1./Piah tani tanat darak pasar, daong palagaih ka pandap hu pablei, khik caga quyền lợi urang blei pandar, meng ini tal abih bilan 3/2015, tỉnh Thanh Hóa peih ngak samu gauk rilo bruk piah pacang cakak buôn lậu, blei saliek dalam pablei salih saong pandap ja dalam tuk Tết sak pabe thun 2015.

2/ Tui kuhria mboh di sở công thương tỉnh Quảng Nam, urak ini dom doanh nghiệp, baoh sang pablei salih sit sot dalam tỉnh hu mbaok tame danak dak tani tanat yaom kaom dalam tuk tết anek sak pabe hu khik mepiah pandap yaom abih tih 70 tỷ đồng, dalam nan labaih 90% lac pandap VN. Tỉnh hu daong meng kadung jien karja tỉnh, daong dom doanh nghiệp saong dom baoh sang ngak mbang sit sot hu mbaok tame danak dak tani tanat yaom kaom mesraiy 40 tỷ đồng piah blei pandap khik mepiah, dil pablei dalam tuk tết.

3./Hãng kapal haoh yaom lap di Việt Nam- Jetstar Pacific peih mbang pablei harak yaom biak lap dalam 4 harei tui yaom 5 đồng sa mbang di 5 jalan par dalam taneh ia jaik hu peih tabiak nan lac Thanh Hóa – Buôn Ma Thuột, Buôn Ma Thuột - Hải Phòng saong meng ban raya Hồ Chí Minh tal Quy Nhơn (Bình Định), Đồng Hới (Quảng Bình), Tuy Hòa (Phú Yên). Danak dakl hu peih tabiak meng 12 tuk jala pandiak harei 8/1 tal abih harei 11/1/2015.

4/ Tukvak tapa, Đồng Nai hu pataom tame bruk patagok dom janih phun pala, athur raong khang kajap, sangka tal bruk ba ilamu công nghệ tame bruk ngak mbang, nan ye bruk ngak nông mek hu dom kein lagaih. Tak irak ini, dalam tỉnh hu jaik 7.000 ha phun pala lavik thun hu jalan pruh ia patak pataom saong buh khak tapa jalan nding, daong ka urang nông patagok jien mek tame .

5./Urak ini, urang nong tinh An Giang pala hu labaih 23.000 héc-ta njam patam caga pablei Tết sak pabe, pataom rilo di Chợ Mới, An Phú, Tri Tôn, Châu Phú, ban sit Tân Châu. Labaih 60 janih njam patam baoh kraoh hu urang nong pala tui ilamu glaong dalam sang halăm, pala njam hacih tui jalanVietGAP.

6/ Cty TNHH sa thành viên Lâm Nghiệp U Minh Hạ, tỉnh Cà Mau nan lac đơn vị khik iek glai praong abih di huyện U Minh Hạ ngan saong labaih 17.3000 ha. Yam tame bilan pandiak thun ini, Cty hu pambuak bruk saong karja palei jhul pakhang bruk pathau khan ka dom baoh sang bhap bini daok dalam taneh glai thau hu bruk kanjah jhak, khat lihik tuk pui mbang glai, jak ba bhap bini paglaong akaok sahneng khik caga glai .

7./Thun 2015, tỉnh Kiên Giang pataom pren yava tame padang ngak hạ tầng pambuak haong salih cơ cấu kinh tế tui jalan patagok yaom pandap ngak kong, piah ngak hu bruk patagok kinh tế, xã hội 5 thun (2011-2015). Tui nan, tỉnh Kiên Giang samar ngak salah bruk peih praong jalan roya 61, labik meng Bến Nhất tal tatua Cái Tư jaik tỉnh Hậu Giang; tatua Rạch Sỏi, jalan tapen tasik gah meraong, jalan meng Thứ Bảy tal Cà Mau, jalan Tỉnh lộ 964, pambuak haong Mintri Giao thông Vận tải samar padang jalan roya 80 bahrau, labik meng Lộ Tẻ tal Rạch Sỏi saong meng Rạch Giá tal Hà Tiên.

Patui di ini dom khau tin dunya:

8/ 2.000 cảnh sát giao thông Philippines peih bruk điều tiết giao thông di ban ine Manila dalam mbang nao rivang di Giáo hoàng Francis meng harei 15 tal harei 19/1 hu pacap brei cuk tã brei ka urang praong piah khik kajap nhiệm vụ. Blah Inquirer di Philippines ba panuac akaok jabat patagok Đô thị Manila Francis Tolentino  brei thau: karja jeng hu pachreih bhap bini cuk tã yau cảnh sát dalam tuk cang lavik piah maong piah mboh Giáo hoàng.

9./Mintri Ngoại giao Mỹ brei thau, hu brei sa kapul pakat glaong di Mỹ nao tal Giơ-ne-vơ (Geneva), Thụy Sỹ piah pambuak veik dom mbang ginum biai haong Iran pambuak tal danak dak hạt nhân Iran.Thứ trưởng Ngoại giao Mỹ Oen-đi Xơn-men (Wendy Sherman) meda ba akaok kapul ngoại giao Mỹ piah ginum biai haong Iran. Mbang nyom di Mỹ haong Iran tui kuhria hu rah tabiak meng harei 15 tal harei 17 bilan 1 ini. 

10/ Tuk tal bilan brak, Cuba hu taduan ralo tuai damuai meng Ca-na-đa saong châu Âu tuh mai taneh ia ini piah rok pandiak di La Ha-ba-na gam saong dom nhà thờ, dom sang yaok rituh thun siam yau rup cih. Urak ini, tuk Tổng thống Mỹ tabiak panuac lac padang veik talei pambuak saong Cuba, La Ha-ba-na thun ini meda ba mai ka taneh ia ini rilo jien mek tame meng bruk du lịch./.