1/ Harei kabroi, di trụ sở rajaei, Thủ tướng Nguyễn Tấn Dũng hu taom gaok  akaok mintri Kế hoạch Campuchia Chhay Than dok mai rivang ngak bruk di VN. Thủ tướng ndom lac Rajaei VN bui sambai anak bruk patagok khang dalam talei rohim di 2 negar jang yau talei pambuak bruk khang kajap, siam lagaih di mintri Kế hoạch Campuchia song mintri Kế hoạch -Đầu tư Việt Nam.

2/ Tal tukvak ini, tỉnh Bình Thuận hu ngak salah bloh bruk klauk vắc xin sởi – rubella brei saoh ka uranaih umo meng sa tal 14 thun ginup tui bruk ba tabiak. Tamat bruk, dalam tỉnh hu jaik 293.000 uranaih hu klauk pacang caga, meblah jaik 98% dom uranaih dalam umo, yam tapa tanut di mintri y tế jao 4%.

3/ Anak bilan pandiak bhang dui atah, di dom labik hu glai dalam tỉnh Bình Phước mboh lac mbuan si khuah glai pakat 4, meda rah tabiak di tuk halei oh thau. Piah samar khik caga glai, Mban tacei jalan khik iek song patagok glai tỉnh Bình Phước hu panuac ieu dom đơn vị pathau khan ka bruk pacang caga khauh glai tal bhap bini, dom công ty, DN, abih di nyu nan lac bhum palei mbuan si khuah glong, bhum urang bangsa takik.

4/ Ban Cần Thơ barau peih bruk ngak pathi mbang 143 Thủ khoa Bùi Hữu Nghĩa. Ong nan lac sa dalam dom nhà thơ ranam taneh ia hadah krah puac abhap 19 saong lac urang ngak praong siam hatung hatian dane angan hu bhap bini bhum Nam kỳ lục tỉnh pok lac sa dalam 4 “inegirai ameh” taneh Nam Bộ.

5/ Tui Chi cục Thú y Đồng Nai, kuhria tal harei tong abih tapon pabui dalam tỉnh pataogk hu labaih 1 triệu 400 ribau drei. Urak ni ĐN lac sa dalam dom tỉnh dang akaok di gah merong pabak rilo janih rilaow yau pabui, menuk, boh da. Dalam nan hu  60-70 % rilaow pabui, menuk di ĐN pabak ka darak pasa ban raya HCM song dom tỉnh jaik taphia

6/ Bilan padai Đông Xuân 2014- 2015, gah ngak nông tỉnh Trà Vinh padang hu 21 mblang hamu praong di 20 xã dalam 5 huyện Càng Long, Cầu Kè, Tiểu Cần, Trà Cú và Châu Thành, pachreih hu 4.139 baoh sang urang nông hu mbaok tame ngan saong taneh praong abih tih 4.175 ha. Dalam nan, hu 3.875 ha meblah jaik 93% taneh mblang hamu praong hu Cty Lương thực Trà Vinh blei taong abih padai tuk yuak kuak tui jalan hu kein laba ka urang nông.

7/ Piah yam tal bruk patagok rong glang tapon limo rilaow chất lượng glong meng anek pajaih tal ralaow pablei tabiak, tỉnh An Giang bahrau peih dự án ‘Rilaow limo thun 2015 - 2016”. Dự án hu phun jien abih tih jaik 16 tỷ đồng, hu peih ngak di 6 huyện meda patagok limo rilaow, limo binai menek, yau huyện  Chợ Mới, Châu Phú, Tri Tôn...Dự án hu pataom tame bruk pabak brei limo pajaih menek siam song ilamu pagam tinh nhân tạo, mek tinh di dom pajaih limo Zebu piah tagok tapon binai, tagok dom janih limo pajaih chất lượng glong piah pabak ka urang blei mbang urak ni.

Patui di ini dom khau tin dunya:

8/ Gilang pariak dunya barau patabiak số liệu thống kê brei mboh lac bhum Mỹ Latinh saong Caribe jeng daok 130 triệu urang kan kathaot yaom lac bhum ini ngak hu siam dom bruk patruh eik patrun kathaot dalam labaih meteh abhap tapa. Tui harak pathau khan di gilang pariak dunya brei thau, hu tal 20% menuac sia Mỹ Latinh diuk rai dalam kan kathaot eik lipa luac rai diuk saong bruk ini hu karei di gauk di yaok taneh ia dalam bhum.

9/ Di Bắc Kinh, mbang nyaom ka 3 Quốc hội Trung Quốc mbang 12 meda  brei tapa dự thảo hukum lập pháp pasiam veik di harei 15/3 anak tal. Ni lac mbang pasiam veik camereip abih hadei di 15 thun TQ ba tabiak hukum ni.

10/ Ấn Độ halan hatian jhul pakhang sa dự án praong saong Nga pambuak tal sruh kapal haok mesruh rai ka 5. Dalam tuk daok gaok dom kan kandah dalam thỏa thuận praong blei 126 sruh kapal haok mesruh metak Ra-phan di Prang, Ấn Độ daok patagok samar ka dự án praong jang saong Nga pambuak tal bruk ngak tabiak kapal haok mesruh rai ka 5. Ấn Độ halan hatian buh tabiak jaik 25 tỉ đô la Mỹ ka bruk ngak ini./.