thị, hu 4 jalan radeih cơ giới song 2 jalan hỗn hợp, jalan praong labaih 26 mét. Tốc độ peih hu 80km sa tuk. Tuk jalan hu peih tabiak , radaih nao mai meng ban raya tal jalan cao tốc abih 4km, dahalu deih lac 9km

Patui di ini dom khau tin dunya:

8/ Bruk trun yaom menyek di darak pasar dunya jeng oh ka dang veik yaom lac yam tapa thun 2015 saong trun tal tanut ala 50 đô la Mỹ sa thung. Bruk ini daok ba mai ralo kein lagaih ka dom taneh ia blei menyek tame yau Ai Cập, daong ka taneh ia ini patrun meneng naong trak dalam pandar cai meng kadung jien daong yaom menyek, jeng yau patagok veik nền kinh tế daok trì trệ.

9/ Jien ơrô daok laik yaom dalam harei kabroi dut song jien đola dalam tuk yaom pandar cai trun tal tunut beir jang kuhria mboh dahlau kayua yaom menyek trun khang. Jabat thống kê di Liên minh châu Âu Eurostat hu panuac khan lac, yaom pandar cai di dom taneh ia pandar jien ơ-rô (Eurozone) dalam bilan 12/2014 trun 0,2%  dut song thun dahlau nan, mbang cemereip laik tame giới hạn tăng trưởng âm meng di mbang khủng hoảng jien padai thun 2009.

10/ Mintri Ngoại giao Trung Quốc brei thau, taneh ia ini hu patui pambuak bruk saong In-đô-nê-xi-a dalam bruk duah sruh kapal haok QZ8501 di Hãng kapal haok E Ây-dờ (AirAsia). Brei panuac dalam mbang họp báo di ban ine Bắc Kinh, urang brei panuac di mintri ngoại giao TQ Hồng Lỗi ndom lac, TQ biak sangka tal bruk dauh sruh kapal haok QZ8501 saong khik kajap talei pambuak bruk saong In-đô-nê-xi-a./.