1/ Duah bruk ngak ka urang ngak palei pala hu tỉnh Yên Bái caik hatai sangka. Meng dom jalan ngak samu gauk, dalam nan pachreih dom DN hu mbaok tame bruk pato bruk ngak song duah bruk ngak , thun dahlau, tỉnh hu jiak 18.200 urang hu bruk ngak. Tỉnh kham merat thun ni dong duah bruk ngak ka 19 ribau urang ngak di palei pala .

2/ Sở ilamu TT saong DL tỉnh Khánh Hòa barau hu harak payua dom doanh nghiệp ngak mbang gah DL dalam tỉnh ka bruk daong, khik kajap siam mekre ka tuai damuai. Piah pacang cakak bruk co klaih drap ar di tui damuai, Sở ilamu TT saong DL tỉnh Khánh Hòa pandar dom labik lưu trú padang nội quy saong quy định tui ralo sap yau: Việt, Anh, Prang, TQ, HQ, NB, Nga… caik di labik taduan raok tuai saong duk ndih di tuai damuai.

3/ Meng 3 tuk biar harei 11/3, yaom xăng RON 92 song RON 95 tagok 1.600 đồng sa lít. Ni lac mbang camereip yaom xăng tagok veik, hadei di 2 mbang tani tanat yaom kaom dahlau di nan song 15 mbang trun yaom dalam 6 bilan tapa. Tui mintri công thương, yaom xăng menyek dunya tuk vak jiak di ni daok tagok glong, abih di nyu nan lac  xăng, menyek diezen.  

4/ Di ban sit Buôn Ma Thuột, tỉnh Đắc Lắc barau rah tabiak nyaom meyai patagok khang kajap gah cà phê VN, hu mbaok di ralo urang gah khik iek, dom doanh nghiệp, chuyên gia cà phê dalam taneh ia saong dunya. Nyaom meyai oh lac pabak thông tin, bo meda ba tabiak dom bruk tui rilo meta maong saong peih tabiak ralo jalan ngak piah patagok cà phê VN khang kajap.

5/ Urak ni, urang nong tỉnh Tiền Giang yuak padai dalam bui sambai njauk padai. Di dom huyện Cái Bè, Cai Lậy, Châu Thành năng suất padai that hu labik tagok tal 10 tấn sa ha, tagok glong di abih dut song 5 thun gilac mai. Padai Đông xuân thun ni ngak njauk kayua langik tasik siam lagaih, takik jit rua, takik hu asar pet.

6/ Di palei Tân Thạnh, xã An Hiệp, huyện Châu Thành, tỉnh Đồng Tháp barau rah tabiak sa mbang jaleih haluk biak khang. Labik jaleih haluk nan lac ala takai mỏ hàn ka 7 di công trình kè mỏ hàn xã An Hiệp atah jaik 150 m saong mbang dalam tame taneh labaih 70m. Taneh jaleih jaik 11.250 m2 taneh bein. Jaleih rah tabiak biak samar nan ye ngak khat lahik ka phun kayau, athur raong saong sang danaok, var ro di bhap bini, khat lahik drap ar labaih sa tỷ đồng.

7/ UB bhap bini tỉnh Kiên Giang bahrau njauk hatai brei ngak dự án Kho xăng menyek song Cảng hậu cần di Tập đoàn Dầu khí Việt Nam song Tổng Công ty Dầu Việt Nam (PV Oil) di huyện palao Phú Quốc. Tui nan labik hu pasang iek piah palih ruah padang ngak dự án nan lac di ban sit An Thới. Langiu di bruk pabak ginup xăng menyek piah pablei di tỉnh KG, dom tỉnh gah merong song ngak kho trung chuyển, kho ngoại quan piah nhập tư, xuất tabiak xăng menyek, dự án dok pabak ka dom bruk ngak gah xăng menyek yau bruk kuac raok, roh duah, patagok  mỏ, khai thác xăng menyek di tasik.

Patui di ini dom khau tin dunya:

8/ Dalam mbang nao rivang saong ngak bruk di CPC meng harei 10 tal harei 11/3, akaok gilang pariak patagok Á Châu (ADB), ong Ta-ke-hi-cô Na-ca-ô hu sanya patui daong taneh ia ini 645 triệu USD piah patagok kinh tế xã hội tukvak 2015 – 2017, dalam nan yaom jien brei mesraiy ưu đãi meng ADB nan lac 535 triệu USD saong 110 triệu USD meng dom gah pambuak bruk patagok karei di ADB.

9/ CHDC bhap bini  Triều Tiên harei kabroi 11/3 hu panuac lac, thun 2015 lac thun hữu nghị Triều Tiên- Nga. Piah patagok talei pambuak bruk di dua gah dalam dom bruk chính trị, kinh tế, ilamu, dalam thun ni 2 negar hu patagok dom bruk nao rivang gauk tui kapul ngoại giao, dom mbang taom gaok jang yau klah rabha ilamu ilamu di 2 gah. 

10/ Pandiak bhang biak khang daok palai pajoa ralo puk palei di gah meraong Ma-đa-gát-xca, ngak ka ralo urang eik lipa, ralo uranaih metai kayua lavang lavaih. Karja pul palei brei thau, takik di abih 16 uranaih metai saong jaik meteh dom uranaih umo ala 3 thun daok di labik ini suai praong kayua lavang lavaih./.