1#/ Harei kabroi, akaok mintri ngak nong song patagok palei pala Cao Đức Phát hu nao pasang iek duah thau hatai khin di bhap bini anak bruk ikan metai rah tabiak di dom xã tapen tasik tỉnh Thừa Thiên-Huế.  Di Cảng ikan Thuận An, akaok mintri ngak nong song patagok palei pala Cao Đức Phát hu taom gaok klah rabha dom kan kandah song urang tong ikan, dom po kapan dịch vụ pablei salih kaya ikan, dom boh sang rong pala kaya ikan bahrau njauk khat lihik kayua ikan metai. Hatai khin di mik va lac karja samar hu sarak dong blei anek pajaih, pandap mbang piah patui bruk ngak mbang tani tanat rai duik.

2/ Di labik raong pala kaya ikan di mikva urang taong cap ikan huyện pulao Phú Quý, tỉnh Bình Thuận hu ikan metai ralo, tui kuhria khat lahik abih tih ralo tỷ đồng. Makna ikan metai daok hu gah chức năng huyện pulao Phú Quý pasang iek duah thau.

3#/ Gilang pariak karja, dhar tỉnh Quảng Bình bahrau ginum biai song dom kapul tín dụng dok dalam tỉnh piah peih ngak sarak dong ka urang tong ikan tui tacei pato di thủ tướng rajaei. Di tỉnh Quảng Bình urak ni hu 2.280 tuai di dom kapul tín dụng dok gaok kan kandah kayua ikan metai dok mesraiy labaih 798 tỷ đồng. Anak bruk ni, dom gilang pariak hu sarak dong urang tong ikan pasiam veik bruk ikan metai.

4/ Harei 19/5, xã Thổ Châu, huyện Phú Quốc, tỉnh Kiên Giang hu peih bruk buh phiếupilih ruah urang ka QH mbang XIV saong urang ka HĐ bhap bini dom pakat tukvak 2016 – 2021, avar jang 3 harei duk saong quy định. Urak ini, karja palei daok kham merat kuhria caga ka harei bầu cử ini.

5#/ Tỉnh Đắc Lắc urak ni hu 556 danao, binek, kavei, min urak ni rilo meng thu lagu. Dalam nan, 150 danao,binek kavei thu abih ia, 340 danao, binek ia daok 10% dung tích. Meng akaok bilan thu tal ni Công ty Quản lý Công trình Thủy lợi Đắc Lắc hu peih bruk parabha ia siam lagaih ka yaok janih phun pala, pandar ia patak patom, min kayua pandiak bhang dui atah, nan ye taneh phun pala njauk thu lagu dak harei dak tagok, abih di nyu nan lac phun cà phê.

6/ Tỉnh Tiền Giang barau peih ngak dự án đầu tư padang ngak công trình gây bồi, tạo bãi pala phun dauk mbak khik caga ar di xã Tân Điền, huyện Gò Công Đông. Dự án hu peih ngak meng ini tal thun 2020 nan lac padang ngak ar patrun riyak, pala barau, iek glang, khik caga saong pasiam veik jaik 18 ha glai pacang caga tapen tasik, ngan saong yaom jien buh tame ngak abih tih labaih 56 tỷ đồng.

7#/ Sang iek ruak nhi đồng 2, ban raya HCM brei thau, kayua langik pandiak yau nan ye labaih 2 adit ini mai, uranaih tame sang iek ruak kayua njauk dom janih ruak  jalan suah yava, song jalan tung tagok glong dut song dahlau deih. Bác sĩ Huỳnh Minh Thu, Phó Trưởng phòng Kế hoạch Tổng hợp, sang iek ruak Nhi Đồng 2 kakei lac: Langik biak pandiak, min dom adei sit bhian hu amaik ame papaok sre,  ngak brei uranaih njauk rôm sảy, bloh katal klik. Khol drei njauk thau lac, pandiak mbuan ba tal rilo ruak kik, njauk pacang caga ruak siam jang iek ruak

Patui di ini dom khau tin dunya:

8/ Urang brei panuac mintri ngoại giao TL Wan-na-me-thi brei thau, dalam adit ini, mintri ngoại giao TL hu peih sa mbang nyaom saong jabat Cao ủy Nhân quyền LHQ piah langyah dom suh sah ka bruk nhân quyền urak ini di TL.

9#/ Harei kabroi, Kapul pakat glong mintri Công an Việt Nam kayua Thượng tướng Tô Lâm, Ủy viên mintri Chính trị, Akaok mintri Công an hu tapa rivang song ngak bruk di Cộng hòa dân chủ bhap bini Lào.Di var ngak bruk 2 gah tong yaom lac, meng akaok thun 2016 tal ni, dalam tuk hu rilo kan kandah, tavak tavaiy, min công an 2 negar Lào - Việt Nam peih ngak hu siam dom kadha dalam talei pambuak bruk 2016. Dalam nan hu klah rabha ilamu, langyah dom bruk pagam tal an ninh, trật tự di 2 negar.

10/ Phaok Thủ tướng gam lac akaok mintri Ngoại giao Bỉ Đi-đi-ê Rên-đơ harei kabroi (10/5) hu panuac caong taneh ia ini peih nyaom meyai kinh tế piah peih tabiak jalan pambuak bruk kinh tế di Ixraen saong Palextin. Ong Rên-đơ ba tabiak hatai sahneng yau nan dalam sa mbang họp báo tuk mai rivang ban Gada di dải Gada. Phaok thủ tướng Bỉ brei thau, langiu viện trợ di dunya, Palextin njauk pambuak bruk piah jhul pakhang kinh tế, pablei salih./.