1/ Di ban sit Buôn Ma Thuột, Thủ tướng Nguyễn Tấn Dũng song kapul rajaei hu var ngak bruk song urang dang akaok tỉnh Đắk Lắk ka bruk patagok KTXH di tỉnh. Thủ tướng tong yaom glong song pok meyaom dom kham merat song dom  jak jeng dalam bruk tagok KTXH bo Đảng bộ, karja, bhap bini dom bangsa tỉnh Đắk Lắk mek hu dalam dom thun tapa. Jeng dalam tuk caga uan raok Tết Nguyên đán anek sak pabe. Thủ tướng Nguyễn Tấn Dũng hu nao rivang song tangi sua dom urang jakar dahlau deih ngak CM di tỉnh Đắk Lắk.

2/ Salam uan Tết anek sak pabe, Ủy viên mintri Chính trị, akaok Ủy ban Trung ương Mặt trân negar Việt Nam Nguyễn Thiện Nhân hu nao rivang, alin hadiah 200 paok pandap ka urang njom jru mek klik kruoc Dioxin huyện Thanh Thủy saong Thanh Sơn, tỉnh Phú Thọ. Akaok UB TU7MT negar VN Nguyễn Thiện Nhân lac: “Tapa ini dahlak hu panuac dhar phon tal adei saai dahalau daih ngak bol lin, urang dahlau daih ngak thanh niên xung phong di 2 huyện dalam tukvak mesruh metak peih paha gah meraong saya taneh ia. Jeng caong dom adei saai oh patuah jamo dalam tukvak mesruh metak njom jru mek hu pachreih anek kamuan ngak ka rai diuk dak harei dak nao tagok”.

3/ 500 urang kan kathaot di palei Sàng Ma Sáo, xã Sàng Ma Sáo, huyện Bát Xát, tỉnh Lào Cai hu iek ruak brei jru saoh dalam tuk Tết Nguyên đán. Ni lac sa bruk ngak pachreih tui bruk “Tết kayua urang kan kathaot” di sang iek ruak Sản Nhi tỉnh Lào Cai. Palei Sàng Ma Sáo hu 70 boh sang urang bangsa Mông, dalam nan hu 30 boh sang kan kathaot. Ni lac sa palei biak kan kandah di tỉnh Lào Kai.

4/ Uan Tết anek sak pabe thun ini, pasak thông tin di động bhum III di ban sit Đà Nẵng hu alin hadaih labaih 1.000 paok pandap tết ka mikva kan kathaot, uranaih gaok kan kandah di dom tỉnh bhum kreih negar saong Tây Nguyên. Langiu di nan, pasak daok alin jaik 200 gu pei nung hijao ka urang kan kathaot daok di ban sit Đà Nẵng saong tỉnh Bình Định. Bí thư đoàn dam dara pasak thông tin di động bhum III Hoàng Xuân Đăng Cường brei thau: yaok thun, pasak jak ba urang jakar, nhân viên rik daong meng 1 tal 2 harei jien bilan ka bruk ngak pahala.

5/ Thành Ủy, UB bhap bini, Ủy ban Mặt trận negar ban sit Cần Thơ bahrau peih bruk tom gaok labaih 120 chức sắc, chức việc dom agama dok dalam ban sit dalam tuk uan raok thun bahrau anek sak pabe. Ong Lê Văn Tâm – Phó chủ tịch UB bhap bini ban sit Cần Thơ tong yaom glong bruk rik dong di dom agama dalam bruk patagok di ban sit. Hu panuac ieu dom chức sắc, chức việc, nhà tu hành  song dom tín đồ agama paglong dom bruk ngak hu, gam saong ban sit hu mbaok tame bruk pakacah gauk anit ranam taneh ia, bruk tong abih bhap bini jum pataom dak padang rai duik di labik dok, dong padang ngak ka ban sit dak harei dak salih bahrau .

6/ Kapul ngak bruk tỉnh ủy Cà Mau hu nao rivang saong tadhau yuh tết ka mikva labik căn cứ tỉnh ủy di khu vực Xẻo Đước, di xã Phú Mỹ, huyện Phú Tân. Taphia di nan, kapul ngak bruk hu alin hadiah 60 paok pandap tết ka dom ong dahlau daih dang akaok tỉnh ủy tapa dom saman, dom baoh sang sarak karja gam saong panuac tadhau yuh thun barau trei sil hanem phon.

7/ Kapul dong ba urang jaoh jo song uranaih metui medar ban raya HCM peih danak dak phun bilan xuân “Pahadah hatai siam” mbang ka 14. Dalam danak dak phun bilan xuân mbang ni, kapul dong ba urang jaoh jo, uranaih metui medar ban raya HCM brei pandap tết ka 2000 urang jaoh jo, uranaih metui medar hu rai duik kan kandah, dom cơ sở dong ba XH, dom boh sang, nhà mở. Kuhria tabiak yaom jien abih tih labaih 800 triệu đồng.

Patui di ini dom khau tin dunya:

8/ Harei kabroi 9/2, bruk tập trận chung Mỹ - Thái Lan hu angan “Hổ mang vàng” thun 2015 hu peih tabiak saong dui atah tal harei 20 bilan 2 di dom tỉnh gah brak saong bhum kreih negar Thái Lan. Bruk tập trận chung “Hổ mang vàng” thun ini lac bruk tập trận mbang ka 34. Tui panuac khan di urang dang akaok bol bala Thái Lan, bruk tập trận chung “Hổ mang vàng thun ini” hu mbaok di 13 ribau urang lin dom taneh ia, eng Mỹ hu 3 ribau 600 urang lin, patrun 700 urang duk saong kuhria dahlau.

9/ Dom radeih pajeng pandap dong ba di Bộ tình trạng khẩn cấp Nga brei ka bhap bini labik dok meriak gauk Đô-nhe-xcơ (Donetsk), Ucraina hu mai tal labik ni. Tui ong Lê-kôm-xốp (Alexander Lekomsov), lambaok vakil ka Mintri tình trạng khẩn cấp Nga: hu labaih 100 radeih tải pajeng tui 1 ribau tấn pandap dong, dalam nan hu pandap mbang menyum, saong dom  janih karei karei hu mai oh gaok kan kandah hagait.

10/ Dalam tuk jit Ebola di Xiêra Lêon daok patrun dalam tukvak jaik di ini, cộng đồng kinh tế dom taneh ia Tây Phi (ECOWAS)  barau ini sanya brei samar peih veik dom mbang par tal labik ini. Urang điều phối di công đồng kinh tế Tây Phi jeng ndom lac brei padeih bruk cô lập bo Xiêra Lêôn njauk taduan meng tuk jit Ebola tamuh tabiak meng thun bloh./.